தமிழக அரசு அலுவலர்களுக்கு புது சலுகை

அரசு அலுவலர்களை மேலும் திருப்திப்படுத்தும் விதமாக,
தமிழகம் முழுவதும் உள்ள அரசு அலுவலர் வாடகை குடியிருப்புகளை சீரமைக்க, 34
கோடி ரூபாய் நிதியை தமிழக அரசு ஒதுக்கியுள்ளது. விரைவில் தேர்தல் நெருங்கி
வருவதை முன்னிட்டு, பல தரப்பினரையும் சமாதானப்படுத்தவும்,
சந்தோஷப்படுத்தவும் தமிழக அரசு பகீரத முயற்சிகளில் இறங்கியுள்ளது.
முக்கியமாக, தேர்தல் பணிகளை மேற்கொள்ளவுள்ள, அரசு அலுவலர்கள் மற்றும்
ஆசிரியர்களை குஷிப்படுத்த சம்பள உயர்வு, சலுகைகள் போன்றவற்றை வாரி வழங்கி
வருகிறது. இதனால், பிற தரப்பினருக்கு ஏற்படும் அதிருப்தியைப் பற்றி அரசு
கவலைப்படுவதாக இல்லை.
இந்த முயற்சிகளின் ஒரு கட்டமாக, தமிழகத்திலுள்ள முக்கிய
நகரங்களில் உள்ள அரசு அலுவலர் வாடகை குடியிருப்புகளை சீரமைக்க தமிழக
அரசின் வீட்டுவசதி மற்றும் நகர்ப்புற மேம்பாட்டுத் துறை சார்பில், 34
கோடியே 37 லட்ச ரூபாய் நிதியை ஒதுக்கியுள்ளது. இதற்கான அரசாணையை,
இத்துறையின் செயலர் அசோக் டோங்ரே, கடந்த 28ம் தேதியன்று (எண் 299)
பிறப்பித்துள்ளார். தமிழ்நாடு வீட்டுவசதி வாரியத்தின் கட்டுப்பாட்டில், 26
ஆயிரத்து 891 வாடகை வீடுகள் உள்ளன. இவற்றில், பெரும்பாலான வீடுகள், 30
ஆண்டுகளுக்கு முன்பாக கட்டப்பட்டவை. சரியான பராமரிப்பு இல்லாததாலும்,
குறிப்பிட்ட கால இடைவெளியில் சீரமைப்புப் பணிகளை மேற்கொள்ளாததாலும், இந்த
வீடுகள் அனைத்துமே, மிக மோசமான நிலையில் உள்ளன. இவற்றை சீரமைக்க நிதி
ஒதுக்க வேண்டுமென்று, கடந்த 15 ஆண்டுகளுக்கும் மேலாக அரசு அலுவலர்கள்
போராடி வருகின்றனர். ஆனால், வீட்டுவசதி வாரியமோ, அடுத்தடுத்து ஆட்சிக்கு
வந்த அரசுகளோ இந்த கோரிக்கையை கண்டு கொள்ளவே இல்லை. அதனால், அங்கு
குடியிருக்கும் அரசு அலுவலர்களே தங்களது சொந்தக்காசைப் போட்டு ஓரளவு
சீரமைத்து கொண்டு, அச்சத்துடன் குடியிருந்து வருகின்றனர். நகர்புறங்களில்
வாடகை அதிகமாக இருப்பதால், வேறு வழியின்றி இந்த வீடுகளில் வசிக்க வேண்டிய
கட்டாயத்தில் அரசு அலுவலர்கள் உள்ளனர். அதனால், அரசு அலுவலர் வாடகை
குடியிருப்புகளையும் சீரமைக்க சிறப்பு நிதி ஒதுக்கி, இடிந்து விழும்
நிலையிலுள்ள கட்டடங்களை காப்பாற்ற வேண்டுமென்று, கடந்த 2006ல் தி.மு.க.,
அரசு பொறுப்பேற்றதிலிருந்தே கோரிக்கை கிளம்பியது. ஒரு வழியாக, இந்த
ஆட்சியின் இறுதிக்காலத்தில் தான் இந்த கோரிக்கை ஏற்கப்பட்டுள்ளது.
தமிழகம் முழுவதும் உள்ள வாடகை வீடுகளில், 16 ஆயிரத்து 597 வீடுகளை
சீரமைக்க, 34 கோடியே 37 லட்சத்து 28 ஆயிரம் ரூபாய் நிதியை அரசு
ஒதுக்கியுள்ளது. சென்னையில் அதிகபட்சமாக 2,160 வீடுகளுக்கு நான்கு கோடியே
70 லட்ச ரூபாயும், மதுரையில் 1,622 வீடுகளுக்கு மூன்று கோடியே ஐந்து லட்ச
ரூபாயும் நிதி ஒதுக்கப்பட்டுள்ளது. தஞ்சையில் 1,378 வீடுகளுக்கு ஒரு
கோடியே 88 லட்ச ரூபாயும், திருச்சியில் 1,196 வீடுகளுக்கு இரண்டு கோடியே
38 லட்ச ரூபாயும், வேலூரில் 998 வீடுகளுக்கு மூன்று கோடியே 45 லட்ச
ரூபாயும், ஈரோட்டில் 636 வீடுகளுக்கு மூன்று கோடியே 41 லட்ச ரூபாயும் நிதி
ஒதுக்கீடு செய்யப்பட்டுள்ளது. தமிழகத்திலுள்ள 32 மாவட்டங்களில்,
வீட்டுவசதித் துறை அமைச்சர் பெரியசாமியின் சொந்த ஊரான திண்டுக்கல் மற்றும்
விருதுநகர் மாவட்டங்களுக்கு மட்டும் நிதி ஒதுக்கீடு இல்லை.
கோவை மாவட்டத்திலுள்ள அரசு அலுவலர் வாடகை குடியிருப்புகளில், 960
வீடுகளை சீரமைக்க ஐந்து கோடியே 32 லட்ச ரூபாய் நிதி ஒதுக்கப்பட்டுள்ளது.
அதே நேரத்தில், அங்குள்ள 1,642 வீடுகளை இடிக்கவும், புதிதாக 2,000 வீடுகளை
கட்டவும் மற்றொரு அரசாணை பிறப்பிக்கப்பட்டுள்ளது. இதனால், தமிழகம்
முழுவதும் உள்ள அரசு அலுவலர் குடியிருப்புகள், விரைவில் புதுப்பொலிவு
பெறுமென எதிர்பார்க்கப்படுகிறது. இந்த நிதியை கொண்டு, தேர்தலுக்கு
முன்பாகவே சீரமைப்புப் பணிகளை துவக்கவும், வாரிய அதிகாரிகளுக்கு அரசு
அறிவுறுத்தியிருப்பதாக வீட்டுவசதி வாரிய வட்டாரங்கள் கூறுகின்றன. கமிஷன்,
களவாடல் எதுவுமில்லாமல் சீரமைப்புப் பணிகள் நடந்தால், 16 ஆயிரம் அரசு
அலுவலர் குடும்பங்களின் ஆதரவு, இந்த அரசுக்கு நிச்சயமாக கிடைப்பதற்கு
வாய்ப்புள்ளது.