ஏலக்காய் விலை ஒரே நாளில் கிலோவுக்கு ரூ.500 உயர்வு

by **ஜனனி** Sat Dec 25, 2010 7:28 am

சேலம் : வெளிநாடுகளுக்கு ஏலக்காய் ஏற்றுமதி
அதிகரித்ததன் எதிரொலியாக, நேற்று ஒரே நாளில் கிலோவுக்கு 500 ரூபாய்
உயர்வடைந்து, வியாபாரிகளை அதிர்ச்சி அடையச் செய்துள்ளது. இந்தியாவில்
உற்பத்தியாகும் நறுமண பொருட்களில், ஏலக்காய் முதலிடத்தை பெறுகிறது. இது
நறுமண பொருளாகவும், மருத்துவத்துறையிலும் அதிக அளவில் பயன் படுத்தப்பட்டு
வருகிறது. ஏலக்காயில் பெரிய, நடுத்தர
மற்றும் சிறிய ரகம் என, மூன்று விதங்கள் உள்ளன. இதில், இந்தியாவில்
உற்பத்தியாகும் பெரிய, நடுத்தர ஏலக்காய்களுக்கு அரபு நாடுகள், அமெரிக்கா,
ஆஸ்திரேலியா நாடுகளில் வரவேற்பு அதிகரித்துள்ளது. இங்கு விற்பனை
செய்யப்படும் விலையை விட, வெளிநாடுகளில் அதிக விலை கிடைப்பதால், அதிக
அளவில் ஏலக்காய்கள், ஏற்றுமதி செய்யப்படுகின்றன. இந்தியாவில் இருந்து
டிசம்பர் இரண்டாவது வாரம் வரை, 1,975 டன் ஏற்றுமதி ஆகி உள்ளது. இதில்,
சவுதி அரேபியாவுக்கு மட்டும் 1,120 டன் ஏற்றுமதி செய்யப்பட்டுள்ளது. வெளிநாடுகளுக்கான
ஏற்றுமதி அதிகரித்த நிலையில், இந்தியாவில் ஏலக்காய் விளைச்சலில் கடும்
பாதிப்பு ஏற்பட்டுள்ளது. ஏலக்காய்க்கு மவுசு அதிகரித்ததோடு, 'ஆன்-லைன்'
வர்த்தகம் அதன் விலையை மேலும் அதிகரித்துள்ளது. டிசம்பர் முதல் வாரத்தில்
ஏலக்காய் பெரிய ரகம், கிலோ 1,200 ரூபாய்க்கு விற்றது, படிப்படியாக
அதிகரித்து 1,350 ரூபாயாகவும், நடுத்தர ரகம் 1,000 ரூபாயிலிருந்து 1,200
ரூபாயாகவும், சிறிய ரகம் 850 ரூபாயாக இருந்தது 1,100 ரூபாய் வரை விற்பனை
செய்யப்பட்டது. இந்நிலையில்,
தமிழக அரசு வழங்கும் இலவச பொங்கல் பைக்காக, மொத்தமாக ஏலக்காயை கொள்முதல்
செய்ததால், மார்க்கெட்டில் ஏலக்காய்க்கு கடும் தட்டுப்பாடு ஏற்பட்டது.
நேற்று ஒரே நாளில், கிலோவுக்கு 500 ரூபாய் வரை உயர்வு ஏற்பட்டது. கடந்த
வாரம் வரை, முதல் ரக ஏலக்காய் கிலோ 1,350 ரூபாயாக இருந்தது, நேற்று கிலோ
1,850 ரூபாய்க்கும், இரண்டாம் ரகம் 1,650 ரூபாய்க்கும், மூன்றாம் ரகம்
1,525 ரூபாயாக விலை உயர்வடைந்தது.
செவ்வாய்ப்பேட்டை ஏலக்காய் மொத்த வியாபாரி செந்தில்குமார் கூறியதாவது:
இந்தியாவில் அதிக அளவில் ஏலக்காய், கேரள மாநிலத்தில் விளைகிறது.
அதையடுத்து, தமிழகத்தின் குமுளியில் விளைகிறது. நடப்பாண்டில்
வெளிநாடுகளுக்கான ஏற்றுமதி அதிகரித்ததால், உற்பத்தியில் பாதிப்பு
ஏற்பட்டுள்ளது. ஏலக்காய்க்கு கடும் தட்டுப்பாடு நிலவும் நிலையில், தமிழக
அரசு மொத்தமாக அதிக அளவில் ஏலக்காயை கொள்முதல் செய்துள்ளது. இதன் காரணமாக,
ஏலக்காய் விலையில் கிலோவுக்கு நேற்று 500 ரூபாய் வரை திடீர் உயர்வு
ஏற்பட்டது. குமுளி
மார்க்கெட்டில் நேற்று, முதல் தர ஏலக்காய் கிலோ 1,575 ரூபாய்க்கு விற்பனை
செய்யப்பட்டது. இந்த விலையின் மீது மத்திய, மாநில அரசுகளின் வரி,
போக்குவரத்து செலவு சேரும் பட்சத்தில், ஏலக்காய் விலை மொத்த
வியாபாரிகளுக்கு கிலோ 1,700 ரூபாய் வரை வந்து விடுகிறது. மொத்த
வியாபாரிகளிடம் இருந்து சில்லரை வியாபாரிகளுக்கும், அவர்களிடம் இருந்து
கடைக்கு விற்பனைக்கு வருகையில், கிலோ 1,850 முதல் 1,950 ரூபாய் வரை
விற்பனை செய்யப்படுகிறது. இவ்வாறு செந்தில்குமார் கூறினார்.