அ.தி.மு.க.,வில் அடுத்த அதிரடி : மாநில நிர்வாகிகளுக்கு கல்தா

by **mmani** Mon Dec 20, 2010 8:23 am

வரும் 30ம் தேதி கூடுகிறது அ.தி.மு.க., பொதுக்குழு.பொதுக்குழுவில்
கலந்து கொள்ளும் உறுப்பினர்கள் மற்றும் சிறப்பு அழைப்பாளர்களுக்கு
அழைப்பிதழ் கடிதம் அனுப்புவதற்கு அ.தி.மு.க., பொதுச்செயலர் ஜெயலலிதாவின்
ஒப்புதலுக்காக தலைமை அலுவலகத்திலிருந்து அனுப்பி வைக்கப்பட்டுள்ளது. ஆனால்,
அழைப்பிதழ் அனுப்புவதற்கு ஜெயலலிதா நேற்று முன்தினம் வரை ஒப்புதல்
அளிக்கவில்லை.
தாமதத்திற்கு காரணம்...? அவைத்தலைவர் மற்றும் மாநில நிர்வாகிகள்,
மாவட்டச் செயலர்கள் சிலரின் பதவிகள் அதிரடியாக மாற்றப்படவுள்ளன. புதிய
நிர்வாகிகள் அறிவித்த பின், பொதுக்குழு உறுப்பினர்களுக்கு அழைப்பிதழ்
வழங்கப்படும். அழைப்பிதழ் அனுப்ப தாமதம் ஆவதற்கு இதுதான் காரணம் என்கிறது
கட்சி வட்டாரம்.
அவைத் தலைவருக்கு ஆப்பா...?அ.தி.மு.க., அவைத்தலைவர் மதுசூதனன்
மற்றும் அமைப்பு செயலர்கள் சிலரின் பதவியும் பறிபோகவுள்ளது. மதுசூதனன்
பொறுப்பேற்ற பின் நடந்த உள்ளாட்சி தேர்தல், இடைத்தேர்தல்கள், எம்.பி.,
தேர்தலில் அ.தி.மு.க., தொடர்ந்து தோல்வி முகத்தை கண்டு
வருகிறது.சென்டிமென்டாக அவரை மாற்றினால் சட்டசபை தேர்தலில்
அ.தி.மு.க.,வுக்கு ஏறுமுகமாக இருக்கும் என்ற, "கமென்ட்' தொண்டர்கள்
மத்தியில் அடிபடுகிறது. அவருக்கு பதிலாக எம்.ஜி.ஆர்., ஆட்சியில்
அமைச்சர்களாக இருந்த பொன்னையன் அல்லது வரகூர் அருணாசலம், முன்னாள்
சபாநாயகர் பி.எச்.பாண்டியனில் ஒருவர் இடம் பெறலாம்.அதே போல், அமைப்புச்
செயலர் பதவிக்கு ராஜகண்ணப்பன், பொங்கலூர் தாமோதரன், ஆதிதிராவிடர் வகுப்பைச்
சேர்ந்த சந்திரகாசி எம்.எல்.ஏ., கு.ப. கிருஷ்ணன் உள்ளிட்டவர்களின்
பெயர்கள் அடிபடுகின்றன. புதிய அவைத்தலைவர், அமைப்புச் செயலர் நியமனத்துக்கு
செயற்குழு, பொதுக்குழுவில் ஒப்புதல் வழங்கப்படக்கூடும்.
செயற்குழுவில் விடுபட்ட, "மாஜி'க்கள்... : சமீபத்தில் புதிய
செயற்குழு உறுப்பினர்கள் பட்டியலை ஜெயலலிதா அறிவித்துள்ளார். அதில்
முன்னாள் அமைச்சர்கள் சிலரின் பெயர்கள் விடுபட்டுள்ளன. ஜெயலலிதா
அறிவித்துள்ள 66 செயற்குழு உறுப்பினர்களில் சசிகலா மீண்டும் இடம்
பெற்றுள்ளார்.செயற்குழு உறுப்பினர்களில் பாதிக்கு பாதி புதுமுகங்கள் இடம்
பெற்றுள்ளனர். மேலும், மகளிருக்கு முக்கியத்துவம் அளிக்கும் வகையில்,
செயற்குழு உறுப்பினர்கள் அதிக அளவில் இடம் பெற்றுள்ளனர்.
மாவட்ட செயலர் மாறுதல் நிச்சயம்... :சமீபத்தில், வேலூர்,
புதுக்கோட்டை, கன்னியாகுமரி, தஞ்சாவூர், திருச்சி, தூத்துக்குடி உள்ளிட்ட
சில மாவட்டசெயலர்களை ஜெயலலிதா அழைத்து பேசினார். கட்சியில் ஒதுக்கி
வைக்கப்பட்டிருந்த, எம்.ஜி.ஆர்., இளைஞர் அணி மாநில துணை செயலர் சேகர்பாபு
உட்பட சிலரை, கட்சிப் பணியில் தீவிரமாக பணியாற்ற வேண்டும் என, ஜெயலலிதா
உத்தரவிட்டுள்ளார்.அதேபோல், சில மாவட்டச்செயலர்களின் செயல்பாடு
திருப்திகரமாக இல்லாத காரணத்தினால் அவர்களுக்கு மாற்றுப்பதவி அளித்து,
மாவட்ட செயலர்கள் பதவியிலிருந்து விடுவிப்பதற்குரிய காரணங்களையும் ஜெயலலிதா
விளக்கியுள்ளார். இதனால், பொதுக்குழுவுக்கு முன்பாக, மாவட்டச் செயலர்கள்
மாற்றம் நிச்சயம் என்பது அ.தி.மு.க., தலைமைக் கழகத்தில் உலாவும் தகவல்.
எதிர்பார்ப்பு இதுதான்: அ.தி.மு.க., ஆட்சியில் தி.மு.க.,வைச்
சேர்ந்த பல புள்ளிகள் இன்ஜினியரிங் கல்லூரிக்கு அனுமதி பெறுவதிலிருந்து
கான்ட்ராக்ட் உள்ளிட்ட வருமானம் கொழிக்கும் பல்வேறு பணிகளை பெறுவதற்கு
அ.தி.மு.க.,வினரிடம் தி.மு.க.,வினர் மறைமுக தொடர்பு வைத்திருந்தனர். அந்த
தி.மு.க., புள்ளிகளை தி.மு.க., தலைமை களை எடுக்கவில்லை.ஆனால், கல்யாண வீடு,
சடங்கு வீடு, காதுகுத்து வீடு, சாவு வீடுகளில் தி.மு.க.,வினரை சந்தித்து
பேசுவதையெல்லாம், புகாராக ஏற்று கட்சித் தலைமை நடவடிக்கை எடுத்து வருகிறது.
என்னதான் ஆளுங்கட்சியோடு இணக்கமாக இருக்கின்றனர் என்று மாவட்ட நிர்வாகிகள்
மீது புகார் கூறினாலும், தேர்தல் என வந்துவிட்டால் தி.மு.க.,விற்கு
எதிராகத்தான் அவர்கள் பணியாற்றுவர்.தேர்தலில் தி.மு.க.,வுக்கு சாதகமாக
பணியாற்றினால், கட்சியினர் மீது நடவடிக்கை எடுக்கலாம். எனவே நிர்வாகிகள்
மீது எழுப்பப்படும் குற்றச்சாட்டுகளுக்கு தலைமை தீர விசாரித்து நடவடிக்கை
எடுக்க வேண்டும் என்பதே கட்சியினரின் எதிர்பார்ப்பு.