இறையாண்மை காக்க "எல்லையில் சுவாசம்' : இன்னுயிர் தந்தவர்களை நாமும் "நேசிப்போம்'

திண்டுக்கல் : நமது நாட்டின் எல்லையையும் இறையாண்மையையும் பாதுகாத்தல்,
இயற்கை சீற்றம் எந்த நாட்டில் நடந்தாலும் சேவை செய்தல், குடும்பத்தை
பிரிந்து நாட்டு நலனில் மட்டுமே அக்கறை கொண்டு அர்ப்பணித்து கொள்பவர்கள்
தான் நமது ராணுவ வீரர்கள்.
போரிலும், போரை ஒத்த நடவடிக்கையிலும் நமக்காக தன்னுயிரை விடுபவர்கள்,
விழுப்புண் பெறுபவர்கள் இவர்கள்.இறந்த வீரர்களுக்கும் அவர்களை
சார்ந்தோருக்கும் நன்றி பாராட்டும் நாள் தான் டிச.7. இதனை "படைவீரர் கொடி
நாள்' என கடைபிடிக்கிறோம்.
தோன்றிய வரலாறு: முதல் உலகப்போர் 1918 நவ.11ல் முடிவுக்கு வந்தது.
அன்று காலை 11 மணிக்கு "ஆர்மிஸ்டைஸ்' ஒப்பந்தம் கையெழுத்தானது. போர்
முடிந்த 3 மாதங்களுக்கு பின் போரின் போது தோண்டப்பட்ட பதுங்கு குழிகளில்
"பாப்பி' என்ற மலர்ச்செடிகள் பூத்து குலுங்கின. போரில் வீர மரணம் அடைந்த
வீரர்களுக்கு இயற்கை அன்னை மலர் அஞ்சலி செலுத்தியதை உலகத்தோர் உணர்ந்தனர்.
போரில் இறந்தவர்கள் குடும்பத்தினருக்கும் உடல் உறுப்புகளை
இழந்தவர்களுக்கும் உதவிகள் செய்ய பொதுமக்கள் வீதியில் திரண்டனர். பாப்பி
மலர்களை அடையாளமாக தந்து நிதி திரட்டினர். உலகம் முழுவதும் 1919
நவ.11முதல் நினைவு தினமாக அனுஷ்டிக்கப்பட்டது. பல நாடுகள் இதனை "பாப்பி
டே' "ஆர்மிஸ்டைஸ் டே' என அழைத்தன. இங்கிலாந்து இதனை "ரிமம்பரன்ஸ்
டே'என்றும் அமெரிக்கா,"வெட்ரன்ஸ் டே' என்றும் அழைத்தன. ஒவ்வொரு ஆண்டும்
நவ.11ம் தேதி காலை 11 மணி 11 நிமிடங்களுக்கு 2 நிமிடம் அஞ்சலி செலுத்துவது
வழக்கமானது.
இந்தியா: நமது நாடு சுதந்திரத்திற்கு பின் பாதுகாப்பு அமைச்சக
உயர்மட்டக்குழு 1949 செப்.28ல் கூடியது. ஒவ்வொரு ஆண்டும் டிச.7ம் தேதியை
கொடிநாளாக கொண்டாடுவது என்றும், நன்கொடைகளுக்கு மலர் வழங்காமல்
கொடியையும், வாகனங்களுக்காக கொடிகளை வழங்குவது என்றும் முடிவு
செய்யப்பட்டது. அன்று முதல் கொடிநாள் கொண்டாடப்படுகிறது. எல்லையில்
நமக்காக இன்னுயிர் தந்தவர்களுக்கு நம்மால் முடிந்தளவு நிதி தரும் வாய்ப்பு
இது. மாணவர் முதல் அனைவரும் இத்தொகையை வழங்கி நமது நன்றியை
வெளிப்படுத்தலாம்.
திண்டுக்கல் மாவட்ட முன்னாள் படைவீரர் நலத்துறை உதவி இயக்குனர் போனி
வின்சென்ட் கூறுகையில்,""நாடு முழுவதும் வசூலிக்கும் இத்தொகை, போரில்
இறந்த முன்னாள் படை வீரர் குடும்பத்திற்கும், காயமடைந்த வீரர்களுக்கும்
வழங்கப்படும். பள்ளிகளில் ஒரு கொடிக்கு ரூ. 3ம், வட்டார போக்குவரத்து
அலுவலகத்தில் ரூ. 60ம் வசூலிக்கப்படுகிறது. இத்தொகை கலெக்டர் மூலம்
முன்னாள் படைவீரர் நலத்துறைக்கு அனுப்பி வைக்கப்படுகிறது. ஆண்டுமுழுவதும்
இத்தொகை வழங்கலாம்,'' என்றார்.
மலரும் நினைவு: இரண்டாம் உலகபோரில் பங்கேற்ற திண்டுக்கல் அருகே
உள்ள பஞ்சம்பட்டியை சேர்ந்த ரெவரென்ஸ்(87) கூறுகையில்,""இரண்டாம் உலக
போரில் பங்கேற்க இந்தியாவில் இருந்து சென்ற படையில் இருந்தது தனி அனுபவம்.
1942 முதல் 1947 வரை என்னை போன்ற பலர் ராணுவ முகாமில் இருந்தோம்.
முகாமிற்கு வந்த மகாத்மா காந்தி, "சுதந்திரத்திற்காக போராடிய என்னை போல
பலரை ஆங்கிலேயர் தாக்கினர். இருந்தாலும் இரண்டாம் உலக போருக்கு பின்
சுதந்திரம் நமக்கு கிடைக்கும்,'என ஊக்கம் தந்தார். ராணுவ வீரர்கள் நலனை
கருத்தில் கொண்டு கொடி நாளிற்காக அனைவரும் நிதி தர வேண்டும்,'' என்றார்.