ஆதாரங்களால் கிழிந்த ராஜபக்ச முகத்திரை

‘பயங்கரவாதத்திற்கு எதிரான போர்’ என்ற பெயரில் தங்கள் மீது தொடுக்கப்பட்ட போரில் ஒன்றரை இலட்சம் தமிழர்கள் கொல்லப்பட்டது இனப் படுகொலைப் போரே என்பதை ஈழத் தமிழர்களும், அவர்களின் தமிழ்நாட்டு்த் தொப்புள் கொடி உறவுகளும் மட்டுமே அறிந்திருந்த உண்மை, சேனல் 4 இணையத்தளம் வெளியிட்ட வீடியோவாலும், விக்கிலீக்ஸ் இணையத் தளம் வெளியிட்ட கொழும்புவிற்கான அமெரிக்கத் தூதரின் தகவல் பரிமாற்றத்தாலும் உலக மக்கள் மத்தியில் உறுதியாகியுள்ளது.

சேனல் 4 வெளியிட்ட வீடியோ காட்சிகள் மானுடத்தின் மனசாட்சியை உலுக்கியுள்ளது. தங்களிடம் சரணடைந்த, நிராயுதபாணியான தமிழ் இளைஞர்களை கண்ணைக் கட்டி, காலால் உதைத்து சுட்டுக் கொன்றதும், தமிழ்ப் பெண்களை கற்பழித்து, சுட்டுக் கொன்று, அவர்களின் ஆடைகளை விலக்கி வைத்து கேவலமான வார்த்தைகளைக் கூறி இழிவுபடுத்திய காட்சியும் சிங்கள அரசின், அதன் இராணுவத்தின் இனவெறி முகத்தை பட்டவர்த்தனமாக மானுடத்தின் முன்னால் படம் பிடித்துக் காட்டிவிட்டது.

சிங்கள பெளத்த இனவெறி அரசான சிறிலங்கா, தமிழர்களுக்கு எதிராகக் கட்டவிழ்த்துவிட்ட இனப் படுகொலைப் போர் தடையின்றி நடத்தப்பட்டபோதே, தங்களுக்கு எதிராக இழைக்கப்படும் கொடுமையை, ஒவ்வொரு நாளும் வீடியோக்களை வெளியிட்டு பறைசாற்றியபோது, உலக நாடுகளின் ஊடகங்களும், அரசுகளும் கண்களைத் திறந்து பார்த்திருந்தால், முள்ளிவாய்க்காலிலும், வட்டுவாகலிலும் இறுதிக் கட்டப்போரில் ஐம்பதாயிரம் அப்பாவித் தமிழர்கள் கொல்லப்பட்டிருப்பார்களா? வெளியிடப்பட்ட வீடியோ காட்சிகளைக் கண்டு அதிரும் உலகம், அந்த நாளை நினைத்துப் பார்க்க வேண்டும்.

ராஜபக்ச அரசும், அதன் இனப் படுகொலைத் திட்டத்திற்குத் துணைபோன தெற்காசிய வல்லரசுகளும் ஒன்று சேர்ந்து கட்டிவிட்ட கதைகளை நம்பி வாளாயிருந்ததன் விளைவு, பல பத்தாயிரக்கணக்கில் அப்பாவிகள் கொல்லப்பட்டுள்ளார்கள் என்று பின்னாளில் ஐ.நா.மனித உரிமை ஆணையர் புலம்ப வேண்டிய நிலை ஏற்பட்டது.

தனது நாட்டோடு பொய்யுரைத்தலை மகிந்த ராஜபக்ச நிறுத்திக்கொள்ளவில்லை, இன்றும் தொடர்ந்துள்ளார். அதுதான் தி டைம்ஸ் நாளிதழின் ஜேம்ஸ் ஹார்டிங், பென் மாசின்டைர் ஆகியோருக்கு அளித்த பேட்டியாகும். அதில் ராஜபக்ச துணிந்து கூறியுள்ள பொய்யுரை மிகவும் கவனிக்கத்தக்கதாகும்.

“பெரும்பாலான பொதுமக்களைக் கொன்றது விடுதலைப் புலிகள்தான். அந்த பயங்கரவாதிகள் அவர்களை பாதுகாப்பு கவசங்களாக பயன்படுத்தினார்கள். அரசின் கட்டுப்பாட்டுப் பகுதிக்கு செல்ல முயன்றவர்களை அவர்கள் கொன்றார்கள்” என்று இன்றைக்கும் கதை கட்டிவிடுகிறார்.

பெரும்பாலான பொதுமக்களை கொன்றது விடுதலைப் புலிகள்தான் என்பது உண்மையானால், பன்னாட்டு விசாரணைக்கு ஒப்புக்கொள்ள வேண்டியதுதானே? எதற்கு ஐ.நா.விசாரணை குழு அமைப்பது எங்களது இறையாண்மையில் தலையிடுவது என்று கூறிக்கொண்டு பதுங்க வேண்டும்?

சிறிலங்க அரசின் முப்படைகளின் தலைவராக மகிந்த ராஜபக்ச உள்ளார். அவருடைய படையினர் எந்த அளவிற்கு ‘யுத்த தர்ம’த்தைக் கடைபிடித்தனர் என்பதைத்தானே சேனல் 4 வெளியிட்ட வீடியோ காட்டுகிறது? இதிலிருந்து சிறிலங்க படையினர் இனவெறியுடன்தான் நடந்துகொண்டார்கள் என்பது புரியவில்லையா?. அதனால்தானே, போரில் நடந்த குற்றங்கள் அனைத்திற்கும் ராஜபக்சவும், அவருடைய சகோதரர்களும், இராணுவத் தளபதி சரத் பொன்சேகாவும் காரணம் என்று இலங்கைக்கான அமெரிக்கத் தூதர் பாட்ரிசியா பியூடானிஸ் அனுப்பிய இரகசிய அறிக்கை கூறுகிறது?



விடுதலைப் புலிகள் தமிழ் மக்களை கேடயமாகப் பயன்படுத்தினார்களா? எப்படி அது சாத்தியம்? தமிழர்களை அழித்தொழிக்கும் இனப் படுகொலைப் போரைத்தான் ராஜபக்ச மட்டுமின்றி, அவருக்கு முன்பிருந்த சந்திரிகா குமாரதுங்காவில் இருந்து ஜூலியஸ் ரிச்சர்ட் ஜெயவர்த்தனேவரை நடத்தியுள்ளனர். என்றைக்கு அவர்கள் தமிழர்களை தங்கள் நாட்டவராக நினைத்துள்ளனர், மதித்துள்ளனர்? கொழும்புவில் 3,000 தமிழர்களை கொன்றனரே, சிறிலங்க காவல்துறையும், இராணுவமும் தடுத்து நிறுத்தினவா? வேடிக்கை பார்த்தனவா? விவரமறியாதவர்களுக்கு காது குத்துவதில் கைதேர்ந்தவர் ராஜபக்ச.

சிறிலங்க இராணுவத்தின் கட்டுப்பாட்டுப் பகுதிக்கு போகாமல் விடுதலைப் புலிகள் தடுத்ததார்கள் என்றால், அது சரிதானே? உங்கள் கட்டுப்பாட்டுப் பகுதியில் நடந்ததைத்தானே அந்த வீடியோ காட்சி காட்டுகிறது? உலகத்தை முட்டாள் என நினைத்து்ப பேசியிருக்கிறார்.

“சிறிலங்க பொது மக்களை ஒருபோதும் கொன்றதில்லை” என்று கூறியுள்ளார் ராஜபக்ச. தி டைம்ஸ் தன்னை பேட்டியெடுப்பவர்கள் தமிழ்நாட்டின் தலைநகரில் இருந்து ஆங்கில பத்திரிக்கை நடத்திக்கொண்டிருக்கும் சிறிலங்க ரத்னா பட்டம் பெற்ற பத்திரிக்கை ஆசிரியர் என்று நினைத்து பேசியிருப்பாரோ?

“இது மனிதாபிமான நடவடிக்கை. பொது மக்களை நீங்கள் தொடக்கூடாது” என்று சிறிலங்க இராணுவத்தினரிடம் இவர் கூறியிருந்தாராம்! இதன் மூலம் உலகத்திற்கு ராஜபக்ச தெரிவிக்கும் செய்தி இதுதான்: ‘நாங்கள் கொன்றது எல்லாம், அவர்கள் எத்தனை ஆயிரம் அல்லது இலட்சம் பேராக இருந்தாலும் சரி, அவர்கள் யாவரும் விடுதலைப் புலிகளே’. இவ்வளவு தெளிவாக ‘உண்மை’யை அறிந்து வைத்திருப்பவர், பிறகு சுதந்திரமான பன்னாட்டு விசாரணைக்கு அஞ்சுவது ஏன்?

இப்படியெல்லாம் பேட்டி கொடுத்த பிறகு, தி டைம்ஸ் பத்திரிக்கையாளர்கள் புறப்பட்ட சிறிது நேரத்திலேயே, அவர்களை மீண்டும் ராஜபக்ச அழைத்துள்ளார். அப்போதுதான் ஆக்ஸஃபோர்டில் அவர் உரையாற்றல் நிகழ்ச்சி இரத்து செய்யப்பட்ட செய்தி வந்துள்ளது. “ராஜபக்ச கோபமாகவும், அதே நேரத்தில் இடி விழுந்ததுபோலவும் காட்சியளித்தார் என்று அந்த பத்தரிக்கையாளர்கள் வர்ணிக்கிறார்கள்.

தமிழர்களின் போராட்டத்தைக் கண்டு பயந்தே ஆக்ஸ்ஃபோ்ட் யூனியன் தலைவர், “எதற்காக லண்டன் பயணத்தை மேற்கொண்டேனோ, அந்த நிகழ்ச்சியை இரத்து செய்துவிட்டதாக” ராஜபக்ச கூறியுள்ளார்.

பூசியத்திற்குக் கீழே, 10 டிகிரிக்கும் குறைவான குளிர் காலத்தில், பனிப்பொழிந்துக் கொண்டிருந்த நிலையில் பல்லாயிரக்கணக்கான தமிழர்கள் வீதிக்கு வந்த நடத்திய நியாயப் போராட்டம், தன்னை மகத்தான தலைவனாக காட்டிக்கொள்ள ஒரு இனப் படுகொலையாளன் எதிர்பார்ந்திருந்த நிகழ்ச்சியை இரத்து செய்துவிட்டது.

10 மில்லியன் பவுண்ட் செலவில் தன்னையும், சிறிலங்க அரசையும் பெருமைப்படுத்தும் விளம்பர வேலைகளைச் செய்து, கைதிற்கு எதிரான பாதுகாப்பை உறுதி செய்துகொண்டு, பிரச்சாரத்தின் மூலம் உலகின் கண்களை மறைத்துவிடலாம் என்கிற மமதையுடன் வந்த ராஜபக்சவின் திட்டத்தை, தங்கள் இனத்தை அழித்தவனை பேச விடாமல் தடுக்க நடந்த தமிழர்களின் போராட்டம் முறியடித்துவிட்டது.

சேனல் 4 வெளியிட்ட வீடியோ ஆதாரம், விக்கிலீக்ஸ் வெளிப்படுத்திய இரகசிய தகவல் பரிமாற்ற ஆவணம், தமிழர்களின் உறுதியான போராட்டம் ஆகிய அனைத்தும், மானுடத்திற்கு எதிரான மற்றுமொரு எதிரியின் முகத் திரையை முழுமையாக கிழித்துவிட்டது.



நன்றி: வெப் டுனியா

உடனுக்குடன் நம் உடன்பிறப்புகளின் செய்திகளை வெளியிடுவது வலிக்கு ஒத்தடம் கொடுப்பது போல் உள்ளது.நன்றி.
மூக்குடைபட்டு திரும்பிய ராஜபக்சே, துப்பாக்கி முனையில் கிளிநொச்சியில் புலிகளுக்கு எதிராக ஊர்வலம் நடத்தி தனக்கு தமிழ் மக்களின் ஆதரவு இருப்பதாக காட்ட முயற்சித்துள்ளார்.
படங்களுடன் தமிழ் நெட்டில் செய்தி.
http://www.tamilnet.com/art.html?catid=79&artid=33166