இலங்கை போர்க்குற்றங்களுக்கு ராஜபக்ஷே காரணம் : அதிர்ச்சி தகவல்

வாஷிங்டன் : "இலங்கையில் நடந்த இறுதிக் கட்ட போரில் தமிழர்கள் கொல்லப்பட்ட விவகாரத்தில் அதிபர் ராஜபக்ஷே, அவரது சகோதரர்கள் மற்றும் முன்னாள் ராணுவ தளபதி சரத் பொன்சேகா ஆகியோருக்கு பொறுப்பு உள்ளது' என அமெரிக்க தூதர் கூறியதை, "விக்கி லீக்ஸ்' இணையதளம் அம்பலப்படுத்தியுள்ளது.

அமெரிக்கா உள்ளிட்ட பல நாடுகளின் ரகசிய நடவடிக்கைகளை, "விக்கி லீக்ஸ்' இணையதளம், கடந்த சில நாட்களாக அம்பலப்படுத்தி வருகிறது. அமெரிக்கா உள்ளிட்ட நாடுகளின் தூதர்கள், அமைச்சர்கள் பேசிய ரகசியங்களை ஆதாரத்துடன் அந்த இணையதளம் வெளியிடுகிறது. விக்கி லீக்சின் இந்த அதிரடி நடவடிக்கை, சர்வதேச அளவில் அதிர்வு அலைகளை ஏற்படுத்தியுள்ளது. இந்நிலையில், இலங்கை விவகாரம் தொடர்பான முக்கிய தகவல்களையும் அந்த இணையதளம் தற்போது வெளிச்சத்துக்கு கொண்டு வந்துள்ளது. இலங்கைக்கான அமெரிக்க தூதர் பாட்ரிகா ஏ புடின், அமெரிக்க வெளியுறவுத் துறைக்கு கடந்த ஜனவரி 15ம் தேதி அனுப்பிய ரகசிய தகவலை, "விக்கி லீக்ஸ்' இணையதளம் வெளியிட்டுள்ளது. இலங்கையில் அதிபர் தேர்தல் நடப்பதற்கு சில நாட்களுக்கு முன்னதாக இந்த தகவல், அமெரிக்க தூதரால் அமெரிக்காவுக்கு அனுப்பி வைக்கப்பட்டது. இலங்கையில் நடந்த இறுதிக் கட்ட போர் குறித்தும், அதிபர் தேர்தல் நிலவரம் குறித்தும் எழுதப்பட்டுள்ளது.

அதில் கூறப்பட்டுள்ளதாவது: இலங்கையில் நடந்த இறுதிக் கட்ட போரில் ஏராளமான தமிழர்கள் கொல்லப்பட்டனர். இதில், அதிபர் ராஜபக்ஷே, அவரது சகோதரர்கள் மற்றும் ராணுவ தளபதி சரத் பொன்சேகா ஆகியோருக்கு தொடர்பு உள்ளது. இவர்கள் போர்க்குற்றம் செய்துள்ளனர். போரின் போது நடந்த அத்துமீறல்கள் குறித்து விசாரிப்பதற்காக, அரசு தானாகவே சொந்தமாக ஒரு விசாரணை கமிஷனை அமைத்துள்ளது. ஒரு அரசு, தான் பதவியில் இருக்கும்போதே, போர்க்குற்றத்தில் ஈடுபட்டது தொடர்பாக, தனது படை வீரர்கள் மற்றும் உயரதிகாரிகள் மீது, தானாகவே விசாரணை நடத்துவது என்பதை, வேறு எங்கும் இதுவரை கண்டது இல்லை. கொழும்பில் என்னிடம் பேசிய தமிழ் அரசியல்வாதிகள், இந்த விஷயத்தை மேலும் தீவிரப்படுத்துவதற்கான நேரம் இதுவல்ல என கூறினர்.

தமிழ் தேசிய கூட்டணியைச் சேர்ந்த எம்.பி., சிவாஜிலிங்கம், அதிபர் தேர்தலில் தனித்து போட்டியிடுகிறார். அரசும், எதிர்க்கட்சிகளும், தமிழர் பிரச்னைக்கு தீர்வு காண்பதற்கு போதிய முயற்சி எடுக்கவில்லை என கூறி, அவர் பிரசாரம் செய்து வருகிறார். மேலும், அவர் அதிகாரத்தை பரவலாக்கும் ஒரு அமைப்பை உருவாக்க வேண்டும் என்று வலியுறுத்தி வருகிறார். சிங்கள மக்கள் வசிக்கும் பகுதிக்கும், தமிழர்கள் வசிக்கும் பகுதிக்கும் தனித்தனி பிரதமர்களை நியமிக்க வேண்டும் என்றும் அவர் கூறுகிறார். இறுதிக் கட்ட போரில் தமிழர்கள் கொல்லப்பட்டது குறித்து, சர்வதேச அளவிலான ஒரு விசாரணைக்கு உத்தரவிட வேண்டும் என்றும் அவர் கூறுகிறார். இவ்வாறு அமெரிக்க தூதர், தான் அனுப்பிய ரகசிய தகவில் கூறியதாக, "விக்கி லீக்ஸ்' இணையதளம் கூறியுள்ளது.

பாக்., ராணுவம் பிடிவாதம்: பாகிஸ்தான் - இந்தியா தொடர்பான விவகாரங்களையும் விக்கி லீக்ஸ் இணையதளம் வெளியிட்டுள்ளது. அதில், மும்பை தாக்குதல் சம்பவத்துக்கு பின், பிரிட்டன் வெளியுறவு அமைச்சர் டேவிட் மிலிபாண்ட், பாகிஸ்தான் அதிபர் சர்தாரியை தொடர்பு கொண்டு பேசினார். அப்போது, மும்பை தாக்குதல் விசாரணைக்காக, பாக்., உளவு அமைப்பான ஐ.எஸ்.ஐ., தலைவர் பாஷாவை, இந்தியாவுக்கு அனுப்பி வைக்கும்படி கேட்டுக் கொண்டார். இதற்கு சர்தாரியும் சம்மதித்தார். ஆனால், பாக்., ராணுவம் இதை ஏற்க மறுத்துவிட்டது. இவ்வாறு இணையதளம் தகவல் வெளியிட்டுள்ளது.