ஒரு சின்ன மரணம் தான் யாரும் பயப்படாதீங்க..

by **மாலதி** Wed Nov 24, 2010 5:03 pm

ஒரு சின்ன மரணம் தான் யாரும் பயப்படாதீங்க..

1
எத்தனைமுறை அழைத்தாலும்
என்ன தான் எழுதினாலும்

எழுதிக் கொண்டே இருக்கிறது

அம்மா பற்றி மனசு!
-----------------------------------------------------------------------------------

2
எனக்கொரு எழுதுகோலும்,
சில தாள்களும்,
மூன்று வேலையின் ஒன்றில்; ஒரு கிண்ணம் சோறும்,
அவ்வப்பொழுது குவளை தேநீரும் கொடுத்துவிட்டு -
வாழ்தலின் மீதமான -
அத்தனையையும் எடுத்துக் கொள் உலகினமே;

அந்த வாழ்தலில்
உனக்காகவும் பேசப் பட்டிருக்கிறோம்!
---------------------------------------------------------------------

3
என் தாத்தா பாட்டி சிரித்த சிரிப்பு
என் தம்பிகள் தங்கைகள் வளர்ந்த வளர்ப்பு
ஒரு புகைப்படமாக மட்டுமேனும்
மாட்டி வைக்கப் பட்டுதான் இருக்கிறது;
கூட்டு குடும்பத்தில்!
---------------------------------------------------------------------

4
நேரில் இன்னும் அவர் இருப்பதாகவே
பொய் சொல்கின்றன சிலரின் மரணங்கள்;

சிலரின் மரணத்தை நம்புவதும்
ஏற்றுக் கொள்வதுமே இல்லை மனசு;

வேண்டுமெனில்
அழுபவரை பார்த்து
ஆறுதல் சொல்லிக் கொள்ளளாம் என்றாலும்
அவைகளை கடந்தும் வலிக்கிறது மனசு -
வாழ்தலின் கட்டாயத்தில்;

மரணமாயிற்றே!!! வேறென்ன செய்ய????!!

எழுதியும்; தீர மறுக்கிறதே; மரணம்!!
---------------------------------------------------------------------

5
இறந்தும் வாழ்வதாய்
நம்மோடு இருப்பதாய்
அவர் புகழ் நிலைப்பதாய்
ஆயிரம் சொல்லிக் கொள்ளளாம்,

மீண்டும்
பார்க்க தொட பேச
அருகாமை கொள்ள;
ஏன், தூரத்தில் கூட 'இல்லையே' என்ற உண்மையை
யாரால் மாற்றிட இயலும்?

எப்படியோ
இறந்தவர் உயிரோடில்லை என்ற
ஒற்றை சொல்லிலிருந்து
வலுக் கொள்ளும்; மரணத்தின் கொடுமையை
அழுகையை; யாராலும் அகற்ற முடிவதில்லை!!
--------------------------------------------------------------------------------------

6
கவிதை
கண்ணீர்
உறவுகளின் ஆறுதல்
எல்லாம் தோற்கிறது மரணத்திடம்,

இறப்பதை விட
இறந்தவரோடு இருப்பது
வெகு கடினம்!
--------------------------------------------------------------------------------------

7
நம்பவே முடியவில்லை சிலரின்
மரணத்தை,

யார் யார்..? என்று..? எங்கெங்கோ............?!!!!!!!!

ஒன்றுமே உறுதியில்லை, என்பதும்
நினைவில் இருந்தே தொலைவதில்லை,

மரணம் மட்டும்
தவறாமல் நிகழ்ந்து விடுகிறது -
அது நினைக்கும் நாளில்!!
--------------------------------------------------------------------------------------

8
விழுந்து விழுந்து அழுகிறேன்
இதற்கு முன்
இறந்தவர்கள் கூட
கண்ணீரில் சொட்டுகிறார்கள்,

பார்ப்பவர்களுக்கு -
'நம் அழுகையின் சப்தம் மட்டும் -
இறந்தவருக்காக
அழுவதாக காட்டிக் கொண்டாலும்

உள்ளே' -
இறந்த எல்லோரையுமே நினைத்தும் தான்
அழுகிறது மனசு!
------------------------------------------------------------------------------

9
விழுந்து விழுந்து
கத்தியழு
மறக்கிறதா பார் மரணம்;
மறக்காது,
நிற்கிறதா பார் அழுகை
நிற்காது,
புரிகிறதா பிறப்பு இறப்பும்
புரியாது,

அதனாலென்ன வாழ்ந்ததாய்
சொல்லிக் கொள்;
மரணம் நீ இறந்ததாய்
குறித்துக் கொள்ளும்!
--------------------------------------------------------------------------------------

10
மரணமென்ன
அப்பேர்பட்டதா என்று தான்
எண்ணம்;
ஆனாலும் தடுக்க முடியவில்லை
மரணத்தை,
படக்கென பிடுங்கிக் கொண்டதில்
மாலைகளாகக் குவிந்து
கண்ணீராக நனைந்ததில் -
மரணம் என்னை நீ - நாளைக்கென்று
குறித்துக் கொண்டிருக்கலாம்,
யார் கண்டா; இன்றைக்கே கூட...இருக்கலாம்!!
--------------------------------------------------------------------------------------
வித்யாசாகர்