விடுவிக்கபட்ட போராளிகள் இராணுவ முகாமில் கையெழுத்திடவேண்டும் என வற்புறுத்து

by **மாலதி** Wed Nov 10, 2010 4:13 pm

புதன்கிழமை, நவம்பர் 10, 2010

தம்மை விடுவித்த போதும் வீட்டிற்கு சென்றவுடன் ஒரு கிழமைக்குள் அந்த பகுதி இராணுவ முகாமிலும் கூடவே சிவில் நிர்வாக அலுவலகத்திலும் பதிவுகளை மேற்கொள்ளவேண்டும் எனவும் வற்புறுத்தப்பட்டுள்ளனர்.

இதனிடையே விடுவிக்கப்பட்ட விடுதலைப் புலிகள் அமைப்பின் போராளிகளின் சுதந்திரமான நடமாட்டம் தொடர்பில் அமைச்சர்களும், அதிகாரிகளும் வெவ்வேறான கருத்துக்களைத் தெரிவிக்கின்றனர்.

முன்னாள் போராளிகளை சமூகத்தில் எவ்வாறு இணைத்துக் கொள்வது என்பது தொடர்பில் பொதுமக்களுக்கும் அரச அதிகாரிகளுக்கு மதத் தலைவர்களுக்கும் இராணுவம் பாடம் நடத்தி வருகையில் இந்த முரண்பாடு வெளிவந்துள்ளது. மட்டுமன்றி விடுவிக்கப்படும் போராளிகளும் இது தொடர்பில் கருத்து தெரிவித்துள்ளனர். விடுதலை செய்யப்படும் முன்னாள் போராளிகள் விடுவிக்கப் பட்ட பின்னர் சமூகத்தில் சுதந்திரமாக வாழ முடியும் என்றும் இவர்களுக்கு எவரும் இடையூறு விளைவிக்க முடியாது என்றும் சிறைச்சாலைகள் மறுசீரமைப்பு மற்றும் புனர்வாழ்வு அமைச்சர் டியூ குணசேகர தெரிவித்துள்ளார்.

ஆனால், யாழ். நகரில் விடுவிக்கப்பட்ட முன்னாள் போராளிகள் நாளாந்தம் அல்லது வாராந்தம் அச்செழு, ஊரெழு இராணுவ முகாம்களில் கைச்சாத்திடவேண்டும் என இராணுவத்தினர் வற்புறுத்துகின்றனர் என புனர்வாழ்வளிக்கப்பட்ட முன்னாள் போராளிகளின் பெற்றோர்கள், உறவினர்கள் விசனம் தெரிவிக்கின்றனர்.

இந்நிலையில் இது தொடர்பாக புனர்வாழ்வு ஆணையாளர் பிரிகேடியர் சுசந்த ரணசிங்கவிடம் தொடர்புகொண்டு கேட்டபோது, புனர்வாழ்வளிக்கப்பட்டவர்கள் இரண்டு அல்லது மூன்று மாதங்களுக்கு இராணுவ முகாமில் கைச்சாத்திடவேண்டும். இது அவர்களின் நலன் கருதியே மேற்கொள்ளப்படுகின்றது. இறுதிக்கட்ட யுத்தத்தின்போது சரணடைந்த மற்றும் கைதுசெய்யப்பட்ட முன்னாள் போராளிகளுக்கு உரிய முறையில் புனர்வாழ்வளித்து அவர்களை விடுவித்தோம். எனினும், சமூகத்தில் அவர்களுக்குப் பிரச்சினைகள் இருக்கின்றன. அவர்களின் பாதுகாப்பை உறுதிப்படுத்திக்கொள்வதற்காகவே இந்நடவடிக்கை மேற்கொள்ளப்படுகின்றது. என இராணுவத்தினர் நொண்டிசாட்டை கூறுகின்ரனர்.

இரண்டு அல்லது மூன்று மாதங்களின் பின்னர் இந்நடவடிக்கை படிப்படியாகக் குறைக்கப்படும். எனினும், முன்னாள் போராளிகளுக்குத் தொழில்வாய்ப்பு எதுவும் கிட்டினால் பொலிஸ் சான்றிதழ் ஒன்றை பெற்றுக்கொண்டு அவர்கள் தொழிலுக்குச் செல்லமுடியும். இந்தப் பொலிஸ் சான்றிதழும் அவர்களின் பாதுகாப்புக் கருதியே வழங்கப்படும். இவ்வாறு படைத்தரப்பு கூறபப்டுகின்றது. ஆனால் போராளிகளைப்பொறுத்தவரை அவர்கள் நான்குமாதமாகியும் கையெழுத்து போடுவதற்காக அழைக்கபடுகின்றனர்.

இதில் பெண்போராளிகள் கையெழுத்து வைக்க செல்லும் போது சீண்டும் சம்பவமும் நடக்கின்றது. திருமணமான பெண்களும் விதிவிலக்கல்ல.

அதேவேளை, முன்னாள் போராளிகளை விடுவிக்கும்போதெல்லாம் அவர்கள் சமூகத்தில் இனி எதுவித தடையுமின்றி வாழலாம். அவர்களுக்கு எவரும் நிபந்தனைகளை விதிக்க முடியாது. அவ்வாறு விதித்தால் சட்ட நடவடிக்கை எடுக்கப்படும் என நீங்கள் தெரிவித்தீர்கள். எனினும், தற்போது முகாம்களில் அவர்கள் கைச்சாத்திடவேண்டும் என்று நிபந்தனை போடுகின்றீர்களே என்று சிறைச்சாலைகள் மறுசீரமைப்பு மற்றும் புனர்வாழ்வு அமைச்சர் டியூ.குணசேகரவிடம் கேட்டபோது, இவ்வாறானதொரு நடவடிக்கை இடம்பெறவில்லை. அது குறித்து இன்னும் எனக்கு எவரும் அறிவிக்கவில்லை. அவ்வாறு இடம்பெற்றால் அது குறித்து கவனம் செலுத்தப்படும்என்றார்.