பீகார் தேர்தலில் அனல் அதிகம்: ராகுல் மீது நிதிஷ் பாய்ச்சல்

பாட்னா : பீகாரில் நான்கு கட்ட தேர்தல் நடந்து
முடிந்துள்ள நிலையில், மீதமுள்ள இரண்டு கட்ட தேர்தல் பிரசாரத்தில் அனல்
பறக்கிறது. அரசியல் கட்சி தலைவர்களுக்கு இடையே வார்த்தைப் போர்
கடுமையாகியுள்ளது. "காங்., பொதுச் செயலர் ராகுல், பிரதமராவதற்கு முன்,
ஏதாவது ஒரு மாநிலத்தின் முதல்வராக இருந்து, நிர்வாகம் என்றால் என்ன என்பதை
முதலில் தெரிந்து கொள்ளட்டும்' என, பீகார் முதல்வர் நிதிஷ் குமார்
காட்டமாக பேசியுள்ளார்.
பீகார் சட்டசபைக்கான நான்கு கட்ட தேர்தல்கள் நேற்றுடன் முடிந்து
விட்டன. மீதமுள்ள இரண்டு கட்ட தேர்தலுக்கான பிரசாரம் உச்சக் கட்டத்தை
அடைந்துள்ளது. முக்கிய அரசியல் கட்சிகளின் தலைவர்கள், தொகுதிகளை
முற்றுகையிட்டு பிரசாரம் செய்து வருகின்றனர். தலைவர்களுக்கு இடையே
வார்த்தைப் போரும் வெடித்துள்ளது. இந்நிலையில், பக்தியார்பூர் தொகுதியில்
அமைக்கப்பட்டிருந்த ஓட்டுச் சாவடியில், முதல்வர் நிதிஷ் குமார் நேற்று
ஓட்டளித்தார்.
இதன்பின் செய்தியாளர்களிடம் அவர் கூறியதாவது:பீகாரில் வளர்ச்சி
திட்டங்களை முறையாக செயல்படுத்தவில்லை என, காங்., பொதுச் செயலர் ராகுல்
கடுமையாக விமர்சித்துள்ளார். முதலில் அவர், ஏதாவது ஒரு மாநில முதல்வராக
பொறுப்பேற்கட்டும். மாநிலத்தின் நிர்வாக பணி என்றால் என்ன என்பதை அவர்
முதலில் தெரிந்து கொள்ளட்டும். அதற்கு பின், அவர் பிரதமர் பதவிக்கு
ஆசைப்படட்டும்.எங்களைப் பற்றிய ராகுலின் விமர்சனங்களை, நாங்கள் ஒருபோதும்
பொருட்படுத்துவது இல்லை. எங்களுக்கு எதிராக ஊழல் குற்றச்சாட்டுகளை
காங்கிரஸ் கட்சியினர் கூறி வருகின்றனர். ஊழலின் ஊற்றுக் கண், காங்கிரஸ்
தான். போபர்ஸ் ஆயுத பேரம், காமன்வெல்த் முறைகேடு, ஸ்பெக்ட்ரம், ஆதர்ஷ்
கூட்டுறவு வீட்டு வசதி சங்கம் என, இன்றயை தேதி வரை, காங்கிரசின் ஊழல்
பட்டியல் தொடர்கிறது.அவர்கள் எங்கள் மீது புகார் கூறுவது ஆச்சர்யம்
அளிக்கிறது. பீகாரில் வளர்ச்சிப் பணிகள் முறையாக மேற்கொள்ளப்படாததால்,
ஏராளமான மக்கள் வேறு மாநிலங்களுக்கு குடிபெயர்வதாக காங்கிரஸ் தலைவர்கள்
கூறி வருகின்றனர். பீகார் மாநிலத்தை காங்கிரஸ் 40 ஆண்டுகள் ஆட்சி
புரிந்துள்ளது.
அப்போது தான், ஏராளமான மக்கள் குடிபெயர்ந்தனர்.தற்போது எங்கள் அரசு
மேற்கொண்ட நடவடிக்கையால், இடம் பெயர்வது குறைந்துள்ளது. தங்களது 40 ஆண்டு
ஆட்சியில், மக்கள் இடம் பெயர்வதை தடுக்க, காங்கிரஸ் எந்த நடவடிக்கையும்
எடுக்கவில்லை.லாலு மீது புகார்: லாலு பிரசாத் யாதவ், எப்போதுமே குற்றச்
செயல்களில் ஈடுபடும் வழக்கம் உடையவர். சட்ட திட்டங்களையும்,
விதிமுறைகளையும் அவர் மதிப்பது இல்லை. சட்டத்தை மீறுவதன் மூலம், மகிழ்ச்சி
அடைபவர் அவர்.இந்த விஷயத்தில் அவர் ஒருபோதும் முன்னேற மாட்டார். பீகார்
மாநிலத்தை ஆட்சி செய்வதற்கு அவர், 20 ஆண்டு ஒப்பந்தம் செய்துள்ளார். அந்த
ஒப்பந்தம் முடிந்து விட்டது. ஒருபோதும் அவர் மீண்டும் ஆட்சிக்கு வர
முடியாது.எனது ஆட்சி காலத்தில் மாநிலத்தில் ஏராளமான வளர்ச்சி திட்டங்கள்
செயல்படுத்தப்பட்டுள்ளன. இந்த திட்டங்களை நிறைவேற்றி முடிப்பதற்கு
மீண்டும் எங்களுக்கு வாய்ப்பு தேவை.இவ்வாறு நிதிஷ் குமார் கூறினார்.
இதற்கிடையே, "விதிமுறைகளை மீறி, ஓட்டுச் சாவடிகளுக்கு அருகே,
செய்தியாளர்களுக்கு பேட்டியளித்த முதல்வர் நிதிஷ் குமார், துணை முதல்வர்
சுஷில் குமார் மோடி ஆகியோர் மீது கடும் நடவடிக்கை எடுக்க வேண்டும்' என,
காங்கிரஸ் சார்பில், தேர்தல் கமிஷனிடம் வலியுறுத்தப்பட்டுள்ளது.
லாலு மீது வழக்கு பதிவு : நேற்றைய தேர்தலில் ஓட்டுப்
போடுவதற்காக, திகா சட்டசபை தொகுதிக்குட்பட்ட ஓட்டுச் சாவடிக்கு லாலு
பிரசாத் யாதவ் காரில் வந்தார். அவரது மனைவி ரப்ரி தேவி, மகன் தேஜபிரதாப்,
மகள் ராகிணி ஆகியோரும் வந்தனர்.ஓட்டுச் சாவடிக்குள் லாலு சென்றபோது, அவரது
பாதுகாப்பு படையினரும் உடன் சென்றனர். இதுகுறித்து அங்கு பணியில் இருந்த
தேர்தல் அதிகாரி, போலீசாரிடம் புகார் செய்தார். இதையடுத்து, தேர்தல்
விதிமுறைகளை மீறி, பாதுகாப்பு படையினரையும் ஓட்டுச் சாவடிக்குள் அழைத்துச்
சென்றதாக லாலு மற்றும் ரப்ரி தேவி ஆகியோருக்கு எதிராக முதல் தகவல் அறிக்கை
பதிவு செய்யப்பட்டது