எண்ணிக் கொதித்தெழடா!

by **தமிழநம்பி** Sun Oct 31, 2010 1:57 pm

எண்ணிக் கொதித் தெழடா!

எண்ணிக் கொதித் தெழடா! – தம்பி
ஏதும் முறையிலா இழிநிலை மாற்றிட .. .. .. .. (எண்ணிக்)

உயர்வென்றும் தாழ்வென்றும் பிறப்பினிலே – பொய்
உரைத்துப் பழித்தே இழித்திடுவார்!
அயர்வின்றி உழைப்பவர் தாழ்ந்தவரா – இந்த
அடாப்பழி தொடர விடுவதுவா? .. .. .. .. .. .. .. ...(எண்ணிக்)

சாதி சமயத்தின் பேராலே – நாட்டில்
சண்டை கொடுமைகள் உயிர்க்கொலைகள்!
ஆதி எதுவென ஆராய்ந்தால் – அது
அரசியற் காரரின் தூண்டுதலே! .. .. .. .. .. .. .. .. (எண்ணிக்)

ஊழல் சுரண்டல் பதுக்குதல்கள் – தன்
உறவுக்கு முறைமீறி ஒதுக்குதல்கள்!
ஏழைகள் மென்மேலும் ஏழையராய் – இங்கு
எல்லா மிழந்தே வாழ்நிலைகள்! .. .. .. .. .. .. .. .. (எண்ணிக்)

பள்ளிக் குழந்தைகள் படித்திடவும் – பணம்
பறிகொள்ளைக் கொடுமையைப் பார்த்திருந்தும்
கள்ளத் தனமாகத் துணைபோவார்! – இதைக்
காறி உமிழ்ந்து திருத்திடவே .. .. .. .. .. .. .. .. .. ...(எண்ணிக்)

செல்வர்க்கே உதவிடும் சட்டதிட்டம் – பொருள்
சேர்ந்து குவிந்திடும் அவர்க்குமட்டும்!
சொல்லும் திறத்தாலே ஏமாற்றி – மக்கள்
சொந்த உணர்வை மழுங்கடித்தார்! .. .. .. .. .. .. .. (எண்ணிக்)

சொந்த இனங்கொலத் துணைபோனார்! – வந்த
'சோனி'க்கும் சொத்தைக்கும் நாயானார்!
இந்த இழிவினில் தம்குடும்பம் – பதவி
எலும்புபெறக் காட்டிக் கொடுத்ததெலாம் .. .. .. .. ..(எண்ணிக்)

ஞாயம் நயன்மைகள் சொல்பவரைச் – சொந்த
நாட்டில் சிறைக்குள்ளே பூட்டுவதோ?
தேயத்தில் கொள்ளை அடிப்பவர்கள் – என்றும்
திளைத்துக் கொழுத்துத் திரிவதுவோ? .. .. .. .. .. ... (எண்ணிக்)

அச்சம் துடைத்தெறி, ஆர்த்தெழுவாய்! – அவர்
அழிவினை முடிவுசெய், அதர்ந்தெழுவாய்!
எச்சில் உமிழ்வாழ்க்கை ஏனினியும் – அட,
இரண்டிலொன் றாகட்டும் என்றேநீ .. .. .. .. .. .. .. .(எண்ணிக்)

---------------------------------------------------------------------------------------------

by **அருள்** Sun Oct 31, 2010 4:35 pm

வாழ்க உங்களின் தமிழ் தொண்டு ஆச்சரியம்

by **தமிழநம்பி** Tue Nov 02, 2010 7:45 am

AARUL wrote:வாழ்க உங்களின் தமிழ்த் தொண்டு

நன்றி அருள்.

by vidhyasan Tue Nov 02, 2010 11:43 am

இதை பள்ளி குழந்தைகளுக்கு பாடலாக சொல்லி தரலாம் . அருமை . உங்களின் திறமை தெரிகிறது . வாழ்த்துக்கள் .

by **தமிழநம்பி** Tue Nov 02, 2010 1:07 pm

நன்றி உதயா.

by **sakthy** Tue Nov 02, 2010 7:56 pm

இரு தினங்களுக்கு முன்னரே படித்து விட்டேன். ஆனாலும் மனதிற்குள் ஒரு சிறு சலனம். எங்கள் ஊர்க்காரர் செய்து விட்ட கொடும் செயலால் ஏற்பட்ட உறுத்தல்.பாட்டிக்கு படித்துக் காட்டினேன். வெட்கப்பட வேண்டியது நீ அல்ல நான் என்றாள். என்னிடமோ கேள்விக்குறி. பல ஆண்டுகள் பின் நோக்கி செல் என்றாள். தஞ்சையில் இருந்து இரண்டு வேட்டி சட்டையுடன் புறப்பட்ட போது கை அசைத்து வாழ்த்தி அனுப்பியவள் என் பாட்டி மட்டுமல்ல, அம்மாவுக்கு பாட்டியும் கூடத்தான். தமிழ் வளர்ப்பான்,தமிழையும் வளர்ப்பான்,கண்ணீரையும் துடைப்பான் என்றிருந்தோம். கண்ணையும் குத்தி விட்டான்.ஆரியனுக்காக உடன்பிறப்புக்களை கொல்லத் துணையும் போய் விட்டான். பகுத்தறிவாளன் என்றான்,சாதியையும்,மூட கொள்கைகளையும் வளர்த்து விட்டான்.இலவசங்களை கொடுத்து நம் விவசாய நிலங்களையும் அழித்து விட்டான். இலங்கை தமிழர் துயர் துடைக்க படை நடத்தி சென்றவன் எங்கள் ஊர்க்காரன்.எழுபது ஆண்டுகளுக்கு மேல் ஈழத் தமிழர்களுக்கு துணையாக நின்றவன். தமிழனை அழிக்க நினைத்தவனை இழுத்து வந்து கல் அணை கட்டியவன்.அவனுக்கு விழா நடத்த,நம் தமிழுக்கு விழா நடத்த இவன் யார்? அழியா பழியை நம் நிலத்திற்கு தந்து விட்டு , வெட்கமின்றி வேடம் தரித்து நிற்கும் இவனை ஏன் வாழ்த்தினோம் என்று வெட்கப்பட வேண்டியவள் நான், சொல்வது நானல்ல என் பாட்டி. தோளோடு தோள் நின்று ஈழத் தமிழர் துடைத்த ராஜ ராஜன் தேடித் தந்த புகழை அடியோடு நாசமாக்கி விட்டு வெட்கமின்றி நிற்பவனை எப்படி நான் அழைப்பேன்? தமிழன் சிந்தனைக் களத்தில் மட்டுமல்ல, எங்கும் சிந்திக்க வேண்டும். ஈழத் தமிழன் போராட்டத்தில் தோளோடு தோள் நின்று போராடுவோம். எங்கள் நிலத்திற்கு-தஞ்சைக்கு- ஏற்பட்ட களங்கத்தை துடைப்போம் .என் மனத்தில் இருந்ததை உங்கள் எழுத்தால் தந்ததற்காக வாழ்த்துக்கள்.

by **மாலதி** Tue Nov 02, 2010 8:18 pm

தமிழன் சிந்தனைக் களத்தில் மட்டுமல்ல, எங்கும் சிந்திக்க வேண்டும். எண்ணிக் கொதித்தெழடா! 917304

by **தமிழநம்பி** Wed Nov 03, 2010 2:27 pm

அன்பார்ந்த இனிய உதயா அவர்களுக்கு, உண்மையான, நேர்மையான, மாந்தநேயமுடைய, இனநலன் கருதுவோர் அனைவரின் எண்ணங்களும் உணர்வுகளும் ஒன்றாக இருப்பதில் வியப்பேதும் இல்லை அன்றோ? உங்கள் பாட்டியார் மற்றும் உங்களின் உணர்வுக்கு என் வணக்கமும் நன்றியும் உரித்தாக்குகின்றேன்.

by **தமிழநம்பி** Wed Nov 03, 2010 2:33 pm

malathi wrote:தமிழன் சிந்தனைக் களத்தில் மட்டுமல்ல, எங்கும் சிந்திக்க வேண்டும்.

சரியாகச் சொன்னீர்கள்! என் வலைப்பதிவு முகவரி: http://thamizhanambi.blogspot.com பார்க்கும்படி அன்புள்ளங்களைக் கேட்டுக்கொள்கின்றேன். நன்றி.

by Sponsored content

எண்ணிக் கொதித்தெழடா!

எண்ணிக் கொதித்தெழடா!

Re: எண்ணிக் கொதித்தெழடா!

Re: எண்ணிக் கொதித்தெழடா!

Re: எண்ணிக் கொதித்தெழடா!

Re: எண்ணிக் கொதித்தெழடா!

Re: எண்ணிக் கொதித்தெழடா!

Re: எண்ணிக் கொதித்தெழடா!

Re: எண்ணிக் கொதித்தெழடா!

Re: எண்ணிக் கொதித்தெழடா!

Re: எண்ணிக் கொதித்தெழடா!