இணையதள வரைபடத்தில் அருணாச்சல்: சீனா விஷமம்

by **அருள்** Sun Oct 24, 2010 12:27 pm

பீஜிங் : சீன அரசு இணையதளத்தில் வெளியிடப்பட்டுள்ள
வரைபடத்தில், இந்தியாவின் அருணாச்சல பிரதேச மாநிலத்தை, தனக்கு சொந்தமான
பகுதியாகக் குறிப்பிட்டு, விஷமம் செய்துள்ளது.
இந்தியாவுக்கும், சீனாவுக்கும் இடையே நீண்ட காலமாக எல்லை பிரச்னை
இருந்து வருகிறது. குறிப்பாக, இந்தியாவின் அருணாச்சல பிரதேச
மாநிலத்துக்கு, சீனா உரிமை கொண்டாடி வருகிறது. இது தொடர்பாக, இரு
நாடுகளுக்கு இடையே வார்த்தை போரும் நடந்து வருகிறது. இந்த விவகாரத்தில்,
நேரம் கிடைக்கும்போதெல்லாம், தன்னால் முடிந்த அளவுக்கு சீன அரசு
விஷமத்தில் ஈடுபட்டு வருகிறது.
இந்நிலையில், சீன அரசு சார்பில், "மேப் வேர்ல்டு' என்ற வரைபடம் (மேப்)
சமீபத்தில் வெளியிடப்பட்டது. இதில், சீனாவின் நிலப்பரப்பு தொடர்பான
விவரங்களும் இடம் பெற்றுள்ளன. சீன மொழியில் இது பற்றிய விவரங்கள்
குறிப்பிடப்பட்டுள்ளன.இந்த வரைபடத்தில், இந்தியாவின் அருணாச்சல
பிரதேசத்தை, தனது பகுதியாக சீனா உரிமை கொண்டாடியுள்ளது. மேலும்,
காஷ்மீரின் லடாக்கில் உள்ள அக்சாய் சின் பகுதியையும், தனது நிலப்பரப்பு
என, சீனா சொந்தம் கொண்டாடியுள்ளது.அதே நேரத்தில், சிக்கிம் விவகாரத்தில்
சீனா விஷமம் எதுவும் செய்யவில்லை. சிக்கிம் மாநிலத்தை, இந்தியாவின்
பகுதியாகவே அந்த வரைபடம் காட்டுகிறது.
இந்த இணையதளம் குறித்து சீனாவின் ஆய்வு மற்றும் வரைபடத் துறை இயக்குனர் ஜியாங் ஜி கூறுகையில்,
"சாட்டிலைட் மூலம் எடுக்கப்பட்ட புகைப்படங்களை வைத்து, இந்த வரைபடம்
உருவாக்கப்பட்டுள்ளது. இதை தயார் செய்வதற்கு இரண்டாண்டுகள் ஆனது' என்றார்.