கர்ப்பிணி பெண்களுக்கு ரூ.4,000 உதவித் தொகை : மத்திய அரசு அறிவிப்பு

by **அருள்** Thu Oct 21, 2010 1:59 pm

கர்ப்பிணி பெண்களுக்கு உதவித் தொகையாக, 4,000 ரூபாய் வழங்குவதற்கு, நேற்று நடந்த மத்திய அமைச்சரவையின் பொருளாதாரப் பிரிவு கூட்டத்தில், 1,000 கோடி ரூபாய் நிதி ஒதுக்கப்பட்டுள்ளது. "இந்திரா காந்தி சகயோக் திட்டம்' மூலம், நாட்டின், 52 பிற்படுத்தப்பட்ட மாவட்டங்களில், இத்திட்டம் செயல்படுத்தப்படும் என, உள்துறை அமைச்சர் சிதம்பரம் தெரிவித்தார். பிரதமர் மன்மோகன் சிங் தலைமையில் நேற்று நடந்த அமைச்சரவைக் கூட்டத்தில், கர்ப்பிணிப் பெண்களுக்கு நிதி உதவி, தானிய கொள்முதல் விலை உயர்வு, பொருட்களை தெருக்களில் சென்று விற்கும் ஏழைத் தொழிலாளர்களுக்கு மருத்துவ காப்பீடு உட்பட, பல முக்கிய முடிவுகள் எடுக்கப்பட்டன.
அமைச்சரவைக் கூட்டத்திற்கு பின், நிருபர்களிடம் பேசிய சிதம்பரம் கூறியதாவது: கர்ப்பிணிப் பெண்களுக்கு உதவும் இத்திட்டத்தால், 14 லட்சம் கர்ப்பிணிகள் பயனடைவர். உதவித் தொகையான, 4,000 ரூபாய், கர்ப்பிணிப் பெண்களுக்கு, குறிப்பிட்ட காலத்தில், மூன்று தவணைகளாக வழங்கப்படும். வங்கிகள் மூலமோ அல்லது அஞ்சல் அலுவலகம் மூலமோ பணப் பட்டுவாடா இருக்கும். மத்திய அரசால் உருவாக்கப்பட்ட இத்திட்டத்திற்கு, இந்த ஆண்டு, 391 கோடி ரூபாயும், அடுத்த ஆண்டு, 610 கோடி ரூபாய் ஒதுக்கவும், அமைச்சரவை முடிவு செய்தது. கிராமப்புறங்களில் அமைந்துள்ள அங்கன்வாடிகள் மூலம், இத்திட்டம் அமல்படுத்தப்படும். பயனாளிகள், 19 வயதிற்கு மேற்பட்டிருக்க வேண்டும். முதல் இரண்டு குழந்தைகளுக்கு மட்டுமே இந்த உதவித்தொகை வழங்கப்படும். கர்ப்ப காலத்தில், மூன்று மாதங்களுக்கு ஒரு தடவை என்று வழங்கப்படும் இத்தொகை, அரசு வேலை மற்றும் மத்திய பொதுத்துறை நிறுவனங்களில் வேலை பார்ப்பவர்கள் குடும்பத்திற்கு பொருந்தாது. குறிப்பிட்ட சில நிபந்தனைகளுக்கு உட்பட்டு, பயனாளிகள் தேர்வு செய்யப்பட்டு வழங்கப்படும். இவ்வாறு சிதம்பரம் கூறினார்.
கர்ப்ப காலத்திலும், குழந்தை பிறந்ததும் ஊட்டச்சத்து பற்றாக்குறையால் ஏற்படும் பிரச்னைகளால் பலர் பாதிக்கப்படுகின்றனர் என்ற அடிப்படையில், இத்திட்டத்தை மத்திய அரசு அமல்படுத்துகிறது. கடந்த சில நாட்களுக்கு முன், மத்திய அரசு நிறைவேற்றும் எந்த திட்டத்திற்கும் தலைவர்கள் பெயர் வைக்கக் கூடாது என்ற முடிவை எடுத்தனர்.ஆனால், இத்திட்டத்திற்கு, "இந்திரா' பெயர் சூட்டப்பட்டிருக்கிறது. இதற்கு காரணம், முன்பே இத்திட்டம் அரசின் பரிசீலனையில் இருந்ததால், இந்திரா பெயருடன் வெளியிடப்பட்டிருக்கலாம் என்று தெரிகிறது.
கொள்முதல் விலை உயர்வு: நெல்லை தவிர மற்ற உணவு தானியங்கள், பருப்பு வகைகள், சமையல் எண்ணெய்களின் கொள்முதல் விலையை, மத்திய அரசு நேற்று கணிசமாக ஏற்றியுள்ளது. வரும், "ரபி' பருவத்தில், விவசாயிகளுக்கு ஊக்கமளிக்கும் வகையில், கொள்முதல் விலைகளை ஏற்ற, மத்திய அரசு முடிவெடுத்துள்ளது. கோதுமை கொள்முதல் விலை, குவிண்டால் ஒன்றுக்கு, 20 ரூபாயும், பார்லி 30 ரூபாயும் உயர்த்தப்பட்டுள்ளது. கடந்த இரண்டு ஆண்டுகளாக உற்பத்தி குறைந்ததால், பருப்பு விலைகள் தாறுமாறாக ஏறியுள்ளதை கணக்கில் எடுத்து கொண்டு, கடலையின் கொள்முதல் விலையை, குவிண்டால் ஒன்றுக்கு, 340 ரூபாயும், மைசூர் பருப்பின் விலை, 380 ரூபாயும் உயர்த்தப்பட்டுள்ளது. கடுகு எண்ணெய் விலை, 20 ரூபாயும், சனோலா சமையல் எண்ணெய் கொள்முதல் விலை, 120 ரூபாயும் உயர்த்தப்பட்டுள்ளது.
உணவு தானியங்களை, உணவு கார்ப்பரேஷனும், பருப்பு வகைகள் மற்றும் சமையல் எண்ணெயை, "நாசெட்'டும் கொள்முதல் செய்யும் வேலையில் தொடர்ந்து ஈடுபடும். நெல் விவசாயிகள் பல ஆண்டுகளாக கோரிக்கைகளை வைத்தும், கடந்த ஆண்டில் தான் நெல்லின் கொள்முதல் விலை குவிண்டால் ஒன்றுக்கு, 1,000 ரூபாய் அளவை தொட்டது. அதற்கு முந்தைய ஆண்டுகளில் நெல்லின் கொள்முதல் விலை, 700 ரூபாயாகவும், ஊக்கத்தொகையாக, 100 முதல் 200 ரூபாய் வரையும் மத்திய அரசு கொடுத்து வந்துள்ளது. இத்தடவை, நெல் பற்றி தகவல் இல்லை. தவிரவும், தெருக்களில் வந்து வியாபாரம் செய்பவர்கள் நலன் காக்கும் வகையில், இன்சூரன்ஸ் திட்டமும் அறிமுகப்படுத்தப்படும். இத்திட்டத்திற்கு, "ராஷ்டிரிய ஸ்வஸ்தியா பீமாயோஜனா' என்று பெயர்.
நாடு முழுவதும் உள்ள 42 லட்சம் பேர் பயனடையும் இத்திட்டத்தில், மருத்துவ வசதி பெற, 30 ஆயிரம் ரூபாய் வரையில் கிடைக்கும் இத்திட்டத்திற்கு, நடப்பாண்டில் முதல்கட்டமாக அரசு, 20 கோடி ரூபாய் செலவழிக்கும். இதற்காக, 27 மாநிலங்களில் கணக்கெடுப்பு நடத்தி நடைமுறைப்படுத்தப்படுவதாக தொழிலாளர் நலத்துறை அமைச்சகம் தெரிவித்திருக்கிறது. மேலும், "எதிரிகள் சொத்து' என்றழைக்கப்படும் பாகிஸ்தானியர், இந்தியாவில் தங்கி விட்டுச் சென்ற சொத்து உரிமை பற்றிய சட்டத்தில் திருத்தம் கொண்டு வர மத்திய அமைச்சரவை முடிவு செய்துள்ளது.