மருத்துவமனையிலேயே தங்கி தொண்டாற்றும் மாற்றுத் திறனாளி

கரீம்பூர் (நாடியா) : நெருங்கிய உறவினர்கள் இருந்தும் உதவியில்லாமல் தவிக்கும் நோயாளிகளுக்கு மருத்துவமனையிலேயே தங்கி சேவையாற்றி வருகிறார் மாற்றுத் திறனாளி ஒருவர்.
மேற்கு வங்க மாநிலம், நாடியா மாவட்டத்தில் உள்ள கரீம்பூரில் ஊரகப்பகுதி மருத்துவமனை ஒன்று உள்ளது. இந்த மருத்துவமனையில், சகாட்டன் பீவி (65) என்ற பெண் டைபாய்டு காரணமாக அனுமதிக்கப்பட்டார். பீவியின் வீடு, மருத்துவமனையில், இருந்து 20 கி.மீ., தூரத்தில் உள்ள தெய்ன்பூர் கிராமத்தில் உள்ளது. வயதான அவரது கணவரால், தினமும் வந்து மனைவியை பார்த்துக்கொள்ள முடியவில்லை. அவருக்கு தேவையான மருத்து, மாத்திரைகளை குறிப்பிட்ட நேரத்திற்கு வழங்க ஆளில்லை. பீவியின் பிள்ளைகளும் அவர்களை கண்டுகொள்ளவில்லை. இதையறிந்த நாராயண் மண்டல், சகாட்டா பீவி அந்த மருத்துவமனையில் சிகிச்சை பெற்று முடியும் வரை அவருக்கு உதவியாக இருந்தார். வேளைக்கு மருந்தை அளிப்பது, பீவிக்குத் தேவையான உதவிகளை செய்வது, தினந்தோறும் அவர் உடல் நலம் குறித்து அக்கறையாக விசாரிப்பது என்று நாராயண் மண்டல் அனைத்து விதத்திலும் உதவினார்.
இதே போன்று, ராகி மலேக்கர் என்ற பார்வையற்ற இளம் பெண், அந்த மருத்துவமனையில் அனுமதிக்கப்பட்டார். அவரும் அருகில் உள்ள கிராமத்தைச் சேர்ந்தவர். ஆனால், உதவிக்கு யாரும் இல்லை. கடும் வயிற்று வலியால் அவதிப்பட்டு வந்த அந்த பெண்ணுக்கு எக்ஸ்-ரே எடுக்க வேண்டும் டாக்டர்கள் கூறினார். மருத்துவமனையில், அந்த வசதி இல்லாததால், வெளியில் உள்ள ஆய்வகத்தில் தான் எடுக்க வேண்டும். அதற்கு பணம் கட்ட வேண்டும். ஆனால், கூலித் தொழிலாளியான அந்த பெண்ணின் தந்தையால் பணம் கட்ட இயலவில்லை. உடனே நாராயண், தனக்குத் தெரிந்தவர்களிடம் கடன் வாங்கி, அந்த பெண்ணுக்கு எக்ஸ்-ரே எடுப்பதற்காக பணம் கட்டினார். அதை எடுத்தப் பார்த்தப் பின், அந்த பெண்ணிற்கு அல்சர் இருப்பது தெரியவந்தது. அதற்கான சிகிச்சை செலவு முழுவதையும் நாராயண் தான் கடன் வாங்கி செய்தார்.
இதுபோன்று, ஏழைகள், ஆதரவற்றோர் என அந்த மருத்துவமனைக்கு வரும் அத்தனை நோயாளிகளுக்கு ஆதரவாகவும், உதவியாகவும் இருக்கும் நாராயண் மண்டல் ஒரு மாற்றுத்திறனாளி. போலியோ தாக்குதலில் வலது கால் செயலிழந்துவிட்டது. தற்போது அவருக்கு 52 வயதாகிறது. அவரது முகவரி அந்த நாடியா மருத்துவமனைதான்.கடந்த 1983 ம் ஆண்டு, கடும் காய்ச்சல் காரணமாக, அந்த மருத்துவமனையில், அவரது சகோதரர் கொண்டுவந்து சேர்த்தார். அதன் பிறகு, அவர் அந்த மருத்துவமனை பக்கம் எட்டிப்பார்க்கக் கூட இல்லை. நாராயண் மண்டலுக்கு காய்ச்சல் குணமானதும் திரும்ப வந்து அழைத்துப் போகவும் இல்லை. வேறு போக்கிடம் இன்றி அந்த மருத்துவமனையிலேயே தங்கிவிட்ட மண்டல், அங்கு வரும் நோயாளிகளுக்கு உதவ ஆரம்பித்தார்.மத்திய அரசு, மாற்றுத் திறனாளிகளுக்கான உதவித் தொகை 750 ரூபாயை நாராயண் மண்டல் பெறுகிறார். இந்த தொகையையும், அங்கு வரும் நோயாளிகளுக்கு மாத்திரை, மருந்து, பழங்கள் வாங்குவதற்கே செலவிடுகிறார்.
இதுகுறித்து, நாராயண் கூறியதாவது:மருத்துவமனையில் சேர்த்த பின்னர், எனது சகோதரன் என்னை திரும்ப அழைத்துச் செல்ல வரவே இல்லை. அதன் பிறகுதான் மருத்துவமனையிலேயே தங்க முடிவு செய்தேன். மருத்துவமனை வராந்தாவில் தான் இரவில் தூங்குவேன். அருகில் உள்ள மக்கள் எனக்கு உணவு அளிக்கின்றனர். இங்கு இருக்கும் டாக்டர்களும், நர்சுகளும் எனக்கு ஆதரவாக உள்ளனர். இந்த மருத்துவமனையை எனது வீடு போலத்தான் இருக்கிறது. இங்கு, வரும் மக்களுக்கு என்னால், முடிந்த உதவிகளை செய்து வருகிறேன்.இவ்வாறு நாராயண் கூறினார்.
அந்த மருத்துவமனையில் பணிபுரியும் நர்ஸ் பாபானி பாஸ்வான் கூறியதாவது:நாராயண் இந்த மருத்துவமனையில், இருப்பதால் எங்களுக்கு பணிச்சுமை வெகுவாக குறைந்துள்ளது. இங்குவரும் நோயாளிகளை கண்ணும் கருத்துமாக கவனித்துக்கொள்கிறார். நோயாளிகளின் குடும்பத்தில் ஒருவராகவே பழகுகிறார். இதைத்தவிர, டாக்டர்கள், நர்சுகளுக்கு தேவையான உதவிகளையும் செய்கிறார். மருத்துவமனையை கூட்டி பெருக்கி சுத்தம் செய்வதோடு, கழிவறைகளையும் முகம் சுளிக்காமல் சுத்தம் செய்கிறார். இந்த மருத்துவமனையைப் பொறுத்தவரை, டாக்டர், நர்சுகளுக்கு அடுத்தபடியாக நாராயணும் முக்கிய நபராகி விட்டார். இவ்வாறு பாபானி கூறினார்.முர்ஷிதாபாத் தலைமை மருத்துவ அதிகாரி அமித் ஹால்டர் கூறுகையில், "சிகிச்சை முடிந்த பின்னரும், ஒருவர் நீண்ட நாட்களாக மருத்துவமனையில், தங்கியிருப்பது சட்டத்திற்குப் புறம்பானதுதான். ஆனால், இந்த விஷயத்தில் நாராயண் மண்டலுக்கு மட்டும் விதிவிலக்கு அளிக்கப்பட்டுள்ளது' என்றார்.