வளர்ந்த நாடுகளை கண்மூடித்தனமாக பின்பற்றக் கூடாது: மன்மோகன் அறிவுரை

ஐதராபாத் : அனைத்து விஷயங்களிலும் வளர்ந்த நாடுகளை, வளரும் நாடுகள் கண்மூடித்தனமாக பின்பற்றக்கூடாது, என பிரதமர் மன்மோகன் சிங் தெரிவித்துள்ளார்.
ஐதராபாத்தில், வளரும் நாடுகளுக்கான அறிவியல் அகடமி மாநாடு நேற்று துவங்கியது. மாநாட்டை துவக்கி வைத்து பிரதமர் மன்மோகன் சிங் பேசியதாவது:அறிவியல் தொழில்நுட்பங்கள் உலகத்தை பாதுகாத்து வருகின்றன. உலக வெப்பமயமாதல் விஷயத்தில் அறிவியல் கொள்கைகள் அதிகம் உருவாக்கப்பட வேண்டும். வெப்பநிலை மாற்றம் விஷயத்தில் தனிப்பட்ட முறையில் ஒன்றும் செய்ய முடியாது. இந்த விஷயத்தில் பல்வேறு நாடுகள் இணைந்து பிரச்னையை தீர்க்க முன்வரவேண்டும்.பள்ளிகளிலும், ஆய்வகங்களிலும் அறிவியல் கட்டமைப்புகளை பலப்படுத்த வேண்டும். சுற்றுச்சூழலை பாதுகாக்கும் விஷயத்தில் புதுமையான நடவடிக்கைகள் தேவை. வளரும் நாடுகளில் தரமான அறிவியல் நிறுவனங்கள் குறைவாக உள்ளன. எனவே, வளரும் நாடுகள் ஒன்றிணைந்து அனுபவம், திறமை வாய்ந்த ஆராய்ச்சியாளர்களை கொண்ட கூட்டமைப்பை உருவாக்க வேண்டும். அதற்கு அதிக நிதி தேவைப்படும்.
வளர்ந்த நாடுகளை, வளரும் நாடுகள் கண்மூடித்தனமாக பின்பற்ற முடியாது. ஏனென்றால் வளரும் நாடுகள் சில பிரச்னைகளை சமாளிக்க வேண்டியுள்ளது. தட்பவெப்ப நோய்கள் சமாளிப்பு, பாரம்பரிய விவசாய முறையை மாற்றி அமைத்தல், இயற்கை சீற்றம் போன்றவற்றை சமாளித்தல் ஆகியவற்றை வளரும் நாடுகள் எதிர்கொள்ள வேண்டியுள்ளது. இவற்றில் நடைமுறை சிக்கல்களை சமாளிக்க புதியவழி காண வேண்டும். தொழில் வளர்ச்சி கண்ட நாடுகள், நமது வழிமுறைகள் மற்றும் நம் வாழ்வை பயமுறுத்தும் வகையில் செயல்படுகின்றன. நமது நலனைக் காக்கும் வகையில் அவர்களைப் போல முன்னேற்றம், வளர்ச்சிக்கு நமது பாணியுடன் இணைந்த வழிகாண வேண்டும். பள்ளிகளிலும், கல்விச் சாலைகளிலும் விஞ்ஞானம் மற்றும் தொழில்நுட்ப வளர்ச்சிக்கு வழிகாணும் வகையில் முயற்சிகள் மேற்கொள்ள வேண்டும்.தென் ஆப்ரிக்கா, பிரேசில், இந்தியா ஆகிய நாடுகள் ஒன்றிணைந்து விவசாயம், வெப்பநிலை மாற்றம், நானோ தொழில்நுட்பம் போன்றவற்றில் ஒன்றிணைந்து ஆய்வு மேற்கொண்டு வருகின்றன.இவ்வாறு பிரதமர் மன்மோகன் சிங் கூறினார்.
சந்திரபாபு நாயுடு கைது : ஐதராபாத் வந்த பிரதமர் மன்மோகன் சிங்கை, தெலுங்கு தேசம் தலைவர்கள் சந்திரபாபு நாயுடு தலைமையில் சந்திக்க முயன்றனர். விவசாயிகள் கடன் தொடர்பாக சந்திரபாபு நாயுடு உள்ளிட்டவர்கள், ஐதராபாத் விமான நிலையத்தில் பிரதமரை சந்திக்க முயன்றனர். ஆனால், அவர்களுக்கு பிரதமரை சந்திக்க அனுமதி மறுக்கப்பட்டது. இதையடுத்து, சந்திரபாபு நாயுடு உள்ளிட்டவர்கள் தர்ணா செய்தனர். அவர்களை, போலீசார் கைது செய்து அம்பர்பேட் போலீஸ் நிலையத்துக்கு அழைத்துச் சென்றனர்