பதக்க பட்டியலில் இந்தியா 2 வது இடம் : கடந்த போட்டியை விட சூப்பர் முன்னேற்றம்

by **ஜனனி** Tue Oct 12, 2010 6:07 pm

புதுடில்லி: காமன்வெல்த் போட்டியில் இந்தியா மொத்தம் 31
பதக்கங்களை பெற்று கடந்த போட்டியை விட நல்ல முன்னேற்றம் கண்டுள்ளது.
நான்காவது இடத்தில் இருந்த இந்தியா இம்முறை 2 வது இடத்தை தக்கவைக்கும் என
எதிர்பார்க்கப்படுகிறது. கடந்த 3 ம் தேதி டில்லியில் துவங்கிய வண்ணமய விழாவில் பிரிட்டன்
இளவரசர் உள்பட பலர் பங்கேற்றனர். 4 ம் தேதி துவங்கிய முதல்நாள்
போட்டியிலேயே இந்திய வீரர்கள் துப்பாக்கி சுடுதலில் சுகன்தேய் 56 கிலோ
எடைபிரிவில் வெள்ளி வென்றார். வெள்ளி , வெண்கலம் என 4 பதக்கம் கிடைத்தது.
2 வது நாள் ஆட்டத்தில் துப்பாக்கிசுடுதலில் அபினவ்பிந்ரா தங்கம் வென்றார்.

3 வது இடத்திற்கு இங்கிலாந்து : தொடர்ந்து
வில்வித்தை, மல்யுத்தம் , டென்னிஸ், ஓட்டப்பந்தயம் என பல பிரிவுகளிலும்
நமக்கு பதக்கம் குவியத்துவங்கியது. தற்போதைய நிலவரப்படி இந்தியா 31
தங்கம், 25 வெள்ளி, 28 வெண்கலம் என மொத்தம் 84 பதக்கங்களை குவித்துள்ளது.
ஆஸ்திரேலியாவில் மெல்பேர்ன் நகரில் ( 2006 ம் ஆண்டு ) நடந்த காமன்வெல்த்
போட்டியில் இந்தியா 22 தங்கம், 17 வெள்ளி, 11 வெண்கலம் என மொத்தம் 50
பதக்கங்கள் பெற்றது. தற்போது கடந்த காலத்தை விட 30 பதக்கங்கள் கூடுதலாக
பெற்றுள்ளது. இன்னும் அதிகரிக்கும் என எதிர்பார்க்கப்படுகிறது. இந்தியாவை
விட தங்க பதக்கம் குறைவாக பெற்றதால் 3 வது இடத்திற்கு தள்ளப்பட்டுள்ளது
இங்கிலாந்து .

கடந்த 2006 ல் ஆஸ்திரேலியா 84 தங்கம், 69 வெள்ளி, 68 வெண்கலம் என 221
பதக்கம் பெற்று முதல் இடத்தில் இருந்தது. தற்போதைய டில்லி போட்டியிலும்
ஆஸ்திரேலியா 64 தங்கம், 42 வெண்கலம், 40 வெள்ளி என146 மொத்த பதக்கம்
பெற்று முதல் இடத்தில் இருந்தாலும் கடந்த ஆண்டை விட ஆஸ்திரேலியா சற்று
பின் தங்கி இருக்கிறது. இரண்டாவது இடத்தில் இருந்த இங்கிலாந்து கடந்தகால
போட்டியில் (36 தங்கம், 40 வெள்ளி, 34 வெண்கலம் என மொத்தம் 110 பதக்கம்)
பெற்றது. இந்த ஆண்டில் இங்கிலாந்து 28, 50 , 36 என 114 பதக்கம் பெற்று 3
வது இடத்திற்கு தள்ளப்பட்டுள்ளது. கடந்த போட்டியில் 3 வது இடத்தில் இருந்த
கனடா ( மொத்தம் 86 பதக்கம் ) தற்போது 66 பதக்கம் பெற்று 4 வது இடத்திற்கு
தள்ளப்பட்டுள்ளது.

5 வது இடத்தில் இருந்த தென் ஆப்ரிக்கா ( கடந்த போட்டி ; 38 பதக்கம்) ,
தற்போது 5 வது இடத்தை 31 பதக்கம் பெற்று தக்கவைத்துக்கொண்டது. நைஜீரியா
நல்ல முன்னேற்றம் கண்டுள்ளது. (கடந்த போட்டியில் 4 தங்கம் உள்பட 17
பதக்கம்) இப்போது 8 தங்கம் 7 வெள்ளி, 11 வெண்கலம் என 26 பதக்கம் பெற்று 12
வது இடத்தில் இருந்து 6 வது இடத்திற்கு முன்னேறியுள்ளது.

பாகிஸ்தான் நிலைமை என்ன ? இலங்கை
( கடந்த போட்டி 1 தங்கம் மட்டும் ) இப்போது தங்கத்தை இழந்து வெள்ளி
வெண்கலம் என மொத்தம் 2 பதக்கங்களே பெற்றுள்ளது. பாகிஸ்தானை பொறுத்த
மட்டில் கடந்த போட்டியில் பெற்ற மொத்தம் 5 பதக்கங்களை இப்போதும்
பெற்றுள்ளது. இந்த நாட்டுக்கு கிடைத்த தங்கம் ஒன்று. ஸ்காட்லாந்தும்,
ஜமைக்காவும் குறைந்த பதக்கங்கள் பெற்று பின்னுக்கு சென்றுள்ளது.
இந்தியா 2 வது இடம் தக்க வைக்குமா என்பது நாளை மறுநாள் தெரிந்து
விடும். நாளை மறுநாள் ( 14 ம் தேதி) இரவில் நடக்கும் கோலாகல வண்ணமிகு
நிறைவுவிழாவில் பல்வேறு நாட்டு தலைவர்கள் பங்கேற்கின்றனர். இதற்கான
ஏற்பாடுகள் தீவிரமாக நடந்து வருகிறது.