இந்தியா- சீனாவின் உதவிகளின்றி விடுதலைப்புலிகளை முறியடித்திருக்க முடியாது – த ரைம்ஸ்

மேற்குலகம் விடுதலைப்புலிகளை காப்பாற்ற முயன்றபோதும், இந்தியாவும், சீனாவும் வழங்கிய உதவிகளால் தான் சிறீலங்கா விடுதலைப்புலிகளை முறியடித்துள்ளதாக த ரைம்ஸ் சஞ்சிகை தனது பத்தி ஒன்றில் தெரிவித்துள்ளது.

அதில் மேலும் தெரிவிக்கப்பட்டுள்ளதாவது:

போரில் மட்டுமல்லாது, போரின் பின்னரும் சீனாவும், இந்தியாவும் இணைந்து சிறீலங்காவை காப்பாற்றியுள்ளன. ஐக்கிய நாடுகள் சபையின் மனித உரிமைகள் ஆணைக்குழுவில் சிறீலங்கா அரசுக்கு எதிராக ஐரோப்பிய ஒன்றியத்தின் ஆதரவுடன் கொண்டுவரப்பட்ட தீர்மானத்தை சீனாவும் – இந்தியாவும் இணைந்து முறியடித்திருந்ன.

ஐக்கிய நாடுகள் சபையின் பாதுகாப்புச் சபையில் கூட சீனா, ரஸ்யாவுடன் இணைந்து சிறீலங்காவுக்கு எதிரன நடவடிக்கைகளை முறியடித்திருந்தது. மேலும் சிறீலங்காவுக்கான நிதி உதவிகளை வழங்குவதிலும் இந்தியாவும், சீனாவும் இணைந்தே பணியாற்றி வருகின்றன.

போரின் பின்னர் இந்தியா 800 மில்லியன் டொலர்களை கடனாக வழங்க முன்வந்துள்ளது. 50,000 வீடுகளையும் கட்டிக்கொடுக்க அது முன்வந்துள்ளது. ஐக்கிய நாடுகளின் மதிப்பீட்டின் படி 160,000 வீடுகள் தேவை. அதில் மூன்றில் ஒரு பகுதியை கட்டிக்கொடுக்க இந்தியா முன்வந்துள்ளது.

சிறீலங்காவில் முதலீடுகளை மேற்கொள்ள இந்திய நிறுவனங்கள் போட்டியிட்டுவருவதாக இந்தியாவின் ஆடம்பர விடுதிகளில் ஒன்றான தாஜ் விடுதியின் பிரதம நிறைவேற்றுப் பணிப்பாளர் றெய்மன்ட் பிக்சன் தெரிவித்துள்ளார்.

கொழும்புக்கு வெளியே 100 அறைகளை உடைய விடுதி ஒன்றை கட்டுவதற்கு தாம் திட்டமிட்டுள்ளதாக அவர் மேலும் தெரிவித்துள்ளார்.

சிறீலங்காவுக்கான உதவிகளை வழங்குவதில் சீனாவும் குறைந்தது அல்ல, அது அபிவிருத்தி திட்டங்களுக்கு 500 மில்லியன் டொலர்களை வழங்கியுள்ளது.

எனினும் மேற்குலகம் தனது அழுத்தங்களை தொடர்ந்து வருகின்றது, கடந்த ஆகஸ்ட் மாதம் 15 ஆம் நாள் ஐரோப்பிய ஒன்றியம் ஜி.எஸ்.பி பிளஸ் வரிச்சலுகையை நிறுத்தியுள்ளது. ஆனால் அதே தினத்தில் 350 மில்லியன் டொலர் செலவில் சீனா நிர்மானித்த அம்பாந்தோட்டை துறைமுகத்தின் ஒரு பகுதியை மகிந்தா திறந்து வைத்திருந்தார்.

மேற்குலகத்தின் அழுத்தங்கள் அதிகரித்த போது அதனை ஆசியாவின் இரு பெரும் சக்திகளின் துணையுடன் சிறீலங்கா முறியடித்திருந்தது. அனைத்துலகத்தின் அச்சுறுத்தல்களை முறியடிக்கும் வல்லமையை அவை கொண்டுள்ளன.

ஆனால் இந்தியாவையும், சீனாவையும் சிறீலங்கா எவ்வாறு கையாளப்போகின்றது என்ற கேள்விக்கு, இந்தியாவை மகிழ்ச்சியாக வைத்திருந்தவாறு, சீனாவுடன் உறவுகளை வலுப்படுத்த சிறீலங்கா முயன்று வருவதாக முன்னாள் சிறீலங்கா இராஜதந்திரி கொடகே தெரிவித்தள்ளார்.

எனினும் சீனாவின் ஆளுமையை முறியடிக்க அமெரிக்கா முயன்று வருவதாக அவர் மேலும் தெரிவித்துள்ளார் என அதில் மேலும் தெரிவிக்கப்பட்டுள்ளது.

இந்தியா -சீனா இணைந்து செயல்பட்டதாக கூறுவதை ஏற்றுக் கொள்ள முடியாது. தங்கள் நலன் கருதி செயல்பட்டு ஒருவரை ஒருவர் குத்திக் கொள்ள முயன்றனர். தங்களின் ஆதிக்கம் ஏற்பட வேண்டும் என்பதற்காக போட்டி போட்டு இனப்படுகொலைக்கு துணை போனார்கள் என்று சொல்லலாம். அவர்களின் ஆதிக்கப் போட்டி தமிழர்களை அழிக்க,சிங்களத்திற்கு துணையாகி, வெற்றியடைய செய்து விட்டது. இந்த போட்டியை தனக்கு சாதமாக்கி சிங்களம் காரியத்தை சாதித்துக் கொண்டது. ஆனாலும் புலிகளை அழிக்க இந்தியா,சீனாவை விட வான்வெளித் தாக்குதலும்,தடை செய்யப்பட்ட ஆயுதங்கள்,ரசாயனக் குண்டுகளே பெரிதளவில் உதவின என்பதே உண்மை. தமிழர்களில் சிலரும்,ஈழப் போராடத்திற்கு எதிரானவர்களும்,சிங்களமும்,உலக நாடுகளும் தெரிவித்த குற்றச்சாட்டுகளில் முதன்மையாக இருந்தது மக்களை கேடயமாக புலிகள் பாவித்தனர் என்பதே. இந்தக் குற்றச்சாட்டை சமீபத்தைய சிங்களத்தின் கண்துடைப்பு விசாரணைக் குழுவில் மக்களின் சாட்சியங்கள் பொய்யாக்கி விட்டன. பெண்கள் உட்பட பலரின் அஞ்சாது தெரிவித்த சாட்சியங்களில் ராணுவத்தின் அட்டுழியங்கள் வெளிவந்தன. அத்துடன் மக்களுக்கு கேடயமாக, பெண்கள் குழந்தைகள்,முதியோருக்கு பாதுகாப்பாக, புலிகள் நின்றிருந்தனர் என்றும் மக்களை கேடயமாக புலிகள் பாவிக்கவில்லை என்பதையும் திட்டவட்டமாக தெரிவித்திருந்தனர். இந்த சாட்சியங்களின் பின்னர் ராணுவத்திடம் இருந்து தங்களுக்கு பாதுகாப்பையும் கேட்டிருந்தனர். வேடிக்கை என்னவென்றால் உதவிகளை இந்தியா தரலாம் அதுபற்றி எங்களிடம் விசாரணை செய்யக் கூடாது என்றும், இந்தியாவை விட சீனாவே எமக்கு நெருங்கிய நட்பு நாடு என்றும் இந்தியாவின் தலையில் குட்டும் போட்டு விட்டது. தொடர்ந்து இரண்டு ரோ உளவாளிகளை நாட்டை விட்டு வெளியேற்றியும் விட்டது.அதே சமயம் சீன இராணுவத்தையோ,உளவுப்படை அதிகாரிகளையோ வெளியேற்றவில்லை. இந்தியாவின் கைகளில் இருந்து இலங்கை கைநழுவி விட்டாலும் தொடர்ந்து ஐ.நா.விசாரணை குழு போன்ற விசயத்தில் தலையை நுழைத்து நல்ல பெயர் வாங்க முயற்சித்து வருகிறது. வீடுகள் கட்டித் தர போவதாக கூறும் இந்தியாவா,தன் வீட்டு வேலை போல் அபிவிருத்தியில் ஈடுபட்டு வரும் சீனாவா அல்லது எழுபதிற்கு மேற்பட்ட அமெரிக்க முதலிட்டுக்காரர்களை அனுப்பி தன் பக்கம் இழுக்க முயற்சிக்கும் அமெரிக்காவா அல்லது அனைவரையும் தன் வலைக்குள் விழ வைக்கப் போகும் இலங்கையா?