"தமிழ்நாடு (எ) குடிகார நாடு' : புதுபெயர் சூட்டி ராமதாஸ் விளக்கம்

தஞ்சாவூர்: ""தமிழகத்தை, "தமிழ்நாடு என்கிற குடிகார நாடு' என, பெயர்
மாற்றம் செய்ய வேண்டும்,'' என, பா.ம.க., நிறுவனர் ராமதாஸ் தெரிவித்தார்.
தஞ்சையில் நிருபர்களிடம் அவர் கூறியதாவது: மாநிலங்களுக்கு இடையில்
நதிநீரில் உள்ள தகராறுகளை தீர்க்கும் சட்டம் 1956ம் ஆண்டு இயற்றப்பட்டது.
இதன் அடிப்படையில் பல்வேறு மாநிலங்களுக்கு இடையே நதிநீர் சிக்கல்
தீர்க்கப்பட்டுள்ளது. ஆனால், கேரளா, ஆந்திரா, கர்நாடகா ஆகிய மூன்று
மாநிலங்களுடனான (முல்லை பெரியாது, பாலாறு, காவிரி) தமிழகத்தின் நதிநீர்
சிக்கல் அரை நூற்றாண்டுகாலம் தீர்க்கப்படாமல் உள்ளது. தமிழகத்தை ஆட்சி
செய்த அரசும், இப்போது ஆண்டு கொண்டிருக்கிற அரசும் சிந்திக்கவும் இல்லை;
செயல்படுத்தவும் இல்லை. காவிரியில் தொடங்கி கன்னியாகுமரி மாவட்டத்தில்
நெய்யாறு, பாலாறு என தமிழகத்தின் உரிமைகள் பறிபோகிறது.
சில ஆண்டுக்கு முன் நெல்லை மாவட்டம் செங்கோட்டையில் உள்ள
அணைக்கட்டுக்கு கடப்பாரை, மண்வெட்டி ஆகியவற்றுடன் தமிழக எல்லைக்கு
வந்தவர்தான் கேரள முதல்வர் அச்சுதானந்தன். அதேபோல் ஒக்னேக்கல் கூட்டு
குடிநீர் திட்டத்துக்கு எதிர்ப்பு தெரிவித்து படையுடன் வந்தவர்தான்
கர்நாடக முதல்வர் எடியூரப்பா. அதேபோல, "பாலாற்றில் அணைக்கட்டியே தீருவேன்'
என, கடிதம் எழுதியவர்தான் மறைந்த ஆந்திரா முதல்வர் ராஜசேகர ரெட்டி. இப்படி
அண்டை மாநிலங்கள் எல்லாம் தமிழகத்துக்கு தண்ணீர் தர மாட்டோம் என கொடி
உயர்த்துகின்றன. நாமோ, "அவை சகோதரர் மாநிலம்' என, வாஞ்சையோடு பேசி, "அய்யோ
பாவம் அவர்கள் என்ன செய்வார்கள்' என, பேசிக் கொண்டிருக்கிறார் தமிழக
முதல்வர்.
சென்னை, வேலூர், காஞ்சிபுரம், திருவள்ளூர் ஆகிய மாவட்டங்கள் பாலாற்றை
நம்பி இருக்கின்றன. 50 ஆண்டாக காவிரி பிரச்னை தீர்க்கப்படாமல் உள்ளது.
காவிரி, பாலாறு, முல்லை பெரியாறு பிரச்னை குறித்த வழக்குகள்
உச்சநீதிமன்றத்தில் உள்ளது. உச்சநீதிமன்றம் நமக்கு ஆதரவாக வழங்கப்பட்ட
தீர்ப்பு மதிக்கப்படாமல் உள்ளது. மத்திய அரசு மவுனம் காக்கிறது. தமிழகத்தை
ஆண்ட, ஆளும் அரசு மவுனம் காக்கிறது. பம்புச்செட்டில் மின் மீட்டர்
பொருத்துவது எதிர்காலத்தில் இலவச மின்சாரத்தை ரத்து செய்து, கட்டாய வசூல்
செய்யத்தான் என விவசாயிகள் அச்சப்படுகின்றனர்.
மின்வாரியத்தில் மின் இழப்பை விட விவசாயிகளுக்கு இலவசமாக வழங்கப்படும்
மின்சாரத்தின் அளவு குறைவுதான். ஜாதி வாரிக் கணக்கெடுப்பை வலியுறுத்தி
பா.ம.க., சார்பில் மாநிலம் தழுவிய ஆர்ப்பாட்டம் நடத்தப்பட்டது. ஆனால்,
அரசின் மவுனம் 69 சதவீத இட ஒதுக்கீட்டுக்கு வேட்டு வைப்பது போல் உள்ளது.
சிமெண்ட் விலை கடுமையாக உயர்ந்துள்ளது. அரசு மலிவு விலையில் சிமெண்ட்
வழங்க நடவடிக்கை எடுக்க வேண்டும். வரும் சட்டசபை தேர்தல் அறிவிப்புக்கு
பின் யாருடன் கூட்டணி என்பது குறித்து முடிவு செய்யப்படும். பா.ம.க.,
தலைமையில் மூன்றாவது அணி அமைக்கவும் முயற்சி செய்யப்படும். இனி தமிழகத்தை,
"தமிழ்நாடு என்கிற குடிகார நாடு' என, பெயர் மாற்றம் செய்ய வேண்டும்.
பா.ம.க., ஆட்சிக்கு வந்தால் பூரண மதுவிலக்கை அமல்படுத்தி முதல் ஆணை
வெளியிடப்படும். இவ்வாறு ராமதாஸ் தெரிவித்தார். பேட்டியின் போது, பா.ம.க.,
தலைவர் மணி உடனிருந்தார்.