ஜெயலலிதாவுக்கு மிரட்டல் கடிதங்கள்: சி.பி.ஐ. விசாரணை தேவை

by **ஜனனி** Tue Sep 28, 2010 7:27 am

சென்னை, செப். 27:
அ.தி.மு.க. பொதுச் செயலாளர் ஜெயலலிதாவுக்கு தொடர்ச்சியாக வரும் மிரட்டல்
கடிதங்கள் தொடர்பாக சி.பி.ஐ. விசாரணை தேவை என்று தலைமைச் செயலாளரிடம்
அ.தி.மு.க. நிர்வாகிகள் வலியுறுத்தினர். அ.தி.மு.க. பொருளாளர் ஓ.
பன்னீர்செல்வம், தலைமை நிலையச் செயலாளர் கே.ஏ. செங்கோட்டையன், எம்.ஜி.ஆர்.
மன்றச் செயலாளர் டி.ஜெயக்குமார், வழக்கறிஞர் பிரிவு செயலாளர் பி.எச்.
மனோஜ் பாண்டியன் ஆகியோர் தலைமைச் செயலாளர் எஸ்.மாலதியை சென்னை தலைமைச்
செயலகத்தில் திங்கள்கிழமை சந்தித்தனர். ஜெயலலிதாவுக்கு
தொடர்ச்சியாக வரும் கொலை மிரட்டல் கடிதங்கள் தொடர்பாக சி.பி.ஐ.
விசாரணைக்கு உத்தரவிட வேண்டும் என அவர்கள் வலியுறுத்தினர். தலைமைச் செயலாளரிடம் அளிக்கப்பட்ட மனுவில் கூறியுள்ளதாவது: அ.தி.மு.க.
பொதுச் செயலாளர் ஜெயலலிதாவுக்கு கொலை மிரட்டல் விடுத்தும், ஜெயா டி.வி.
அலுவலகத்தைத் தகர்ப்போம் என்றும் கூறி தொடர்ந்து கடிதங்கள் வந்து
கொண்டிருக்கின்றன. இது தொடர்பாக விசாரித்து நடவடிக்கை எடுக்க
வேண்டும் என்று இரண்டு கடிதங்கள் வாயிலாக தங்களை கேட்டுக் கொண்டோம்.
ஆனால், இதுவரை எவ்வித நடவடிக்கையும் எடுக்கப்படவில்லை. இந்தக்
கொலை மிரட்டல் கடிதங்கள் மதுரையை மையமாகக் கொண்டுள்ளன. கடிதங்களை
எழுதியவர்கள் மத்திய அமைச்சர் அழகிரியின் ஆதரவாளர்கள் என்று கடிதங்களில்
குறிப்பிடப்பட்டுள்ளது. இது தொடர்பாக பிரதமர் மன்மோகன் சிங்,
உள்துறை அமைச்சர் ப. சிதம்பரம் ஆகியோரிடமும் வலியுறுத்தப்பட்டுள்ளது.
எனினும், கொலை மிரட்டல் கடிதங்கள் தொடர்ந்து வந்து கொண்டிருக்கின்றன. நாங்கள்
கொடுத்த ஏழு புகார்கள் மீது காவல் துறையினர் முதல் தகவல் அறிக்கைகளைப்
பதிவு செய்துள்ளனர். எனினும், எந்த நடவடிக்கையும் எடுக்கப்படவில்லை. இதுவரை
எடுக்கப்பட்ட நடவடிக்கை என்ன? விசாரணைக்கு உட்படுத்தப்பட்டவர்கள் யார்?
கைது செய்யப்பட்டவர்களின் விவரம் என்ன? குற்றப்பத்திரிகை தாக்கல்
செய்வதில் தாமதம் ஏன் போன்ற விவரங்களை உடனடியாக எங்களுக்குத் தெரிவிக்க
வேண்டுகிறோம். கோவையிலும், திருச்சியிலும் ஜெயலலிதா தலைமையில்
ஆர்ப்பாட்டங்கள் நடந்தபோது இதுபோன்ற கொலை மிரட்டல் கடிதங்கள் வரவில்லை.
மதுரையில் ஆர்ப்பாட்டம் நடத்தப்படும் என்ற அறிவிப்புக்குப் பிறகே இதுபோன்ற
கடிதங்கள் வருகின்றன. மேலும், இந்தக் கடிதங்கள் அனைத்தும் மதுரையை மையமாக வைத்தும், மத்திய அமைச்சர் அழகிரியின் பெயரைக் குறிப்பிட்டும் எழுதப்படுகின்றன. இது
தொடர்பாக நடவடிக்கை எடுக்க வேண்டிய பொறுப்பு உள்துறையைக் கவனிக்கும்
முதல்வர் கருணாநிதிக்கு உண்டு. ஆனால் அவர் நடவடிக்கை எடுப்பார் என்ற
நம்பிக்கை எங்களுக்கு இல்லை. அழகிரியை மையமாக வைத்து எழுதப்பட்ட இந்தக் கடிதங்கள் தொடர்பாக இதுவரை அழகிரியோ, முதல்வர் கருணாநிதியோ மறுப்பு தெரிவிக்கவில்லை.
இந்தக் கடிதங்கள் மீது நடவடிக்கை எடுக்க காவல் துறை தயங்குவதாக நாங்கள்
கருதுகிறோம். ஆகவே, இது தொடர்பான அனைத்து வழக்குகளையும் சி.பி.ஐ.
விசாரணைக்கு உடனடியாக மாற்ற நடவடிக்கை எடுக்க வேண்டும் என்று மனுவில்
வலியுறுத்தப்பட்டுள்ளது.