இன்று நாடு தழுவிய வேலைநிறுத்தம்

சென்னை, செப். 6:
விலைவாசி உயர்வைக் கட்டுப்படுத்த வேண்டும் என்பது உள்ளிட்ட கோரிக்கைகளை
வலியுறுத்தி தொழிற்சங்கங்கள் நடத்தும் நாடு தழுவிய வேலைநிறுத்தப்
போராட்டம் செவ்வாய்க்கிழமை நடைபெறுகிறது. ÷அத்தியாவசியப்
பொருள்களின் விலைவாசி உயர்வைக் கட்டுப்படுத்த வேண்டும்; தொழிலாளர்களுக்கு
பணி பாதுகாப்பை உறுதிப்படுத்த வேண்டும்; அமைப்புசாரா தொழிலாளர்களுக்கான
சட்டத்தில் உரிய திருத்தங்கள் மேற்கொண்டு அமல்படுத்த வேண்டும்; லாபம்
ஈட்டும் இந்திய பொதுத் துறை நிறுவனங்களில் வெளிநாட்டு முதலீடு கூடாது;
தொழிலாளர் நலச் சட்டங்களை முழுமையாகவும், உறுதியாகவும் செயல்படுத்த
வேண்டும் என்பன உள்ளிட்ட கோரிக்கைகளை வலியுறுத்தி இந்த வேலைநிறுத்தப்
போராட்டம் நடைபெறுகிறது. ÷ஐ.என்.டி.யூ.சி., சி.ஐ.டி.யூ.,
ஏ.ஐ.டி.யூ.சி., எச்.எம்.எஸ். உள்ளிட்ட 8 தேசிய தொழிற்சங்கங்கள் இந்த
வேலைநிறுத்தப் போராட்டத்துக்கு அழைப்பு விடுத்துள்ளன. இடதுசாரி கட்சிகள்
சார்புடைய தொழிற்சங்கங்களுடன், ஆளும் காங்கிரஸ் சார்பு தொழிற்சங்கமான
ஐ.என்.டி.யூ.சி.யும் இணைந்து வேலைநிறுத்தப் போராட்டத்தில் ஈடுபடுவது
சுதந்திர இந்திய வரலாற்றில் இதுதான் முதல் முறை என்று கூறப்படுகிறது.÷மேலும்,
பா.ஜ.க. சார்பு தொழிற்சங்கமான பி.எம்.எஸ். வேலைநிறுத்தப் போராட்டத்தில்
கலந்து கொள்ளாவிட்டாலும், தனது தார்மிக ஆதரவைத் தெரிவித்துள்ளது. ÷தமிழகத்தில் மத்திய தொழிற்சங்கங்கள் நடத்தும் வேலைநிறுத்தத்துக்கு அ.தி.மு.க. சார்பிலான அண்ணா தொழிற்சங்கம் ஆதரவு தெரிவித்துள்ளது.வங்கிகள்:
இந்தப் போராட்டத்தில் பொதுத் துறை வங்கிகள், இன்சூரன்ஸ், பாதுகாப்புத்
துறை, தொலைதொடர்புத் துறை உள்ளிட்ட நிறுவனங்களின் ஊழியர்கள் பெருமளவில்
கலந்து கொள்வார்கள் என எதிர்பார்க்கப்படுகிறது. ÷தமிழகத்தில்
பொதுத் துறை மற்றும் சில தனியார் வங்கிகள் முழுமையாக செயல்படாது என
கூறப்படுகிறது. எனினும், பாரத ஸ்டேட் வங்கி ஊழியர்கள் இந்தப்
போராட்டத்தில் கலந்து கொள்ளாததால், அந்த வங்கிக் கிளைகளில் வழக்கம்போல்
பணிகள் நடைபெறும். ÷எல்.ஐ.சி., நேஷனல், யுனைடெட் இந்தியா, நியூ
இந்தியா, ஓரியண்டல் ஆகிய பொதுத் துறை இன்சூரன்ஸ் நிறுவனங்களில்
வேலைநிறுத்தம் முழு அளவில் இருக்கும் எனக் கூறப்படுகிறது. எனினும்,
தனியார் இன்சூரன்ஸ் நிறுவனங்கள் வழக்கம்போல் செயல்படும்.÷பொதுத்
துறை தொலைதொடர்பு நிறுவனமான பி.எஸ்.என்.எல். நிறுவனத்தில் பணியாற்றும்
ஊழியர்களில் பெரும் பகுதியினர் வேலைநிறுத்தத்தில் பங்கேற்பார்கள் என
எதிர்பார்க்கப்படுகிறது. அதேபோல் தபால் துறையிலும் பணிகள் பெருமளவு
பாதிக்கும் எனத் தெரிகிறது. ÷ஆவடி ராணுவ கனரக வாகனத் தொழிற்சாலை,
திருச்சி துப்பாக்கித் தொழிற்சாலை ஆகிய பாதுகாப்புத் துறை நிறுவனங்களில்
பணியாற்றும் ஊழியர்கள் பெருமளவில் வேலைநிறுத்தப் போராட்டத்தில்
கலந்துகொள்ளக்கூடும். ÷பொதுத் துறை நிறுவனங்களான திருச்சி பாரத
மிகு மின் நிறுவனம், நெய்வேலி நிலக்கரி நிறுவனம், சேலம் உருக்காலை
உள்ளிட்ட நிறுவனங்களில் பெருமளவு உற்பத்தி பாதிக்கப்படும் நிலை உள்ளது. அரசு
அலுவலகங்கள்: வருமான வரித் துறை, ஏ.ஜி. அலுவலகம், வருமான வரி, மத்திய
கலால் உள்ளிட்ட மத்திய அரசு அலுவலக ஊழியர்கள் அதிக அளவில் வேலைநிறுத்தப்
போராட்டத்தில் கலந்து கொள்வார்கள் என எதிர்பார்க்கப்படுகிறது. ÷இந்தப்
போராட்டத்துக்கு தமிழ்நாடு அரசு ஊழியர் சங்கம், தமிழ்நாடு அரசுப் பணியாளர்
சங்கம் ஆகிய சங்கங்களும் அழைப்பு விடுத்துள்ளன. எனினும், போராட்டத்துக்கு
மாநில அரசு ஊழியர்கள் மத்தியில் போதுமான ஆதரவு இருக்காது எனக்
கூறப்படுகிறது. ÷சென்னை மாவட்ட ஆட்சியர் அலுவலகம், வணிக வரித்
துறை அலுவலகம் உள்ளிட்ட சில அலுவலகங்களில் ஊழியர்கள் வருகை குறைவாக
இருக்கலாம் என எதிர்பார்க்கப்படுகிறது. போக்குவரத்து: அரசு
போக்குவரத்துத் துறையைச் சேர்ந்த முக்கிய தொழிற்சங்கங்கள்
வேலைநிறுத்தத்தில் கலந்து கொள்ளப் போவதாக அறிவித்துள்ளன. எனினும் இதற்கு
போக்குவரத்து ஊழியர்கள் மத்தியில் ஆதரவு இருக்காது என்று கூறப்படுகிறது. ÷எனவே சென்னையிலும், தமிழகத்தின் பிற பகுதிகளிலும் அரசு பஸ் போக்குவரத்தில் பாதிப்பு இருக்காது எனத் தெரிகிறது.÷ரயில்வே
தொழிற்சங்கங்கள் வேலைநிறுத்தத்துக்கு ஆதரவு தெரிவித்துள்ள போதிலும்,
போராட்டத்தில் கலந்து கொள்ளவில்லை. எனவே, ரயில் போக்குவரத்தில் பாதிப்பு
இருக்காது. ÷தமிழகத்தில் ஆட்டோக்கள் ஓடாது என்று பல
தொழிற்சங்கங்கள் அறிவித்துள்ளன. இதனால் மாநிலத்தில் குறிப்பாக சென்னையில்
சுமார் 50 சதவீத அளவுக்கு ஆட்டோ போக்குவரத்தில் பாதிப்பு இருக்கலாம் எனக்
கூறப்படுகிறது. ÷திருப்பூர் மாவட்டத்தில் பின்னலாடைத்
தொழிற்சாலைகள் முழுமையாக மூடப்படும் என்றும், கோவை மாவட்டத்தில் பொறியியல்
மற்றும் டெக்ஸ்டைல்ஸ் சார்ந்த தொழிற்சாலைகளில் உற்பத்தி முழுமையாகப்
பாதிக்கப்படலாம் என்றும் கூறப்படுகிறது. ÷மேலும், சிவகாசியில்
தீப்பெட்டித் தொழிலில் ஈடுபட்டுள்ள தொழிலாளர்களும், பீடித்
தொழிற்சாலைகளில் பணியாற்றுவோரும், டெல்டா மாவட்டங்களில் விவசாயத்
தொழிலாளர்களும் பெருமளவில் வேலைநிறுத்தத்தில் கலந்து கொள்ளும் நிலை உள்ளது.மறியல்
போராட்டம்: இதற்கிடையே மாநிலத்தின் பல்வேறு பகுதிகளில் சுமார் 200
இடங்களில் மத்திய அரசு அலுவலகங்கள் முன்பு மறியல் போராட்டம் நடத்த
சி.ஐ.டி.யூ., ஏ.ஐ.டி.யூ.சி. ஆகிய இடதுசாரி தொழிற்சங்கங்கள் அழைப்பு
விடுத்துள்ளன.÷சென்னை சென்ட்ரல் ரயில் நிலையத்தில் மறியலில் ஈடுபடவும் அந்த சங்கங்கள் தீர்மானித்துள்ளன.