பத்திரிகையாளர்கள் கைது நடவடிக்கை அடக்குமுறையின் உச்சகட்டம்: ஜெயலலிதா

Last Updated :




சென்னை,
ஜூலை 24: பத்திரிகையாளர்கள் மீது பொய் வழக்குகள் போட்டு கைது நடவடிக்கை
எடுப்பது அடக்குமுறையின் உச்சகட்டம் என்று அ.தி.மு.க. பொதுச் செயலாளர்
ஜெயலலிதா கண்டனம் தெரிவித்துள்ளார்.இதுதொடர்பாக அவர் சனிக்கிழமை வெளியிட்ட அறிக்கை:தவறுகளை
சுட்டிக் காட்டும் பணியை பத்திரிகைகள் செய்கின்றன. இந்த வகையில், அரசு
விதிமுறைகளை மீறி பல கோடி ரூபாய் கிரானைட் கற்கள் கடத்தப்படுவது குறித்து
தினபூமி நாளிதழ் செய்தி வெளியிட்டிருக்கிறது. இதற்காக அதன் ஆசிரியர்
மணிமாறன், அவரது மகன் எம். ரமேஷ்குமார் உள்ளிட்டோர் ஜூலை 21 அதிகாலையில்
கைது செய்யப்பட்டு, ஜாமீனில் வெளிவர முடியாத பிரிவுகளின் கீழ் வழக்குகள்
பதிவு செய்யப்பட்டன. இது தொடர்பான ஜாமீன் மனு மதுரை
நீதிமன்றத்தின் முன்பு விசாரணைக்கு வந்த போது, முதலமைச்சரின் ஆலோசனைப்படி,
கைது செய்யப்பட்டவர்களை ஜாமீனில் விடுதலை செய்ய அரசு சார்பில் எதிர்ப்பு
தெரிவிக்கப்படவில்லை என்றும், அவர் மீது சில பிரிவுகளில் தொடுக்கப்பட்ட வழக்குகள் ரத்து செய்யப்பட்டு விட்டன என்றும் செய்திகள் வந்துள்ளன. இதிலிருந்தே,
இவர் மீது போடப்பட்ட வழக்குகள் அனைத்தும் பொய் வழக்குகள் என்பது
தெளிவாகிறது. பத்திரிகையாளர்கள் மத்தியிலும், பொதுமக்கள் மத்தியிலும்
இதற்கு பலத்த எதிர்ப்பு கிளம்பியதை அடுத்து, அவர்களை ஜாமீனில் விடுதலை
செய்ய எதிர்ப்பு தெரிவிக்க வேண்டாம் என்று கருணாநிதி ஆலோசனை
வழங்கியிருக்கிறார். கருணாநிதியின் இந்த இரட்டை வேடத்தை நினைக்கும்
போது பிள்ளையையும் கிள்ளிவிட்டு தொட்டிலையும் ஆட்டுகின்ற பழமொழி தான்
நினைவுக்கு வருகிறது. காவல் துறையால் மேற்படி பத்திரிகையாளர்கள் மீது
பதிவு செய்யப்பட்ட பொய் வழக்குகள் அனைத்தும் உடனடியாக ரத்து செய்யப்பட
வேண்டும் என்று வலியுறுத்தி கேட்டுக் கொள்கிறேன். ஏற்கெனவே
தமிழ்நாட்டின் கனிம வளமான மணல் தி.மு.க-வினரால் தமிழகம் எங்கும்
கொள்ளையடிக்கப்பட்டு வருகிறது. இதன் மூலம் ஆட்சியாளர்களுக்கு லாபம்
கிடைப்பதால் அரசு எந்தவிதமான நடவடிக்கையும் எடுக்கவில்லை என்றும் பரவலாகப்
பேசப்படுகிறது.இந்தச் சூழ்நிலையில், கிரானைட் பற்றி செய்தி வெளியானதும் பத்திரிகையாளர்கள் கைது செய்யப்பட்டுள்ளனர்.தற்போது
மீண்டும் மேற்படி பத்திரிகையாளர்கள் மீது மேலும் புதிய வழக்குகளை பதிவு
செய்ய காவல் துறையினர் நடவடிக்கை எடுத்து வருவதாக செய்திகள் வருகின்றன.
கிரானைட் கற்கள் கடத்தப்படுவது குறித்து சென்னை உயர் நீதிமன்றத்தில்
வழக்கு நிலுவையில் இருக்கும் போது, இது போன்ற கைது நடவடிக்கையை தி.மு.க.
அரசு எடுத்ததும், மேலும் புதுப்புது வழக்குகளை அவர்கள் மீது காவல் துறை
தொடுக்க நினைப்பதும் அடக்குமுறையின் உச்சகட்டம் ஆகும்.ஜனநாயகத்திற்கும்,
பத்திரிகை சுதந்திரத்திற்கும் எதிரான தி.மு.க. அரசின் இந்தச் செயலுக்கு
எனது கடும் கண்டனத்தைத் தெரிவித்துக் கொள்கிறேன் என்று ஜெயலலிதா
கூறியுள்ளார்.

ஒரே குட்டையில் ஊறிய மட்டைகள் தான்