எம்.பி.க்களுக்கு ஊதிய உயர்வு: ரூ.16 ஆயிரத்தில் இருந்து ரூ.80 ஆயிரம் ஆகிறது

by **மாலதி** Wed Jul 21, 2010 7:11 am

Last Updated :

எம்.பி.க்களுக்கு ஊதிய உயர்வு: ரூ.16 ஆயிரத்தில் இருந்து ரூ.80 ஆயிரம் ஆகிறது Parliment

புது
தில்லி, ஜூலை 20: மக்களவை மற்றும் மாநிலங்களவை உறுப்பினர்களின் ஊதியம்
ரூ.16 ஆயிரத்தில் இருந்து ரூ.80 ஆயிரமாக உயர்த்தப்பட உள்ளது.நாடாளுமன்ற
மழைக் கால கூட்டத் தொடரில் தாக்கல் செய்யப்பட வேண்டிய மசோதாக்களின்
முன்னுரிமைப் பட்டியலில் எம்.பி.க்களின் ஊதிய உயர்வு மசோதாவும்
இடம்பெற்றுள்ளது.நாடாளுமன்ற மழைக் கால கூட்டத் தொடர் திங்கள்கிழமை (ஜூலை 26) தொடங்குகிறது.ஆகஸ்ட்
27 வரை நடைபெற உள்ள இந்த கூட்டத் தொடரில் மேற்கொள்ள வேண்டிய அலுவல்கள்
தொடர்பாக பல்வேறு அமைச்சகங்கள், துறைச் செயலர்களுடன் நாடாளுமன்ற விவகாரத்
துறை அமைச்சர் பவன்குமார் பன்சால் செவ்வாய்க்கிழமை ஆலோசனை நடத்தினார்.நாடு
முழுவதும் ஏழை, எளிய மக்கள் விலைவாசி உயர்வால் கடுமையாக பாதிக்கப்பட்டுள்ள
நிலையில், எம்.பி.க்களின் ஊதிய உயர்வு மசோதா முன்னுரிமைப் பட்டியலில்
இடம்பெற்றுள்ளது குறிப்பிடத்தக்கது.மொத்தம் உள்ள 795
எம்.பி.க்களுக்கு (மக்களவை 545, மாநிலங்களவை 250) கடைசியாக ஊதிய உயர்வு
சுமார் 10 ஆண்டுகளுக்கு முன் அளிக்கப்பட்டது.இந்நிலையில், எம்.பி.க்களின் ஊதிய உயர்வு குறித்து முடிவு செய்ய காங்கிரஸ் எம்.பி. சரண்தாஸ் மஹந்த் தலைமையில் குழு அமைக்கப்பட்டது.எம்.பி.க்களின்
ஊதியத்தை ரூ.16 ஆயிரத்தில் இருந்து ரூ.80 ஆயிரமாகவும், நாடாளுமன்ற கூட்டத்
தொடர் நடைபெறும் நாள்களில் வழங்கப்படும் படியை ரூ.ஆயிரத்தில் இருந்து ரூ.2
ஆயிரமாகவும், அலுவலகப் பயன்பாட்டு நிதி, தொகுதி மேம்பாட்டு நிதி ஆகியவற்றை
கணிசமாக உயர்த்தவும் அந்தக் குழு பரிந்துரைத்தது.குழுவின்
பரிந்துரையின்பேரில் இப்போது வரைவு மசோதா தயார் செய்யப்பட்டு வருகிறது.
இந்த மசோதா மழைக் கால கூட்டத் தொடருக்கான முன்னுரிமைப் பட்டியலில் உள்ளது.நாடாளுமன்றத்தில்
அறிமுக நிலையிலேயே பாரதிய ஜனதா, இடதுசாரிக் கட்சிகள் எதிர்ப்பு தெரிவித்த
அணு விபத்து நஷ்ட ஈட்டு மசோதா, நீதித் துறை சீர்திருத்த மசோதா ஆகியவையும்
இந்த கூட்டத் தொடருக்கான முன்னுரிமைப் பட்டியலில் இடம்பெற்றுள்ளன.தேசிய
ஆலோசனை கவுன்சில் விவாதித்து வரும் வகுப்பு கலவர மசோதா, நகராட்சிகளில்
மகளிருக்கு இப்போதுள்ள 33 சதவீத இட ஒதுக்கீட்டை 50 சதவீதமாக உயர்த்தும்
மசோதா ஆகியவையும் முன்னுரிமைப் பட்டியலில் உள்ளன.மகளிர் இட
ஒதுக்கீடு மசோதா: சட்டப் பேரவை, மக்களவையில் மகளிருக்கு 33 சதவீதம் இட
ஒதுக்கீடு செய்யும் வகையில் தயார் செய்யப்பட்ட மகளிர் இட ஒதுக்கீடு மசோதா
மாநிலங்களவையில் நிறைவேற்றப்பட்டது.அந்த மசோதா இந்தத்
தொடரில் மக்களவையில் நிறைவேற்றப்படுமா என்பது குறித்து "சஸ்பென்ஸ்'
நீடிக்கிறது. இக் கூட்டத் தொடருக்கான முன்னுரிமைப் பட்டியலில் மகளிர் இட
ஒதுக்கீடு மசோதா இடம்பெறவில்லை.மொத்தத்தில், இந்தக் கூட்டத்
தொடரில் மக்களவை அல்லது மாநிலங்களவையில் சுமார் 110 மசோதாக்கள் தாக்கல்
செய்யப்பட உள்ளன என்பது குறிப்பிடத்தக்கது.