பொறியியல் கல்லூரிகளில் கூடுதல் கட்டண வசூலா? புகார் தெரிவிக்க குழு அமைப்பு

சென்னை, ஜூலை 15:
பொறியியல் கல்லூரிகளில் கூடுதல் கட்டணம் வசூலித்தாலோ அல்லது நன்கொடை
வசூலித்தாலோ புகார் தெரிவிக்க குழு ஒன்று அமைக்கப்பட்டுள்ளது.தமிழகத்தில்
உள்ள சுயநிதி பொறியியல் கல்லூரிகளில் மாணவ, மாணவிகளிடம் எவ்வளவு கட்டணம்
வசூலிக்க வேண்டும் என்பதை, ஓய்வு பெற்ற நீதிபதி என்.வி. பாலசுப்பிரமணியன்
தலைமையிலான குழு நிர்ணயித்துள்ளது.இதன்படி, அரசு ஒதுக்கீட்டில்
தரச்சான்று பெறாத பாடப் பிரிவுகளில் சேரும் மாணவர்களிடம் ஆண்டுக்கு ரூ.
32,500 கட்டணம் வசூலிக்க வேண்டும். தரச்சான்று பெற்ற பாடப் பிரிவில்
சேரும் மாணவர்களிடம் ஆண்டுக்கு ரூ. 40 ஆயிரம் வசூலிக்க வேண்டும்.அரசு
ஒதுக்கீடு இல்லாமல், நிர்வாக ஒதுக்கீட்டின் கீழ் தரச்சான்று மற்றும்
தரச்சான்று பெறாத பாடப் பிரிவுகளில் சேரும் மாணவர்களிடம் ஆண்டுக்கு ரூ.
62,500 வசூலிக்க வேண்டும்.இந்த கட்டணங்களைவிட கூடுதல் கட்டணங்கள்
வசூலித்தாலோ அல்லது நன்கொடை வசூலித்தாலோ புகார் தெரிவிக்க, தமிழ்நாடு
மாநில தொழில்நுட்பக் கல்வி மன்ற துணைத் தலைவர் எம்.எஸ். பழனிச்சாமி
தலைமையில் குழு ஒன்று அமைக்கப்பட்டுள்ளது.மாணவர்களும், பெற்றோரும்
044 - 22353755 என்ற தொலைபேசியில் குழுத் தலைவர் எம்.எஸ். பழனிச்சாமியை
நேரடியாக தொடர்பு கொண்டு புகார் தெரிவிக்கலாம். மேலும் குழு
உறுப்பினர்களான சென்னை அண்ணா பல்கலைக்கழக துணை வேந்தர் பி. மன்னர் ஜவஹரை
044 - 22353445, 223531445 ஆகிய தொலைபேசிகளிலும், தமிழ்நாடு மாநில
தொழில்நுட்பக் கல்வி மன்ற உறுப்பினர் செயலர் எ.எம். சமீயுல்லாவை 044 -
22353755 என்ற தொலைபேசியிலும் தொடர்பு கொண்டு புகார் தெரிவிக்கலாம். அருகிலுள்ள
அரசு பொறியியல் கல்லூரி முதல்வர்களிடமும், சம்பந்தப்பட்ட
பல்கலைக்கழகத்திடமும் புகார் தெரிவிக்கலாம் என தமிழ்நாடு தொழில்நுட்ப
கல்வி இயக்குநர் குமார் ஜெயந்த் தெரிவித்துள்ளார்.