ஜெயலலிதா கண்டனம்

by **மாலதி** Mon Jun 28, 2010 7:10 am

Last Updated :

சென்னை,
ஜூன் 27: அ.தி.மு.க. இலக்கிய அணித் தலைவர் பழ. கருப்பையா மீது
ஞாயிற்றுக்கிழமை நடைபெற்ற தாக்குதல் சம்பவத்துக்கு, அக்கட்சியின் பொதுச்
செயலாளர் ஜெயலலிதா கண்டனம் தெரிவித்துள்ளார். இது குறித்து அவர் வெளியிட்ட அறிக்கை: தமிழ்நாட்டில்
தமிழர்கள் பேசுவதற்கும், எழுதுவதற்கும் கூட உரிமைகள் மறுக்கப்படுகின்றன.
இந்த நிலையில், உலகத் தமிழ்ச் செம்மொழி மாநாடு என்ற தன்னல தம்பட்ட
மாநாட்டை நடத்திக் கொண்டிருக்கிறார் முதல்வர் கருணாநிதி. பேச்சுரிமை,
எழுத்துரிமை, கருத்துரிமை ஆகியவை இந்திய அரசியல் அமைப்புச் சட்டத்தில்
இந்திய குடிமக்கள் அனைவருக்கும் அளிக்கப்பட்டுள்ள அடிப்படை உரிமைகள். இந்த
உரிமைகளைக் கூட தமிழர்கள் அனுபவிக்க முடியாத சூழ்நிலை இப்போது
தமிழ்நாட்டில் ஏற்பட்டு இருக்கிறது.முதல்வர் கருணாநிதி
தமிழனத்துக்கு செய்த துரோகத்தைப் பற்றியும், உலகத் தமிழ்ச் செம்மொழி
மாநாடு பற்றியும் பழ. கருப்பையா தனது கருத்துகளை எடுத்துரைத்தார். இதற்காக
தி.மு.க.வினர் அவருடைய வீட்டுக்குள் புகுந்து அவர் மீதும், அவரது
குடும்பத்தினர் மீதும் தாக்குதல் நடத்தியுள்ளனர். பழ. கருப்பையா மிகச் சிறந்த எழுத்தாளர்; தமிழ் அறிஞர். ஓர்
அரசினுடைய குறைபாடுகளை மக்களிடம் எடுத்துச் சொல்வதற்கும், அந்தக்
குறைபாடுகளை மக்கள் தெரிந்து கொள்வதற்கும் இந்திய அரசியல் அமைப்புச்
சட்டத்தில் வழி வகை செய்யப்பட்டுள்ளது. அந்த வகையில்தான் பழ. கருப்பையா
தனது கருத்துகளை தெரிவித்திருக்கிறார். "பேச்சுக்கு
பேச்சு; வாதத்துக்கு வாதம்' என்ற ஜனநாயகத்தைத்தான் அண்ணா கடைப்பிடித்தார்.
ஆனால், அண்ணாவின் பாசறையில் வளர்ந்தவர் என்று கூறிக் கொள்ளும் கருணாநிதி,
அரசை விமர்சிப்பவர்களை வன்முறை மூலம் அடக்க நினைப்பது ஜனநாயக விரோதச்
செயல்.இதற்கு எனது கண்டனத்தை தெரிவித்துக் கொள்வதோடு,
தாக்குதல் நடத்தியவர்கள் மீது காவல் துறையினர் சட்டப்படி உடனடியாக
நடவடிக்கை எடுக்க வேண்டும் என்று வலியுறுத்தியுள்ளார் ஜெயலலிதா.