போபாலில் பலியானவர்கள் குடும்பங்களுக்கு ரூ.10 லட்சம் நஷ்டஈடு : ரூ.1,500 கோடியை ஒதுக்க அமைச்சரவை குழு

by **ஜனனி** Tue Jun 22, 2010 7:09 am

புதுடில்லி
: போபால் விஷவாயு கசிவு சம்பவத்தில் இறந்தவர்களின் குடும்பத்திற்கு தலா 10
லட்சம் ரூபாய் வழங்க வேண்டும். இதற்காக 1,500 கோடி ரூபாயை ஒதுக்க
வேண்டும். யூனியன் கார்பைடு நிறுவனத்தின் முன்னாள் தலைவர் வாரன் ஆன்டர்சனை
பிடித்து கொண்டு வர மத்திய அரசு புதிதாக முயற்சி மேற்கொள்ள வேண்டும் என,
மத்திய அமைச்சர்கள் குழு பரிந்துரை செய்துள்ளது. இந்தப் பரிந்துரைகளை
மத்திய அமைச்சரவை வரும் வெள்ளிக்கிழமை பரிசீலிக்கிறது.
போபால் விஷவாயு சம்பவம் குறித்து ஆய்வு செய்ய, மத்திய உள்துறை அமைச்சர்
சிதம்பரம் தலைமையில் புதிய குழு ஒன்றை பிரதமர் மன்மோகன் சிங் சமீபத்தில்
நியமித்தார். இந்தக் குழுவினர், மூன்று நாட்களாக பல்வேறு விஷயங்கள்
குறித்து ஆலோசித்தனர். நான்காவது நாளாக நேற்றும் ஆலோசனை நடந்தது. இந்த
ஆலோசனையில் எடுக்கப்பட்ட முடிவுகள் குறித்து மத்திய அரசு அதிகாரிகள்
கூறியதாவது:போபால் விஷவாயு கசிவு நிகழ்ந்தவுடன் 5,295 பேர் உடனடியாக
இறந்தனர்; 10,047 பேர் பல்வேறு விதமான நோய் பாதிப்புக்கு ஆளாகி பின்னர்
இறந்தனர். விஷவாயுவால் மொத்தம் பாதிக்கப்பட்ட 5.60 லட்சம் பேரில், 37
ஆயிரம் பேர் நிரந்தரமாக ஊனம் அடைந்தனர்; மற்றவர்கள் எல்லாம் லேசான
பாதிப்பு அடைந்தனர்.இந்த சம்பவம் குறித்து மத்திய அமைச்சர்கள் குழு ஆலோசனை
நடத்தியது.
அப்போது, விஷவாயுவால் பாதிக்கப்பட்டவர்களுக்கு நிவாரணம் மற்றும்
மறுவாழ்வு வழங்குவது உட்பட பல விஷயங்கள் குறித்து
ஆலோசிக்கப்பட்டன.பின்னர், விஷவாயு தாக்கி இறந்தவர்கள் மற்றும்
ஊனமடைந்தவர்களின் குடும்பத்திற்கு உதவ, 1,500 கோடி ரூபாய் மதிப்பிலான
சிறப்புத் திட்டம் ஒன்றை செயல்படுத்த வேண்டும். குறிப்பாக இறந்தவர்களின்
குடும்பத்திற்கு தலா 10 லட்சம் ரூபாய் இழப்பீடு வழங்க வேண்டும்.
நிரந்தரமாக ஊனமடைந்தவர்கள் மற்றும் மோசமான நோயால் பாதிக்கப்பட்டவர்களுக்கு
தலா ஐந்து லட்சம் ரூபாய் வழங்க வேண்டும். சிறிதளவு
பாதிக்கப்பட்டவர்களுக்கு மூன்று லட்சம் ரூபாய் வழங்க வேண்டுமென
அமைச்சர்கள் குழு, மத்திய அரசுக்கு பரிந்துரை செய்துள்ளது. இந்தப்
பரிந்துரைகள் குறித்து மத்திய அமைச்சரவை வரும் வெள்ளிக்கிழமை
விவாதிக்கும்.நிவாரணத்திற்கு முக்கியத்துவம்: இவ்வாறு மத்திய அரசு
அதிகாரிகள் கூறினர்.
அமைச்சர்கள் குழு கூட்டம் தொடர்பாக, உள்துறை அமைச்சர் சிதம்பரம் நிருபர்களிடம் கூறியதாவது:இன்று
(நேற்று) நடந்த அமைச்சர்கள் குழுவின் கூட்டத்தில், பல முக்கியமான
பரிந்துரைகளை மத்திய அரசுக்கு அனுப்ப முடிவு செய்யப்பட்டுள்ளது. விஷவாயு
சம்பவத்தினால், பாதிக்கப்பட்டவர்களுக்கு நிவாரணம் வழங்குவது தொடர்பான
விஷயத்திற்கு அதிக முக்கியத்துவம் அளிக்கப்பட்டது. மேலும், யூனியன்
கார்பைடு நிறுவனத்தின் முன்னாள் தலைவர் வாரன் ஆன்டர்சனை இந்தியாவுக்கு
பிடித்துக் கொண்டு வர வேண்டும். அதற்கான முயற்சிகளை மத்திய அரசு மேற்கொள்ள
வேண்டும். போபால் விஷவாயு கசிவு வழக்கில் குற்றம் சாட்டப்பட்டவர்களுக்கு
எதிரான குற்றச்சாட்டுகள் தளர்த்தப்பட்டதால், சுப்ரீம் கோர்ட்டில் நிவாரணம்
கோரும் மனுவை மத்திய அரசு தாக்கல் செய்ய வேண்டும் என்றும் கேட்டுக்
கொள்ளப்பட்டுள்ளது.மேலும், விஷவாயு கசிவு நிகழ்ந்த ஆலையில் உள்ள
நச்சுக்கழிவுகளை சுத்தம் செய்வது மற்றும் கொடிய விஷப் பொருட்களை அங்கேயே
புதைப்பது போன்றவை குறித்தும் பரிந்துரைகள் வழங்கப்பட்டுள்ளன. இந்த
சுத்தம் செய்யும் பணியை மத்திய பிரதேச அரசே மேற்கொள்ள வேண்டும்.
அதற்கு தேவையான நிதியுதவி மற்றும் தொழில்நுட்ப உதவிகளை மத்திய அரசு
வழங்க வேண்டும். இதற்காக 300 கோடி ரூபாய் தர வேண்டும் என்றும் யோசனை
தெரிவிக்கப்பட்டுள்ளது. போபால் விஷவாயு சம்பவத்திற்குப் பின் துவக்கப்பட்ட
போபால் நினைவு அறக்கட்டளை மருத்துவமனையை மேம்படுத்த, 230 கோடி ரூபாய்
வழங்க வேண்டும் என்றும் பரிந்துரைக்கப்பட்டுள்ளது. விஷவாயு சம்பவத்தினால்
பாதிக்கப்பட்டவர்களுக்கு, புதிய சலுகை திட்டத்தின்படி நிவாரணத் தொகை
வழங்கும் போது, ஏற்கனவே வழங்கப்பட்ட நிவாரணத் தொகை கழித்துக்
கொள்ளப்படும்.விஷவாயு கசிவால் ஆயிரக்கணக்கானவர்கள் பாதிக்கப்பட்டனர்.
அவர்கள் விஷயத்தில் மத்திய அரசு மிகவும் அனுதாபப்படுகிறது.
குறிப்பிடத்தக்க பல பரிந்துரைகளை மத்திய அரசுக்கு வழங்கியுள்ளோம்.
அமைச்சர்கள் குழுவின் கூட்டம் இத்துடன் முடிந்து விடாது. வேறு எந்தப்
பிரச்னைகள் குழுவின் முன் வைக்கப்பட்டாலும், அது பற்றியும் பரிசீலிக்கும்.
இவ்வாறு அமைச்சர் சிதம்பரம் கூறினார்.
மத்திய உள்துறை அமைச்சகம் முன் ஆர்ப்பாட்டம் : போபால் விஷவாயு
சம்பவத்தில் உயிர் பிழைத்தவர்களில் ஒரு பிரிவினர், நேற்று மத்திய உள்துறை
அமைச்சகம் முன் ஆர்ப்பாட்டம் நடத்தினர்.சிதம்பரம் தலைமையில் அமைச்சர்கள்
குழு கூட்டம் நடந்த சிறிது நேரத்திற்குப் பின், "போபால் விஷவாயு பீதித்
நயாய் மோர்ச்சா' என்ற அமைப்பைச் சேர்ந்தவர்கள் இந்த ஆர்ப்பாட்டத்தை
நடத்தினர். விஷவாயு சம்பவத்தால் பாதிக்கப்பட்டவர்களுக்கு போதிய இழப்பீடு
வழங்க வேண்டும் என்பது உட்பட பல கோரிக்கைகள் முன்வைக்கப்பட்டன.