செம்மொழி மாநாடு ; கோவை வந்தார் முதல்வர் கருணாநிதி; தாரை, தப்பட்டை முழங்க வரவேற்பு

சென்னை: நாளை மறுநாள் கோவையில் துவங்கும் உலகத் தமிழ்ச் செம்மொழி
மாநாட்டில் பங்கற்கும் விதமாக 2 நாள் முன்னதாக கோவை புறப்பட்டு வந்தார்
முதல்வர் கருணாநிதி. இவருக்கு தாரை , தப்பட்டை முழங்கிட சிறப்பான வரவேற்பு
அளிக்கப்பட்டது. விமான நிலையத்தில் இருந்து தங்கும் ரெசிடன்சி ஓட்டலுக்கு
சென்றபோது வீதியின் இரு வழிகளிலும் , தமிழ் ஆர்வலர்கள், பொதுமக்கள்
கையசைத்து வரவேற்றனர்.

இவரது வருகையை முன்னிட்டு அவிநாசி சாலையில் ஆங்காங்கே தாரை, தப்பட்டை
வாத்தியங்கள் முழங்கின. இன்று மதியம் 12. 30 மணியளவில் விமானம் மூலம் கோவை
வந்தார். இவருடன் அமைச்சர்கள், ஆற்காடு வீராச்சாமி, பொன்முடி, தலைமை
செயலர் ஸ்ரீபதி ஆகியோர் உடன் வந்தனர். துணை முதல்வர் ஸ்டாலின் தலைமையில்
அமைச்சர்கள் வரவேற்றனர். மாநாட்டை யொட்டி கோவை 11 இடங்களில் கலைவிழா
நடக்கிறது. இந்த கலை விழாவை இன்று மாலையில் முதல்வர் கருணாநிதி
கண்டுகளிப்பார். தொடர்ந்து மாநாட்டு அரங்கிற்கு சென்று முக்கிய ஏற்பாடுகளை
பார்வையிடுவார் என தெரிகிறது.

உணவு அரங்கம் திறப்பு : முன்னதாக மாநாடு நடக்கும் மைதானத்தில்
துணை முதல்வர் ஸ்டாலின் இன்று ( திங்கட்கிழமை ) 2 உணவுக்கூடத்தை துவக்கி
வைத்தார். கண்காட்சி அரங்கம் முன்பாக அமைந்துள்ள இந்த உணவுக்கூடத்தில் 20
நிறுவனங்கள் பல்வேறு சுவையான உணவுவகைளை தயாரித்து மக்களுக்கு வழங்கும்.
பொதுமக்களுக்கென அமைக்கப்பட்டுள்ள இங்கு சைவம், மற்றும் அசைவ உணவு வகைகள்
கிடைக்கும். குறைந்த விலையில் உணவு வழங்க ஏற்பாடு செய்யப்பட்டுள்ளது. 434
வகையான உணவுகள் தயாரித்து வழங்கப்படுகிறது. மக்கள் வாங்கி செல்வதற்கு 52
முகப்புகள் அமைக்கப்பட்டுள்ளன. தொடர்ந்து செய்தியாளர்களுக்கென
அமைக்கப்பட்டுள்ள ஊடக அரங்கை ஸ்டாலின் துவக்கி வைத்தார். இங்கு நிருபர்கள்
உடனுக்குடன் செய்திகளை கோர்வை செய்யவும், பத்திரிகை அலுவலகங்களுக்கு
அனுப்பி வைக்கவும் உரிய வசதி செய்து கொடுக்கப்பட்டுள்ளது. 100 கணினிகளும்,
50 லேப்டாப்புகளும் வைக்கப்பட்டுள்ளது.

10 ஆயிரம் போலீசார் : மாநாடு பாதுகாப்புப் பணியில், 33
ஐ.பி.எஸ்., அதிகாரிகள் மற்றும் 10 ஆயிரம் போலீசார் ஈடுபடுகின்றனர். கோவை
"கொடிசியா' கண்காட்சி வளாகத்தில், உலகத் தமிழ்ச் செம்மொழி மாநாடு வரும்
23ம் தேதி துவங்கி, 27ம் தேதி வரை நடக்கிறது. இதற்காக பிரமாண்ட
நுழைவாயில், பந்தல், மேடை, அலங்கார பணிகள், ஒலி - ஒளி அமைப்பு, பழங்கால
அரிய பொருட்கள் இடம்பெறும் கண்காட்சி அரங்கம் ஆகியவை அமைக்கப்பட்டுள்ளன.

இது தவிர, ஆய்வுக்கட்டுரைகளை சமர்ப்பிப்பதற்கும், விவாதிப்பதற்கும் 21
ஆய்வரங்குகள், ஒரே நேரத்தில் 75 ஆயிரம் பேர் அமர்ந்து உணவு அருந்தும் வசதி
கொண்ட பிரமாண்டமான உணவுக்கூடம், மருத்துவமனை, தீயணைப்பு கட்டுப்பாட்டு
அறைகள், போலீஸ் கட்டுப்பாட்டு அறைகள், உளவு பார்க்க விமானம் என்று ஏராளமான
வசதிகள் செய்யப்பட்டுள்ளன.முதல் நாளன்று அலங்கார ஊர்திகள் அணிவகுத்துச்
செல்லும் பேரணியில் இடம்பெறும் 40 அலங்கார ஊர்திகள் வடிமைக்கப்பட்டு,
இறுதிகட்ட பணிகள் நடந்து வருகின்றன. ஊர்வலத்தை பார்வையிட அவினாசி ரோடு
ஹோப் காலேஜ் முதல் ரங்கவிலாஸ் மில் வரை 1.5 கி.மீ.,க்கு நீண்ட மேடை
அமைக்கப்பட்டுள்ளது.ஜனாதிபதி, கவர்னர், முதல்வர், துணை முதல்வர்
பார்வையிடுவதற்காக சி.ஐ.டி., கல்லூரி அருகே, குண்டு துளைக்காத தனி மேடை
அமைக்கப்பட்டு வருகிறது.
கோவை ரயில்வே ஸ்டேஷன் எதிரில் சிறப்பு வரவேற்பு மையம்
அமைக்கப்பட்டுள்ளது. செம்மொழி மாநாட்டில் பங்கேற்க தமிழறிஞர்கள் நேற்று
முன்தினம் முதலே வரத் துவங்கிவிட்டனர். நேற்றைய நிலவரப்படி, 50 அறிஞர்கள்
கோவை வந்துள்ளனர்.முதல்வர் கருணாநிதி இன்று வந்தார். ஜனாதிபதி பிரதிபா
பாட்டீல் நாளை மாலை கோவை வருகிறார். அவர் தங்கும் அரசு விருந்தினர் மாளிகை
தயார் நிலையில் உள்ளது. மாநாட்டையொட்டி, கோவை நகர் அலங்கார விளக்குகளால்
அழகுபடுத்தப்பட்டு மின்னொளியில் ஜொலிக்கிறது.
செம்மொழி மாநாட்டு பாதுகாப்பு பணியில், கோவை நகர் மற்றும் புறநகர்
பகுதிகளில், 33 ஐ.பி.எஸ்., அதிகாரிகள் மற்றும் 10 ஆயிரம் போலீசார்
ஈடுபடுகின்றனர்.முக்கிய தலைவர்கள் மற்றும் மாநாட்டு பாதுகாப்பு பணிகளை
பார்வையிட டி.ஜி.பி., லத்திகா சரண், சட்டம் ஒழுங்கு கூடுதல் டி.ஜி.பி.,
ராதாகிருஷ்ணன் ஆகியோர் நேற்று கோவை வந்தனர்.
மாநாடு முடியும் வரை கோவையில் முகாமிட்டு, பாதுகாப்பு பணிகளை
மேற்பார்வையிட உள்ளனர்.செம்மொழி மாநாட்டு பந்தல், கண்காட்சி அரங்கம்
ஆகியவற்றை பாதுகாக்கும் பணியில் தீயணைப்பு மற்றும் மீட்புப் படையினர்
ஈடுபடுகின்றனர். இதற்காக, தமிழகம் முழுவதும் இருந்து 1,000 தீயணைப்பு
வீரர்கள் நேற்று கோவை வந்தனர். இவர்களில் 100 பேர் கமாண்டோ வீரர்கள் ஆவர்.
ஸ்டாலின் பார்வை: செம்மொழி மாநாட்டு ஆய்வரங்க குழு செயலர்
கனிமொழி, ஒவ்வொரு அலங்கார ஊர்திகளிலும் காட்சிகள் அழகுமிளிர
வடிவமைக்கப்பட்டுள்ளதை துணை முதல்வர் ஸ்டாலினிடம் விளக்கினார்.இதையடுத்து,
திருச்சி ரோடு சுங்கம் அருகே அமைக்கப்பட்டுள்ள மாநகராட்சி பூங்காவையும்,
16 கோடி ரூபாயில் திருச்சி ரோடு அகலப்படுத்தும் பணிகள்
நிறைவடைந்துள்ளதையும் அவர் பார்வையிட்டார்.