எவன் கதை கேட்குறான்? -சீறிய தங்கர்பச்சானுக்கு செமத்தியான குட்டு!

by **ஜனனி** Sat Jun 12, 2010 10:08 pm

அரிது
அரிது படத்தின் பாடல் வெளியீட்டு விழாவுக்கு வந்த தங்கர்பச்சான் கூறிய சில
கருத்துகள் அந்த அரங்கத்தில் சர்சையை ஏற்படுத்தின. தயாரிப்பாளர்கள்
இல்லைன்னா இங்க இருக்கிற மைக், கேமிரா, இந்த தியேட்டர் எதுவுமே இல்லை.
ஆனால் அவங்க நல்லாயிருக்காங்களா என்ற கேள்வியோடு நியாயமாகதான் துவங்கியது
அவரது பேச்சு. போக போக அது அபத்த கலவையாக மாறியதுதான் வியப்பு.
வாழ்த்துவார் என்றுதான் அழைத்தார்கள். அவரோ, சாபம் கொடுக்காத குறை.

பிரமாண்டமா
எடுத்திருக்கோம்னு இங்க பேசினாங்க. எதுக்காக தேவையில்லாத பிரமாண்டம்?
இன்னைக்கு 100 தயாரிப்பாளர் வந்தா அதில் ஒருத்தருதான் ஜெயிக்கிறாரு.
மற்றவங்க எங்க போறாங்க என்றே தெரியல. இந்த படத்துக்கு வெளிநாட்ல
படப்பிடிப்பு நடந்திச்சாம். தமிழ் படத்துக்கு எதுக்குங்க வெளிநாட்டுக்கு
போகணும்? இங்க எடுத்தா ஆவாதா? இப்படிதான் காசை கொண்டு போய் கரியாக்கிட்டு
கடன் காரங்களா திரியுறாங்க. இந்த படத்தின் தயாரிப்பாளர் என்னோட
உறவுக்காரர்தான். படம் எடுக்க போறாருன்னு முன்னாடியே தெரிஞ்சிருந்தா
கன்னத்தில அறைஞ்சாவது தடுத்திருப்பேன். இங்க எந்த ஹீரோவும் கதை
கேட்கறதில்ல. தயாரிப்பாளரும் ஸ்கிரிப்ட் புக்கை கொடுத்தா படிச்சு
பார்க்கறதே இல்ல. என்னோட கார்ல நாலைஞ்சு ஸ்கிரிப்ட் பைண்டிங் பண்ணி
அப்படியே கிடக்கு என்று பேசிக் கொண்டே போக, மேடையிலிருந்தவர்கள் நெளிய
ஆரம்பித்தார்கள்.

அதோடு விட்டாரா?
தயாரிப்பாளர் சங்க தலைவர் ராம.நாராயணன், செயலாளர் சிவசக்தி பாண்டியன்
ஆகியோரையும் வைத்துக் கொண்டு சங்கத்தையும் குறை சொல்ல ஆரம்பித்தார். யாரு
வந்தாலும் பணத்தை வாங்கிட்டு பதிவு பண்ணி அனுப்பிடறாங்க. அப்படி வர்ற
தயாரிப்பாளர்களிடம் இப்போ சூழ்நிலை எப்படியிருக்கு. படம் எடுத்தா
நஷ்டம்தான் வரும்னு சொல்லணும். இங்க ஒரு தயாரிப்பாளரை எப்படியெல்லாம்
ஏமாத்துறாங்கன்னு தெரியுமா? அவங்களுக்கு கவுன்சிலிங் கொடுக்கணும். ஆனால்
கொடுக்க மாட்டேங்கிறாங்க என்று கூறிவிட்டு அமர்ந்தார்.

பின்னாலேயே
பேச வந்த சிவசக்தி பாண்டியன், ஆறு மாசத்துக்கு ஒரு தடவ கூட கவுன்சில்
பக்கம் வர்றதில்ல இந்த தங்கர்பச்சான். எங்காவது மேடை கிடைச்சா எதையாவது
பேசிட்டு போயிடுறாரு. நாங்க கவுன்சிலிங் கொடுக்கலைன்னு அவருக்கு தெரியுமா?
நாங்களும் புதுசா வர்ற தயாரிப்பாளர்களிடம் இந்த தொழிலில் எவ்வளவு கஷ்டம்
இருக்குன்னு சொல்லிதான் பதிவு பண்ணுறோம். அதை கேட்காம போய் விழுந்தா நாங்க
என்ன செய்யுறது? இதே தயாரிப்பாளர் எனக்கு உறவினர்னு சொன்னாரே,
ஆஸ்திரேலியாவுல எடுத்த பிலிம் பாக்சை இங்க எடுத்திட்டு வர முடியாம அவரு
கஷ்டப்பட்ட போது இவரு எங்க போயிருந்தாரு? தயாரிப்பாளர் சங்கம்தான் இதில
தலையிட்டு அந்த படப் பெட்டிகளை இந்தியாவுக்கு எடுத்திட்டு வந்திச்சு.
எப்படியாவது இந்த துறையில நுழைஞ்சு முன்னேறிடணும்னு துடியா துடிக்கிறவன்
ஒருபக்கம் இருக்காங்க. வாய்ப்பு கிடைச்சு முன்னேறினவங்க புதுசா
வர்றவங்களுக்கு வழிவிடுவோம்னு நினைக்க மாட்டேங்கிறாங்க என்று தங்கர்
பச்சானுக்கு செமத்தியாக ஒரு குட்டு வைத்துவிட்டு அமர்ந்தார் சிவசக்தி
பாண்டியன்.

இனிமே பேசுவாரு...?