அரசு கட்டண நிர்ணய எதிரொலி: திருச்சியில் பள்ளியை மூட முடிவு

திருச்சி : தமிழக அரசின் குறைந்த கட்டண நிர்ணயத்தினால் திருச்சியைச்
சேர்ந்த தனியார் மெட்ரிக் பள்ளி சிக்கன நடவடிக்கையாக ஒன்றாம் வகுப்பு
முதல் ஐந்தாம் வகுப்பு வரையிலான நர்சரி, பிரைமரி பள்ளியை மூட
முடிவெடுத்துள்ளது.
திருச்சி ஆல்பா மெட்ரிக்., மேல்நிலைப்பள்ளித் தலைவர் பழனி கூறியதாவது:
"கட்டண நிர்ணயம்' என்ற அரசின் எண்ணம் சிறந்ததாக இருந்தாலும், அதை
நடைமுறைபடுத்தும் முறை தவறாக இருக்கிறது. நீதிபதி கோவிந்தராஜன் குழு
மற்றும் உறுப்பினர்களின் செயல்பாடுகள் திருப்திகரமாக இல்லை.
வசூலிக்கப்படும் கட்டணங்கள் குறித்து சம்பந்தப் பட்ட பள்ளி நிர்வாகத்தை
கேட்டிருக்க வேண்டும். கட்டணத்தை அறிவித்த பிறகு ஆட்சேபனை தெரிவிக்கச்
சொல்வது நியாயம் ஆகாது. தவறான ஒரு சில பள்ளிகளை திருத்துவதற்காக பல நல்ல
பள்ளிகளை தண்டிக்கக்கூடாது.எங்களது பிரைமரி பள்ளிக்கு ஓராண்டுக்கு
ஐந்தாயிரம் ரூபாய் கட்டணமாக நிர்ணயிக்கப் பட்டுள்ளது. ஒரு வகுப்புக்கு 30
மாணவர்கள்என்றால், ஆண்டுக்கு ஒன்றரை லட்ச ரூபாய் கட்டணம். ஒரு வகுப்புக்கு
இரு ஆசிரியர்கள் கணக்கில் மாதச்சம்பளம் 10 ஆயிரம் ரூபாய் கொடுத்தாலும்,
ஆண்டுக்கு 2 லட்சத்து 40 ஆயிரமாகிறது. ஆசிரியர் சம்பளம் தவிர, பள்ளி கட்டட
வாடகை, ஸ்மார்ட் கிளாஸ், யோகா, பரதநாட்டிய சிறப்பு ஆசிரியருக்கு மாதச்
சம்பளம், ஆயாக்கள் சம்பளம் ஆகியவற்றை மட்டுமே வைத்துப்பார்த்தால்,
ஓராண்டுக்கு ஒரு மாணவருக்கு குறைந்தபட்சம் 17 ஆயிரம் ரூபாய்
செலவாகிறது.மாதம் ஆயிரத்து 500 ரூபாய் சம்பளம் வாங்குவதற்கு ஆசிரியர்கள்
சிலர் தயாராக இருக்கின்றனர்.
அவர்களுக்கு போதிய தகுதியோ, உரிய பயிற்சியோ, கற்பிக்கும் திறனோ இல்லை.
அவர்களால் மாணவர்களுக்கு தரமில்லாத கல்வியைத்தான் கொடுக்க
முடியும்.நாங்கள் அரசுப்பள்ளி ஆசிரியர்களுக்கு இணையான சம்பளம் உட்பட
சலுகைகளை ஆசிரியர்களுக்கு வழங்குகிறோம். கட்டண நிர்ணயத்துக்கு பிறகு
அவர்கள் சம்பளத்தை குறைக்க முடியாது. கடந்தாண்டு வங்கியில் செலுத்திய
பள்ளி கட்டணத்தை சில பெற்றோர் இந்தாண்டும் கட்டியுள்ளனர்.
இதுகுறித்து சி.இ.ஓ., தலைமையிலான குழு எங்கள் பள்ளியில் விசாரணை
நடத்தியது. கூடுதலாக வங்கியில் பணம் செலுத்தியவர்களுக்கு, பணத்தை திரும்ப
வழங்கி விட்டோம்.அரசு நிர்ணயித்த தொகை மட்டுமே வசூல் செய்யவேண்டும்
என்பதற்காக, நாங்கள் ஒன்று முதல் ஐந்தாம் வகுப்பு வரை நடத்தி வந்த நர்சரி,
பிரைமரி, சி.பி.எஸ்.சி., இன்டர்நேஷனல் பள்ளிகளில் அடுத்தாண்டு முதல் புதிய
மாணவர் சேர்க்கை நடத்தப் போவதில்லை.இறுதியாக மூன்று பள்ளிகளையும்
மூடப்போகிறோம். இந்த முடிவு குறித்து அரசுக்கு தெரிவித்துள்ளோம் என்றார்.

Please Mr Palani give your entire budget for the primary classes and not a tentative one. The complete budget as adopted by your school with reference to the expenses you have indicated. That will increase your credibility. This must be easy since you are heading the institution.