முத்தரப்பு தொடர்: இந்தியா "அவுட்': இலங்கையிடம் வீழ்ந்தது

ஹராரே:
முத்தரப்பு தொடரின் மிக முக்கியமான போட்டியில் சொதப்பலாக ஆடிய இந்திய அணி,
இலங்கையிடம் 6 விக்கெட் வித்தியாசத்தில் வீழ்ந்தது. இதன் மூலம் பைனல்
வாய்ப்பை இழந்து, தொடரில் இருந்து வெளியேறியது. சதம் விளாசிய சண்டிமால்,
இலங்கை அணியின் வெற்றிக்கு கைகொடுத்தார்.
முத்தரப்பு ஒருநாள்
கிரிக்கெட் தொடர் ஜிம்பாப்வேயில் நடக்கிறது. இதில் இந்திய அணி தனது கடைசி
லீக் போட்டியில் இலங்கையை எதிர்கொண்டது. 54 ரன்கள் வித்தியாசத்தில் வெற்றி
பெற்றால் தான் "போனஸ்' புள்ளியுடன், பைனல் வாய்ப்பை தக்க வைக்கலாம் என்ற
நிலையில், இந்தியா களமிறங்கியது. "டாஸ்' வென்ற இலங்கை கேப்டன் தில்ஷன்,
பீல்டிங் தேர்வு செய்தார்.
விஜய் நீக்கம்:
இந்திய
அணியில் இருந்து முரளி விஜய், அமித் மிஸ்ரா மற்றும் உமேஷ் யாதவ்
நீக்கப்பட்டனர். இவர்களுக்குப் பதில் நமன் ஓஜா, அஷ்வின் மற்றும் பங்கஜ்
சிங் அறிமுக வீரர்களாக இடம் பெற்றனர். இலங்கை அணியில் பெர்னாண்டோ,
சமரசில்வா நீக்கப்பட்டு, துஷாரா மற்றும் சமர வீரா வாய்ப்பு பெற்றனர்.
ஓஜா ஏமாற்றம்:
இந்திய
அணிக்கு இம்முறை தினேஷ் கார்த்திக்குடன் இணைந்து நமன் ஓஜா துவக்கம்
கொடுத்தார். ஆனால் ஓஜா ஒரு ரன்னுடன் வெளியேறி, அதிர்ச்சி அளித்தார்.
துஷாரா ஓவரில் இரண்டு பவுண்டரி அடித்த கார்த்திக் (27), அதிக நேரம்
தாக்குப்பிடிக்கவில்லை.
"பேட்டிங் பவர்பிளே':
பின்
விராத் கோஹ்லி, யூசுப் பதான் இணைந்து நிதான ஆட்டத்தை வெளிப்படுத்தினர்.
வழக்கத்துக்கு மாறாக 18வது ஓவரிலேயே "பேட்டிங் பவர்பிளே' எடுக்கப்பட்டது.
இதனை பயன்படுத்திய யூசுப் பதான், பெரேரா ஓவரில் மூன்று பவுண்டரி அடித்து
அசத்தினார். இவர் 44 ரன்கள் எடுத்த நிலையில் வெளியேறினார்.
கோஹ்லி அரைசதம்:
மறுமுனையில்
மெண்டிஸ் பந்தில் அடுத்தடுத்து இரண்டு பவுண்டரி விளாசிய கோஹ்லி, சர்வதேச
அரங்கில் 8வது அரைசதம் கடந்தார். இவர் 68 ரன்களுக்கு துஷாரா பந்தில்
வீழ்ந்தார். சற்று தாக்குப்பிடித்த ரோகித் சர்மா 32 ரன்களில், ரந்திவ்
சுழலில் போல்டானார். கேப்டன் ரெய்னா (19) ஏமாற்றினார். ரவிந்திர ஜடேஜா
(19) ரன் அவுட்டானார். இப்படி விரைவாக விக்கெட்டுகள் சரிய, "ரன்ரேட்'
மந்தமானது.
அஷ்வின் அதிரடி:
பின்
கடைசி கட்டத்தில் களமிறங்கிய அஷ்வின், அதிரடி ஆடிய ஸ்கோரை ஓரளவுக்கு
உயர்த்தினார். ஒரு சிக்சர், நான்கு பவுண்டரி உதவியுடன் இவர் 34 ரன்கள்
எடுக்க, இந்திய அணி 50 ஓவரில் 9 விக்கெட்டுக்கு 268 ரன்கள் எடுத்தது.
எளிய இலக்கு:
எட்டக்
கூடிய இலக்கை விரட்டிய இலங்கை அணிக்கு தில்ஷன், தரங்கா ஜோடி, சுமாரான
துவக்கம் கொடுத்தது. பங்கஜ் சிங் ஓவரில் தொடர்ந்து இரண்டு பவுண்டரி அடித்த
தில்ஷன் (21) இம்முறை விரைவில் திரும்பினார். தரங்கா, 27 ரன்கள் எடுத்தார்.
முதல் சதம்:
பின்
சண்டிமால், கபுகேதரா ஜோடி இணைந்து சிறப்பான ஆட்டத்தை வெளிப்படுத்தினர்.
தனது இரண்டாவது போட்டியில் விளையாடிய சண்டிமால், இந்திய பவுலர்கள் பாடாய்
படுத்தினார். பிரக்யான் ஓஜா சுழலில் 3 சிக்சர் அடித்து மிரட்டிய இவர்
சர்வதேச அரங்கில் முதல் சதம் கடந்தார். மூன்றாவது விக்கெட்டுக்கு 114
ரன்கள் சேர்த்த நிலையில் கபுகேதரா (40) அவுட்டானார். அணியின் வெற்றியை
உறுதி செய்த சண்டிமால் (111), அஷ்வின் சுழலில் சிக்கினார். பின் வந்த
ஜீவன் மெண்டிஸ் (35*), சமரவீரா (28*) கைகொடுக்க, இலங்கை அணி 48.2 ஓவரில் 4
விக்கெட்டுக்கு 270 ரன்கள் எடுத்து 6 விக்கெட் வித்தியாசத்தில் வெற்றி
பெற்றது.
ஆட்டநாயகன் விருதை சண்டிமால் தட்டிச் சென்றார்.
கார்த்திக்(கே)+(ப)பெரேரா 27(34)
ஒஜா-எல்.பி.டபிள்யு.,(ப)குலசேகரா 1(7)
கோஹ்லி(கே)ஜீவன்(ப)துஷாரா 68(95)
யூசுப்(கே)பெரேரா(ப)ரந்திவ் 44(41)
ரோகித்(ப)ரந்திவ் 32(40)
ரெய்னா(கே)கபுகேதரா(ப)தில்ஷன் 19(18)
ஜடேஜா-ரன் அவுட்(தில்ஷன்) 19(26)
அஷ்வின்(கே)+(ப)துஷாரா 38(32)
பங்கஜ் சிங்-அவுட் இல்லை- 3(3)
டிண்டா(கே)கபுகேதரா(ப)துஷாரா 0(1)
பிரக்யான்-அவுட் இல்லை- 5(4)
உதிரிகள் 12
மொத்தம் (50 ஓவரில் 9 விக்.,) 268
விக்கெட்
வீழ்ச்சி: 1-7(ஓஜா), 2-41(கார்த்திக்), 3-125(யூசுப்), 4-171(கோஹ்லி),
5-187(ரோகித்), 6-204(ரெய்னா), 7-255(ஜடேஜா), 8-259(அஷ்வின்),
9-259(டிண்டா).
பந்து வீச்சு: குலசேகரா 9-1-47-1, துஷாரா 9-1-57-3,
பெரேரா 4-0-33-1, மெண்டிஸ் 10-0-54-0, ஜீவன் 6-0-29-0, ரந்திவ் 10-1-38-2,
தில்ஷன் 2-0-5-1.
தரங்கா(கே)கோஹ்லி(ப)அஷ்வின் 27(38)
தில்ஷன்(கே)யூசுப்(ப)டிண்டா 21(19)
சண்டிமால்(ஸ்டம்)நமன்ஓஜா(ப)அஷ்வின் 111(118)
கபுகேதரா(கே)பங்கஜ் சிங்(ப)பிரக்யான் 42(60)
ஜீவன்-அவுட் இல்லை- 35(35)
சமரவீரா-அவுட் இல்லை- 28(21)
உதிரிகள் 6
மொத்தம் (48.2 ஓவரில் 4 விக்.,) 270
விக்கெட் வீழ்ச்சி: 1-29(தில்ஷன்), 2-81(தில்ஷன்), 3-195(கபுகேதரா), 4-215(சண்டிமால்).
பந்து வீச்சு: பங்கஜ் சிங் 7-0-45-0, டிண்டா 7.2-0-42-1, அஷ்வின் 5-0-50-2, பிரக்யான் 10-0-43-1, ஜடேஜா 10-0-54-0, யூசுப் 4-0-32-0.
*
நேற்று விராத் கோஹ்லி (1015), 53 ரன்கள் எடுத்த போது, ஒருநாள் கிரிக்கெட்
அரங்கில், இந்தியா சார்பில் அதிவேகமாக ஆயிரம் ரன்கள் எடுத்தவர்கள்
வரிசையில் முதலிடம் பிடித்தார். 27 போட்டிகள் விளையாடியுள்ள இவர், 24
இன்னிங்சில் இந்த ரன்களை எடுத்துள்ளார். இவருக்கு அடுத்த இடத்தில் சித்து
(27 போட்டியில் 25 இன்னிங்ஸ்) உள்ளார்.
* மற்றொரு இந்திய வீரர் ரோகித்
சர்மாவும் (1003), சர்வதேச கிரிக்கெட்டில் ஆயிரம் ரன்களை எட்டினார். 46
போட்டிகளில் 43 இன்னிங்ஸ் விளையாடி இந்த இலக்கை அடைந்துள்ளார்.
முத்தரப்பு
தொடரில் இந்திய அணியின் மோசமான தோல்வியை அடுத்து, ஒருநாள் அணிகள்
தரவரிசையில் இந்திய அணியின் இரண்டாவது இடம் பறிபோகிறது. தற்போது 119
புள்ளிகளுடன் இந்தியா, தென் ஆப்ரிக்க அணிகள் முறையே 2, 3வது இடத்தில்
உள்ளன. முத்தரப்பு தோல்வியால் இந்தியாவுக்கு மேலும் புள்ளிகள் குறையும்.
இதனால் மூன்றாவது இடத்துக்கு தள்ளப்படும். ஆஸ்திரேலியா (133) தொடர்ந்து
முதலிடத்தில் உள்ளது.
உலக
கோப்பை "டுவென்டி-20' தோல்விக்கு பின், தோனி, சேவக், காம்பிர் என எட்டு
சீனியர் வீரர்களுக்கு ஓய்வு கொடுக்கப்பட்டது. ஜிம்பாப்வே தொடரை குறைத்து
மதிப்பிட்ட பி.சி.சி.ஐ., ரெய்னா தலைமையில் "இரண்டாம் தர' இந்திய அணியை
அனுப்பியது. இந்த தவறான முடிவால், மோசமான தோல்விகளுடன், ரேங்க்கும்
பறிபோயுள்ளது.
பேட்டிங்கில்
தொடர்ந்து சொதப்பிய தினேஷ் கார்த்திக், நேற்று கீப்பிங்கிலும்
ஏமாற்றினார். 38 ரன் எடுத்த நிலையில் கபுகேதரா கொடுத்த வாய்ப்பை இவர்
கோட்டைவிட்டார். வெறுத்துப்போன ரெய்னா, அடுத்த ஓவரில் இருந்து (34வது)
கார்த்திக்கை மாற்ற, கீப்பிங் பணியை நமன் ஓஜா ஏற்றார்.
இந்தியா
வெளியேறிய நிலையில், புள்ளிப்பட்டியலில் முதல் இரு இடங்களை பெற்ற இலங்கை,
ஜிம்பாப்வே அணிகள் வரும் 9 ம் தேதி நடக்கும் பைனலில் மோதுகின்றன.
அணி போட்டி வெற்றி தோல்வி புள்ளி ரன்ரேட்
இலங்கை 3 2 1 9 +0.288
ஜிம்பாப்வே 3 2 1 9 +0.176
இந்தியா 4 1 3 4 ---0.278
* ஒவ்வொரு வெற்றிக்கும் 4 புள்ளிகள் வழங்கப்படும். விரைவாக வென்றால் ஒரு போனஸ் புள்ளி தரப்படும்.