தமிழகம் முழுவதும் 17 ஆயிரம் புதிய ஆட்டோக்களுக்கு அனுமதி: கெடுபிடியை அரசு தளர்த்தியதால் பலன்

by **logu** Sat Jun 05, 2010 5:58 am

சென்னை : ஆட்டோ பெர்மிட் கேட்டு விண்ணப்பித்தவர்களில் 17 ஆயிரம்
பேருக்கு ஆட்டோ பெர்மிட் வழங்கலாம் என, போக்குவரத்து கமிஷனர் அலுவலகம்
அனுமதி அளித்துள்ளது. எனவே, விரைவில் தமிழகம் முழுவதும் ஆட்டோக்கள்
எண்ணிக்கை வேகமாக அதிகரிக்கும்.
தமிழகத்தில் ஆட்டோ பெர்மிட் வாங்க வேண்டும் என்றால் ஆயிரக்கணக்கில்
செலவு செய்தால் தான் வாங்க முடியும் என்ற நிலை இருந்தது. ஆனால், பெர்மிட்
கேட்டு விண்ணப்பம் செய்யும் அனைவருக்கும் பெர்மிட் வழங்கப்படும் என, அரசு
சமீபத்தில் சட்டசபையில் அறிவித்தது. உடனே, ஆயிரக்கணக் கானோர் பெர்மிட்
கேட்டு விண்ணப்பித்தனர். போக்குவரத்து கமிஷனர் அலுவலகத்தில் இதுவரை 20
ஆயிரத்து 577 பேர் ஆட்டோ பெர்மிட் கேட்டு விண்ணப்பித்து உள்ளனர். தினமும்
200 பேர் வரை விண்ணப்பங்கள் பூர்த்தி செய்து வந்து சமர்ப்பிக்கின்றனர்.
விண்ணப்பங்களை அவர்கள் சரிபார்த்து இதுவரை 17 ஆயிரத்து 675
விண்ணப்பங்களுக்கு பெர்மிட் தரலாம் என்று ஆர்.டி.ஓ., அலுவலகத்திற்கு
கடிதம் அனுப்பப் பட்டுள்ளது.
இதுபற்றி போக்குவரத்து துறை கமிஷனர் ராஜாராம் கூறியதாவது:
பெங்களூருவில் 72 ஆயிரம் ஆட்டோக்கள், மும்பையில் 78 ஆயிரம் ஆட்டோக்கள்
மற்றும் ஐதராபாத்தில் 64 ஆயிரம் ஆட்டோக்கள் ஓடுகின்றன. ஆனால், சென்னையில்
தற்போது 52 ஆயிரம் ஆட்டோக்கள் தான் ஓடுகின்றன. மற்ற சிறிய மாநிலங்களில்
நிறைய ஆட்டோக்கள் ஓடும் போது இங்கு தாராளமாக ஓடலாம். புதிய ஆட்டோக்கள்
வரவால், ஆட்டோ கட்டணம் குறையும். இதனால், பொதுமக்களுக்கு பெரிதும்
உபயோகமாக இருக்கும். பெர்மிட் கேட்டு விண்ணப்பித் தவர்களில் எத்தனை பேர்
ஆட்டோ வாங்குவார்கள் என்பது தெரியாது. தற்போது வாங்கப்படும் புதிய
பெர்மிட் ஆட்டோக்கள், எல்.பி.ஜி., ஆட்டோக்கள் தான். இவை அனைத்தும்
இரைச்சல் மற்றும் சுற்றுச்சூழல் பாதிக்காத ஆட்டோக்கள். பயணிகளிடம் மீட்டர்
கட்டணம் தான் வசூலிக்க வேண்டும் என்று அவ்வப்போது சோதனை செய்வோம். அப்படி
மீட்டர் கட்டணம் வசூலிக்காத ஆட்டோக்கள் மீது கடும் நடவடிக்கை
எடுக்கப்படும். இவ்வாறு ராஜாராம் கூறினார்.
சென்னை மட்டுமல்லாமல், தமிழகம் முழுவதும் பெரிய நகரங்களில் சாலைகள்
ஏற்கனவே கடும் போக்குவரத்தால் மூச்சுத் திணறுகின்றன. மேலும் ஆட்டோக்
களுக்கு அனுமதி வழங்குவதால் எல்லா ஊர்களிலும் போக்குவரத்து நெருக்கடி
ஏற்படப்போவது உறுதி. "ஆட்டோக்களுக்கு அனுமதி வழங்குவதில் அக்கறை காட்டும்
அரசு, ஆட்டோக்காரர்கள் விதிமுறைகளை பின்பற்றுகின்றனரா என்று
கண்காணிப்பதில் எந்த அக்கறையும் காட்டுவதில்லை. ஆட்டோ பயணிகளிடம் மீட்டர்
கட்டணத்தை தான் வசூலிக்க வேண்டும் என்று அரசு கண்டிப்பாக உத்தரவிடவில்லை.
ஆனால், மீட்டர் கட்டாயம் பொருத்தியிருக்க வேண்டும் என்று மட்டும் போலீஸ்
தரப்பில் நெருக்கடி அளிக்கப்படுகிறது' என்று, பொதுமக்கள் குற்றம்
சாட்டுகின்றனர்.