மருந்துகளை கூடுதல் விலைக்கு விற்றால் கடும் நடவடிக்கை: தமிழக அரசு

சென்னை,ஜூன்
3: மருத்துவமனைகளில் மருந்துகளை சுகாதாரமற்ற முறையில் பராமரித்தாலோ, அதிக
விலைக்கு விற்றாலோ கடும் நடவடிக்கை எடுக்கப்படும் என்று தமிழக அரசு
எச்சரித்துள்ளது.போலி மருந்துகள், காலாவதியான மருந்துகள்
விற்பனை தொடர்பாக செய்திகள் வெளியாகி, சம்பந்தப்பட்டவர்கள் கைதாகியுள்ள
நிலையில்,மருந்துக் கடைகள் மீதான அரசின் கண்காணிப்பு தீவிரமாகி வருகிறது.தனியார்
மருத்துவமனைகளில் நிர்ணயித்ததைவிட கூடுதல் விலைக்கு மருந்துகள்
விற்கப்படுவதாகவும், அவற்றுக்குச் சரியாக பதிவேடுகள் பராமரிக்காமல்
ஏமாற்றும் முயற்சிகள் நடப்பதாகவும் கிடைத்த தகவலின் பேரில் அதிகாரிகள்
சோதனை நடத்தி வருகின்றனர்.நிர்ணயிக்கப்பட்டுள்ள அதிகபட்ச
விலையைவிட அதிகமாக விற்றால் பொதுமக்கள் நேரடியாகப் புகார் தருவதற்கும்
தொலைபேசி எண்ணை அரசு அறிவித்துள்ளது.இது குறித்து தமிழக அரசு வியாழக்கிழமை வெளியிட்ட செய்தி:திருநெல்வேலி
மாவட்டத்தில் உள்ள தனியார் மருத்துவமனையில் அதிகபட்ச சில்லரை விலையைவிட
கூடுதல் விலைக்கு மருந்துகள் விற்பனை செய்யப்படுவதாகப் புகார் வந்துள்ளது.
இப்புகாரின் பேரில் அந்த மருத்துவமனையில் ஆய்வு மேற்கொள்ளப்பட்டதில்
சுகாதாரமற்ற முறையில் மருந்துகள் அடுக்கி வைக்கப்பட்டிருந்தது
கண்டுபிடிக்கப்பட்டது. விற்பனை செய்யப்படும் மருந்துகளுக்கு பில்கள்
பராமரிக்கப்படாததும், விற்பனை உரிமம் இல்லாமல் மருந்துகள் விற்பனை
செய்வதும் தெரியவந்தது.பில்களில் பேட்ச் எண், அதிபட்ச
சில்லரை விலை ஆகியவை குறிப்பிடப்படுவதில்லை. இதுபோன்ற செயல்கள் இந்திய
மருத்துவக் கவுன்சிலின் வரையறைகள் மற்றும் சட்டங்களின்படி தவறாகும்.
மேலும், சில மருத்துவமனைகள் அதிகபட்ச சில்லரை விலையை விட கூடுதலாகவும்,
தயாரிப்பு தேதி, பேட்ச் எண், உற்பத்தியாளர் பெயர் உள்ள மருந்து உறைகளை
நீக்கியும் விற்பனை செய்வதாக தகவல்கள் வந்துள்ளன.இதுகுறித்து
பொதுமக்கள் மற்றும் நுகர்வோர் பாதுகாப்பு அமைப்புகளுக்கு தகவல் கிடைத்தால்
044 - 2859 2828 என்ற எண்ணுக்கு புகார் தெரிவிக்கலாம். இது போன்ற
சமூகவிரோதச் செயல்களில் ஈடுபடுவோர் மீது கடும் நடவடிக்கை எடுக்கப்படும்
என்று தமிழக அரசு எச்சரித்துள்ளது.