மிஸ்டர் கழுகு: சேஞ்ச்… சேலஞ்ச்… ஜெ.!

by **Tamil** Fri May 27, 2016 9:05 am

மிஸ்டர் கழுகு: சேஞ்ச்… சேலஞ்ச்… ஜெ.!
சேலஞ்ச்
தமிழக முதல்வராக ஜெயலலிதா ஆறாவது முறையாகப் பதவி ஏற்கும் வைபவத்துக்குச் சென்றுவிட்டு நேராக ஆபீஸில் ஆஜரானார் கழுகார். டேபிளில் இருந்த நோட்புக்கில் தனது பேனாவால் ஸ்டார் குறியீடு ஒன்றை வரைந்தார். நாம் ஒன்றும் புரியாமல் அதைப் பார்த்துகொண்டிருந்தோம். நம் குழப்பத்தைப் புரிந்துகொண்ட கழுகார், ‘‘வர்த்தக விளம்பரங்களில் எல்லாவற்றையும் சொல்லிவிட்டுக் கடைசியாக, ‘கண்டிஷன்ஸ் அப்ளை’ என்பார்கள். அதைக்
குறிப்பிடுவதற்காக ஸ்டார் குறியீடு போடுவார்கள். அதுபோலத்தான், முதல்வர் ஜெயலலிதா அறிவித்த புதிய அறிவிப்புகள் அனைத்தும் கண்டிஷன்களுக்கு உட்பட்டவை” என்று சிரித்தபடி சப்ஜெக்ட்டுக்குள் போனார்.
மிஸ்டர் கழுகு: சேஞ்ச்… சேலஞ்ச்… ஜெ.! %E0%AE%AE%E0%AE%B0%E0%AE%A3%E0%AE%99%E0%AF%8D%E0%AE%95%E0%AE%B3%E0%AF%8D-1

மிஸ்டர் கழுகு: சேஞ்ச்… சேலஞ்ச்… ஜெ.! %E0%AE%AE%E0%AE%B0%E0%AE%A3%E0%AE%99%E0%AF%8D%E0%AE%95%E0%AE%B3%E0%AF%8D-1

‘‘சென்னைப் பல்கலைக்கழகத்தின் நூற்றாண்டு விழா மண்டபத்தில், ‘ஜெ.ஜெயலலிதா எனும் நான்…” என்று தொடங்கி, 28 அமைச்சர்களுடன் முதலமைச்சராகப் பதவி ஏற்றுக்கொண்ட ஜெயலலிதா, அங்கிருந்து தலைமைச்செயலகம் சென்றார். கட்அவுட்கள், பேனர்கள் இல்லாமல் நடந்த விழாவில் ஜெ.-விடம் சேஞ்ச் தெரிந்தது. புதிய ஆட்சியில் சேலஞ்சும் இருக்கிறது. முதல்நாள் அன்று, தான் கொடுத்த தேர்தல் வாக்குறுதிகளை நிறைவேற்றும் வகையில், 5 கோப்புகளில் கையெழுத்திட்டார். முதலில், டாஸ்மாக் விவகாரத்தைப் பற்றிச் சொல்கிறேன். மதுவிலக்கைப் படிப்படியாகக் குறைப்பேன் என்று தேர்தல் வாக்குறுதியில் சொன்ன ஜெயலலிதா, “மதுக்கடைகள் திறக்கும் நேரத்தை 10 மணி என்பதை மாற்றி, 12 மணி முதல் திறக்கப்படும்; முதற்கட்டமாக 500 கடைகள் மூடப்படும் என்று அறிவித்துள்ளார்.’’
“இந்த அறிவிப்புகள் மூலம், டாஸ்மாக் விவகாரத்தில் ஏதேனும் மாற்றம் ஏற்படுமா?”
“முதல்வர் ஜெயலலிதா, மதுக்கடைகள் தொடர்பாக அறிவித்துள்ள இந்த இரண்டு அறிவிப்புகளால், எந்த மாற்றமும் நிகழாது. டாஸ்மாக் வருமானமும் எந்த வகையிலும் பாதிக்கப்படாது. தமிழகத்தில் 6 ஆயிரத்து சொச்சம் டாஸ்மாக் மதுக்கடைகள் உள்ளன. இவற்றில் ஒரு நாளைக்கு, 65 கோடி ரூபாய் முதல் 68 கோடி ரூபாய் வரை விற்பனை நடக்கிறது. அரசாங்கம் முதற்கட்டமாக, குறைப்பதாக அறிவித்துள்ள 500 கடைகள், விற்பனை மிக மிக மந்தமாக உள்ள கடைகள். அது வெறும் கண்துடைப்பு நடவடிக்கைதான். அதனால், அரசாங்கத்துக்கு எந்த நஷ்டமும் பெரிதாக ஏற்படாது. அதுபோல, 2 மணி நேரத்தைக் குறைப்பதால், எந்த மாற்றமும் ஏற்படப்போவதில்லை. காலை 10 மணி முதல் 12 மணிவரை ஒரு மதுக்கடையில் சராசரியாக 10 ஆயிரம் ரூபாய்க்கும் குறைவாகத்தான் மது விற்பனையாகும். அந்த நேரத்தில் கடை திறக்கப்படாமல் இருப்பதால், மிகப் பெரிய நஷ்டமோ, மாற்றமோ ஏற்படப்போவதில்லை. 12 மணிக்குக் கடையைத் திறக்கும்போது, இரண்டு மணிநேரம் தடைப்பட்ட விற்பனை ஜெகஜோதியாய் களைகட்டும். அதனால், வருமானம் ஈடுகட்டப்படும். மது விவகாரத்தைப் பொறுத்தவரை, ஜெயலலிதாவின் இந்தப் புதிய அறிவிப்புகளால், எந்த மாற்றமும் இருக்கப் போவதில்லை. ஒரே ஒரு ப்ளஸ் பாயின்ட்… அதிகாலை முதலே டாஸ்மாக் வாசலில் கைநடுக்கத்துடன் காத்துக்கிடக்கும் குடிமகன்களை இனி காணமுடியாது. பிஸியான காலை 10 மணிக்கெல்லாம் சுதியை ஏற்றிக்கொண்டு சாலையில் கிடக்கிற காட்சிகளை இனி காண்பது அரிதாக இருக்கும்.”
“100 யூனிட் மின்சாரம் இலவசம் என்று அறிவித்துள்ளாரே?”
“ஆமாம். 100 யூனிட் மின்சாரம் இலவசம்தான். ஆனால், அந்த 100 யூனிட் என்பது 2 மாதங்களுக்கு என்ற கண்டிஷன் அப்ளை ஆகிறது. அப்படியானால், மாதம் ஒன்றுக்கு 50 யூனிட். அதற்கும் மேலாக 1 யூனிட் மின்சாரத்தைப் பயன்படுத்தினால்கூட, இலவசம் என்ற சலுகையை இழந்துவிடுவோம். அதாவது, 100 யூனிட்களுக்குக் குறைவாக மின்சாரம் பயன்படுத்துபவர்களுக்கு மட்டுமே இந்தச் சலுகை. 101 யூனிட் என்ற அளவைத் தொட்டுவிட்டாலும், இலவசம் என்ற சலுகை கிடையாது. சாதாரணமாக இரண்டு ட்யூப் லைட்கள், இரண்டு மின்விசிறிகள் பயன்படுத்தினாலே ஒரு நாளைக்கு ஒன்றரை யூனிட் செலவாகும். மாதம் ஒன்றுக்கு 45 யூனிட்களும், இரண்டு மாதங்களுக்கு 90 யூனிட்களும் ஆகும். இவைதவிர கூடுதலாக ஏதாவது ஒரு மின் சாதனத்தைப் பயன்படுத்தினால், 100 யூனிட்களை ஒரு நுகர்வோர் தாண்டிவிடுவார். அதனால், இரண்டு ட்யூப் லைட்கள், இரண்டு மின்விசிறிகளை மட்டும் பயன்படுத்துவோர் இந்தத் திட்டத்தால் பயனடையலாம். மற்றவர்களுக்கு எந்தப் பயனும் இருக்காது.”
‘‘ஓஹோ!”
“இந்தத் திட்டத்தின் மூலம் 70 முதல் 75 லட்சம் பேர் பயனடைவார்கள் என்று மின்சார வாரியம் கணக்குக் காட்டுகிறது. ஆனால், உண்மையான பயனாளிகளின் எண்ணிக்கை அதைவிடக் குறைவாகத்தான் இருக்கும். ஒரு யூனிட் மின்சாரம் 1 ரூபாய் 10 பைசா. அப்படியானால், 70 லட்சம் பேருக்கு தலா 100 யூனிட் மின்சாரத்தை இலவசமாகக் கொடுத்தால், அதன் மூலம் அரசாங்கத்துக்கு வருடத்துக்கு 77 கோடி ரூபாய் நஷ்டம் ஏற்படும். அதுபோல விசைத்தறிகள், கைத்தறிகளுக்கு ஏற்கெனவே, 500 யூனிட் வரை இலவச மின்சாரம் கொடுக்கப்படுகிறது. இந்த முறை அதை 750 யூனிட் ஆக உயர்த்தி இருக்கிறார்கள். அதற்கு எப்படிப் பார்த்தாலும் வருடத்துக்கு 10 முதல் 20 கோடி ரூபாய் வரை மட்டுமே செலவாகும். மொத்தமாக இந்த இலவச மின்சாரத்துக்காக வருடத்துக்கு 95 கோடி ரூபாய் நஷ்டம் ஏற்படுகிறது. மொத்தமாக 5 வருடங்களுக்குக் கணக்கிட்டால், அரசாங்கத்தின் நஷ்டம் 500 கோடி ரூபாயைத் தாண்டாது. டாஸ்மாக் வருமானத்தோடு கணக்கிட்டால், இது கொசுறுத் தொகை. அதனால், இந்தத் திட்டங்களைச் செயல்படுத்துவதில் அரசாங்கத்துக்கு எந்த நஷ்டமும் ஏற்படாது.”
‘‘ம்…’’
“ஏற்கெனவே, தாலிக்கு 4 கிராம் தங்கம் கொடுக்கப்படுகிறது. இப்போது, கூடுதலாக 4 கிராம் சேர்த்து ஒரு சவரன் இலவசமாக வழங்கப்படும் என்று ஜெயலலிதா அறிவித்துள்ளார். 4 கிராம் கொடுக்கப்பட்டபோது, ஒரு வருடத்துக்கு இந்தத் திட்டத்துக்காக அரசாங்கத்துக்கு ஆன செலவு 580 கோடி முதல் 680 கோடி ரூபாய் வரை. தற்போது, இந்தத் தொகையின் அளவு இரண்டு மடங்காகி இருக்கிறது. அதனால், அதை ஈடுகட்ட பயனாளிகளுக்கான விதிமுறைகளைக் கடுமையாக்கி, ‘கண்டிஷன்ஸ் அப்ளை’ என்கிற முறையில் பயனாளிகளின் எண்ணிக்கையைக் குறைத்து, இந்தத் திட்டத்தை நிறைவேற்ற அரசாங்கம் முடிவு செய்துள்ளது.”
‘‘ஸ்டார் திட்டம்தான்.’’
“5 ஆயிரம் கோடி ரூபாய் மதிப்பிலான, விவசாயக் கடன்கள் ரத்து செய்யப்பட்டுள்ளது. ஆனால், அதிலும் பெரும்பாலான விவசாயிகள் பயன்பெற முடியாது என்கின்றனர் விவரம் அறிந்தவர்கள்.”
“அதில் என்ன சிக்கல்?”
“சிறு குறு விவசாயிகளின் பயிர்க் கடன் தள்ளுபடி என்று அறிவித்துள்ளார்கள். இதனால், அரசுக்கு 5 ஆயிரம் கோடி ரூபாய் செலவாகும் என்கின்றனர். 5 ஏக்கருக்கும் குறைவான நிலம் வைத்திருக்கும் ஒரு விவசாயிதான் சிறு குறு விவசாயி. ஒரு விவசாயி அவரது பெயரில் 5 ஏக்கருக்கும் கூடுதலாக ஒரு சென்ட் நிலம் வைத்திருந்தாலும், அவர் சிறு குறு விவசாயி என்று கருதப்படமாட்டார். அதனால், அவருடைய கூட்டுறவுப் பயிர்க் கடன் தள்ளுபடி ஆகாது. இந்த முறையில் பார்த்தால், மேற்கு மண்டலத்தில் மிகக் குறைவான விவசாயிகளே இதன் மூலம் பயன் அடைவார்கள். கூட்டுறவுச் சங்கங்களில் பொறுப்பில் இருப்பவர்கள் பெரும்பாலும் ஆளும் கட்சியைச் சேர்ந்தவர்கள்தான். அவர்கள் பூதக்கண்ணாடி கொண்டு பார்த்து கட்சிக்காரர்களுக்கு மட்டுமே கடன் கொடுப்பார்கள். அந்த மாதிரி கடன் பெற்றவர்கள்தான் இந்த அறிவிப்பின் மூலம் பெரும்பாலும் பயனடைவார்கள். பயனாளிகளில் சாதாரண விவசாயிகள் பலன் பெறுவது மிகக் குறைவுதான்.”

‘‘உண்மையான நலத்திட்டமாக மாறினால் சரிதான்.’’
‘‘இதே நேரத்தில் இன்னும் இரண்டு தொகுதிகளுக்கான தேர்தலை நிறுத்திவைக்கப்பட்டிருக்கும் நேரத்தில் புதிய அரசு நலத்திட்டங்களை அறிவிப்பது சரிதானா என்ற சர்ச்சையும் தேர்தல் ஆணையத்தில் கிளம்பியிருக்கிறதாம்’’ என்றபடி பறந்தார் கழுகார்.