தேர்தலுக்குப் பிறகும் பேனர்கள் மீதான கட்டுப்பாடு தொடரும்!உயர் நீதிமன்றம் உத்தரவுஉயர் நீதிமன்றம் உத்தரவு

தேர்தல் முடிந்தாலும், பொது இடங்களில் பேனர்கள் வைப்பது குறித்து நீதிமன்றம் முடிவெடுக்கும் வரை விளம்பரப் பதாகைகளை யாரும் வைக்கக் கூடாது என சென்னை உயர் நீதிமன்றம் உத்தரவிட்டது.

மலைப்பகுதியில் உள்ள பாறைகள், மரங்கள் உள்ளிட்ட இயற்கை வளங்கள் மீதும், பொது இடங்களிலும் விளம்பரம் செய்யப்படுவதை எதிர்த்து வழக்குரைஞர் யானை ராஜேந்திரன் சென்னை உயர்நீதிமன்றத்தில் மனு தாக்கல் செய்திருந்தார்.

இந்த வழக்கு தலைமை நீதிபதி எஸ்.கே.கெளல், நீதிபதி எம்.எம்.சுந்தரேஷ் ஆகியோர் முன்பு விசாரணைக்கு வந்தது. அப்போது அரசு தரப்பில் ஆஜரான கூடுதல் தலைமை வழக்குரைஞர், நகராட்சி நிர்வாகத் துறை சார்பில் கடந்த பிப்ரவரி 26-ஆம் தேதி பிறப்பிக்கப்பட்ட அரசாணையை சமர்ப்பித்தார்.

அதில், பொது இடங்களில் உள்ள விளம்பரங்களை அகற்றும் நடவடிக்கையை கண்காணிக்க உள்துறை செயலர் தலைமையில் 5 பேர் கொண்ட குழு அமைக்கப்பட்டுள்ளதாக தெரிவிக்கப்பட்டது. இதையடுத்து, நீதிபதிகள் பிறப்பித்த உத்தரவு:


தமிழகத்தில் பொது இடங்களில் வைக்கப்படும் விளம்பரப் பதாகைகள் உள்ளிட்டவற்றால் அச்சுறுத்தல் ஏற்பட்டு வருகிறது. இதற்கு அரசியல் கட்சிகளையும் குறைகூற வேண்டும். விளம்பரப் பதாகைகள் வைப்பதை கட்டுப்படுத்துவது தொடர்பாக, பலமுறை நீதிமன்றத்தால் பிறப்பிக்கப்பட்ட உத்தரவுகள் வெற்றி பெறவில்லை. இதனால், அவ்வப்போது நீதிமன்ற அவமதிப்பு வழக்குகள் தாக்கல் செய்யப்பட்டுள்ளன.

இதுவே சரியான தருணம்: தேர்தல் நேரம் என்பதால், தேர்தல் ஆணையத்தின் உத்தரவுப்படி விளம்பரப் பதாகைகள் அகற்றப்பட்டுள்ளன. எனவே, இந்த விஷயத்தை ஒழுங்குப்படுத்த இதுவே சரியான தருணம்.

மேலும், இந்த விஷயம் குறித்து நீதிமன்றம் முடிவெடுக்கும்வரை, தேர்தல் முடிந்த பிறகும் சில காலத்துக்கு பேனர்கள் உள்ளிட்ட விளம்பரப் பதாகைகளை வைக்கக்கூடாது. இதை அமல்படுத்த வேண்டிய பொறுப்பு, தொடர்புடைய துறைகளின் உயர் அதிகாரிகளைச் சாரும் என உத்தரவிட்டு, வழக்கு விசாரணையை வரும் ஜூன் 13-ஆம் தேதிக்கு நீதிபதிகள் ஒத்திவைத்தனர்.

"உறுதி செய்ய வேண்டும்'

தினந்தோறும் பெரிய அளவிலான விளம்பரப் பதாகைகள் நடைபாதைகளில் இருப்பதை நாங்கள் காண்கிறோம். இதனால், பாதசாரிகளுக்கு இடையூறு ஏற்படுவதோடு, சில நேரங்களில் உயிரிழப்பும் ஏற்படுகிறது.

எனவே, நடைபாதைகள் அனைத்தும் ஆக்கிரமிப்புகள் அற்றவையாகவும், விளம்பரப் பதாகைகள் இல்லாமலும் இருக்க வேண்டும். இந்தப் பிரச்னைக்கு தீர்வு காணும் நடைமுறையை அரசு தரப்பு வழக்குரைஞர் தெரிவிக்க வேண்டும்.

மேலும், அரசு சார்பில் அமைக்கப்பட்டுள்ள குழு இயற்கை வளங்கள், பொது இடங்களில் விளம்பரங்கள் இல்லாமல் இருப்பதை உறுதி செய்ய வேண்டும். இதற்கேற்ப, அரசியல் கட்சியினரும் நடந்துகொள்வார்கள் என நம்புகிறோம் என நீதிபதிகள் உத்தரவிட்டுள்ளனர்.