ஐவரணி காலாவதி: அ.தி.மு.க.,வில் புதிய நால்வரணி

ஐவரணி காலாவதி: அ.தி.மு.க.,வில் புதிய நால்வரணி

அ.தி.மு.க.,வில் ஐவரணியில் இடம் பெற்றிருந்த, மூத்த அமைச்சர்கள் மூன்று பேர் கழற்றி விடப்பட்டுள்ளனர். அவர்களுக்கு பதிலாக, இருவர் சேர்க்கப்பட்டு, புதிய நால்வர் அணி உருவாகி உள்ளது. அ.தி.மு.க.,வில் முதல்வர் ஜெயலலிதாவுக்கு அடுத்தபடியாக, ஐவரணி செல்வாக்கோடு திகழ்ந்தது. இதில், அமைச்சர்கள் பன்னீர்செல்வம், நத்தம் விஸ்வநாதன், வைத்திலிங்கம், எடப்பாடி பழனிச்சாமி, பழனியப்பன், ஆகியோர் இடம் பெற்றிருந்தனர்.

செல்வாக்கு :அரசு பணிகளாக இருந்தாலும், கட்சிப் பணிகளாக இருந்தாலும், முதல்வர் ஐவரணியை அழைத்து ஆலோசித்த பிறகே, இறுதி முடிவு எடுப்பது வழக்கம். இதனால், கட்சியினரிடம் ஐவர் அணிக்கு, செல்வாக்கு அதிகரித்தது.


ஐவரணிக்கு தலைவராக அமைச்சர் பன்னீர்செல்வம் திகழ்ந்தார். அதனால், அமைச்சர்கள் மற்றும் மாவட்ட செயலர்கள், தங்கள் கோரிக்கைகள் நிறைவேற, பன்னீர்செல்வத்தையும், மற்றவர்களையும் சந்திக்கத் துவங்கினர். நிர்வாகிகள் நியமனத்திலும், ஐவரணியில் சிலரின் கை ஓங்கியது. அவர்களின் ஆதரவாளர்களே அதிக அளவில் நியமிக்கப்பட்டனர்.

வேட்பாளர், ‘சீட்’ பெறவும், அவர்களின் வீடுகளை கட்சியினர் முற்றுகையிட்டனர். இதை சாதகமாக்கிய ஐவரணியின் ஆதரவாளர்களும், உறவினர்களும், ‘சீட்’டுக்கு லட்சக்கணக்கில் பணம் வசூலிக்க துவங்கினர். இதுகுறித்து, கட்சி தலைமைக்கு புகார் மனுக்கள் பறந்தன.


இதையடுத்து, பன்னீர்செல்வம் ஆதரவாளர்களின் பதவிகள் பறிக்கப்பட்டன. ஐவரணியின் செல்வாக்கும், முக்கியத்துவமும் குறைக்கப்பட்டது. வேட்பாளர்கள் நேர்காணலிலும், ஐவரணி புறக்கணிக்கப்பட்டது.

மாற்றம்:இந்தச் சூழ்நிலையில், நேற்று, போயஸ் கார்டனில், கூட்டணி கட்சி தலைவர்களை, முதல்வர் ஜெயலலிதா சந்தித்தார். அப்போது, ஐவரணியில் இடம் பெற்றிருந்தவர்களில், அமைச்சர்கள் வைத்திலிங்கமும் மற்றும் எடப்பாடி பழனிச்சாமியும் மட்டுமே இடம் பெற்றிருந்தனர்.

அமைச்சர்கள் பன்னீர்செல்வம், நத்தம் விஸ்வநாதன், பழனியப்பன் ஆகியோர் போயஸ் கார்டனுக்கு அழைக்கப்படவில்லை. அவர்களுக்குப் பதிலாக, அமைச்சர்கள் தங்கமணி, வேலுமணி ஆகியோர் இடம் பெற்றிருந்தனர். ஐவரணியில் இருந்த மூன்று பேர் கழற்றி விடப்பட்டு, இருவர் சேர்க்கப்பட்டதன் மூலம், ஐவரணி நால்வர் அணியாக மாறி உள்ளது.