ஜிகா வைரஸ் குறித்து தெரிந்துகொள்ள 24 மணி நேர கட்டுப்பாட்டு அறை திறப்பு

ஜிகா வைரஸ் குறித்து தெரிந்துகொள்ள 24 மணி நேர கட்டுப்பாட்டு அறை திறப்பு

தென் அமெரிக்க கண்ட நாடுகள்  மற்றும் ஐரோப்பிய நாடுகளில் வேகமாக பரவிவரும் வைரஸ் தொற்று நோயான ஜிகா, இந்தியா உள்ளிட்ட ஆசிய நாடுகளுக்கும் பரவலாம் என உலக சுகாதார நிறுவனம் எச்சரித்திருந்த நிலையில், இந்தக் கட்டுப்பாட்டு அறை திறக்கப்பட்டுள்ளது குறிப்பிடத்தக்கது.

உலகை அச்சுறுத்தி வரும் ஜிகா வைரஸ் தாக்குதல் குறித்து, பொதுமக்கள் தகவல் தெரிந்துகொள்ள டெல்லியில் 24 மணிநேர சேவை மைய கட்டுப்பாட்டு அறை தொடங்கப்பட்டுள்ளது.


பச்சிளம் குழந்தைகளையும்,கருவில் இருக்கும் குழந்தைகளையும் தாக்கும் இந்தக் கொடிய வைரஸ் இந்தியாவில் பரவாமல் தடுப்பது தொடர்பாக மத்திய சுகாதாரத்துறை பல்வேறு நடவடிக்கைகளை தீவிரப்படுத்தியுள்ளது.


தமிழகத்திலும், ஜிகா வைரஸ் தாக்குதலை எதிர்கொள்ள அனைத்து மருத்துவமனைகளும் தயார் நிலையில் இருப்பதாக தமிழக அரசும் அண்மையில் கூறியிருந்தது.

இந்நிலையில், ஜிகா வைரஸ் குறித்து தகவல் அறிய டெல்லியில் 24 மணிநேரமும், வாரத்தின் 7  நாட்களும் செயல்படும் சேவை மைய கட்டுப்பாட்டு அறையை, மத்திய சுகாதாரம் மற்றும் குடும்ப நலத் துறை தொடங்கியுள்ளது. இந்தக் கட்டுப்பாட்டு அறைக்கு 23061469, 23063205 ஆகிய எண்கள் வழங்கப்பட்டுள்ளன.

இது தொடர்பாக சுகாதாரத் துறை சார்பில் வெளியிடப்பட்டுள்ள செய்திக் குறிப்பில் , “பல்வேறு முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன. ஜிகா வைரஸ் குறித்து அறிவதற்காக தமிழ்நாடு, கேரளா, கர்நாடகா, புதுச்சேரி உள்ளிட்ட 10 மாநிலங்களில் பிப்ரவரி இறுதிக்குள் ஆய்வகங்கள் உண்டாக்கப்படும் ” என்று அறிவிக்கப்பட்டுள்ளது.

மேலும், அந்தச் செய்திக்குறிப்பில், ஜிகா வைரஸ் பாதிக்கப்பட்ட நாடுகளுக்கு சுற்றுலா செல்வது அல்லது அங்கிருந்து இந்தியாவிற்கு வருபவர்களோடு பழகுவது உள்ளிட்ட செயல்களைத் தவிர்க்கவும் வலியுறுத்தப்பட்டுள்ளது.

அதே போல கர்ப்பிணி பெண்கள் ஜிகா வைரஸ் அச்சுறுத்தல் உள்ள நாடுகளுக்கு செல்ல வேண்டாம் எனும் எச்சரிக்கை உள்ளிட்ட அறிவுறுத்தல்களும் அதில்  இடம்பெற்றுள்ளன.