ரயில் கட்டணத்திலிருந்து உணவு கட்டணம் நீக்கம்?

ரயில் கட்டணத்திலிருந்து உணவு கட்டணம் நீக்கம்?

சொகுசு ரயில் பயணிகளிடம், பயணக் கட்டத்துடன் உணவுக்கான கட்டணமும், கட்டாயமாக வசூலிக்கப்பட்டு வருகிறது. இதற்கு ரயில் பயணிகள் எதிர்ப்பு தெரிவித்து வருகின்றனர்.ரயில்களில் வழங்கப்படும் உணவுகள், சுகாதாரமற்ற சூழலில் தயாரிக்கப்படுவதாகவும், பயணிகள் குற்றம் சாட்டுகின்றனர்.இதனால், பயணக் கட்டணத்தில், உணவுக் கட்டணத்தை விலக்கிக் கொள்ள, ரயில்வே திட்டமிட்டுள்ளதாக தெரிகிறது. ரயில்வே பட்ஜெட்டில், அதற்கான அறிவிப்பு வெளியாகும் என எதிர்பார்ககப்படுகிறது.



புதிய நடைமுறை அமலானால், பயணிகள், வீட்டிலிருந்து தேவையான உணவை எடுத்து வரலாம்; விரும்பினால், ரயிலில் விற்கப்படும் உணவை வாங்கிக் கொள்ளலாம்.ரயில்களில் உணவு சப்ளை செய்யும் ஒப்பந்ததாரர்களுக்கும், அதிகாரிகளுக்கும் இடையே ரகசிய உறவு இருப்பதாகவும், அதனால் ஒரே ஒப்பந்ததாரர், தொடர்ச்சியாக, ரயில்களில் உணவு சப்ளை செய்வதற்கான ‘லைசென்சை’ பெற முடிவதாகவும் குற்றம் சாட்டப்படுகிறது. இந்த முறைகேடுகளை களையும் வகையில், ரயில்வே பட்ஜெட்டில் புதிய திட்டத்தை ரயில்வே அமைச்சர் சுரேஷ் பிரபு அறிவிப்பார் என, அதிகாரிகள் தெரிவித்தனர்.

புதிய திட்டம் என்ன?புதிய திட்டப்படி, உயர் வகுப்பு ரயில் பெட்டிகளில் பயணிப்போருக்கு. ‘இ – கேட்டரிங்’ எனப்படும் இணையவழியில் உணவு சப்ளை செய்யப்படும் எனத் தெரிகிறது. குறைந்த கட்டண ரயில் பெட்டிகளில் பயணிப்போருக்கு, உணவு சப்ளை செய்யும் பொறுப்பு,
ஐ.ஆர்.சி.டி.சி., எனப்படும், இந்திய ரயில்வே உணவு மற்றும் சுற்றுலாக் கழகத்திடம் விடப்படும் எனக் கூறப்படுகிறது.