வேடிக்கை போலீஸ்!

வேடிக்கை போலீஸ்!

தமிழகத்தில் மதுக்கடைகளை மூடக்கோரி போராட்டம் நடத்தி வந்த காந்தியவாதி சசிபெருமாள் போராட்டக் களத்திலேயே உயிரிழந்தார். அவரது மரணம் மாநிலம் முழுவதும் எதிரொலித்தது. மதுக்கடைகளை மூடக்கோரி தமிழகம் முழுவதும் ஆர்ப்பாட்டம், சாலை மறியல், உண்ணாவிரதம், மனித சங்கிலி என வெடித்தது போராட்டம்.
 
மதுக்கடைகளுக்கு எதிராக மாணவர்களும் போராட்டத்தில் குதித்ததோடு, பல இடங்களில் டாஸ்மாக் கடைகளும் நொறுக்கப்பட்டது. சென்னையில் மதுக்கடைகளை மூடக்கோரி பச்சையப்பன் கல்லூரி மாணவர்கள் நடத்திய போராட்டம், காவல்துறையினரின் தடியடியால் வன்முறையில் முடிந்தது.

போராட்டத்தில் ஈடுபட்ட மாணவ- மாணவிகளை கண்மூடித்தனமாக காவல்துறையினர் தாக்கினர். 10க்கும் மேற்பட்ட மாணவ- மாணவிகளை சிறையில் அடைத்தது காவல்துறை.
 
எதிர்க்கட்சி தலைவரும், தேமுதிக தலைவருமான விஜயகாந்த் தடையை மீறி நடத்திய மனித சங்கிலி போராட்டத்தில் காவல்துறையினர், தேமுதிக தொண்டர்களை தடியடி நடத்தி விரட்டினர். அகிம்சை வழியில் எதிர்க்கட்சிகள் நடத்திய போராட்டத்தை சீர்குலைக்கும் வகையில் காவல்துறையின் செயல்பாடு இருந்து வருகிறது.

ஆளும் கட்சியினர் போராட்டம் என்றால் உடனே அனுமதி, எதிர்க்கட்சிகள் போராட்டம் என்றால் அனுமதி மறுப்பு என்று வேறுபடுத்தி பார்க்கும் காவல்துறையின் நடவடிக்கைக்கு எதிராக, நீதிமன்றம் சென்றுதான் எதிர்க்கட்சிகள் போராட்டத்தை நடத்தும் நிலை தமிழகத்தில் தற்போது நிலவி வருகிறது.
 
அண்மையில் தமிழகம் வந்த பிரதமர் நரேந்திர மோடி, புரோட்டோக்கால் விதியை மீறி முதல்வர் ஜெயலலிதாவை அவரது போயஸ் கார்டன் இல்லத்தில் சந்தித்து பேசினார். புரோட்டோக்காலை மீறி நடந்த இந்த சந்திப்பு பெரும் சர்ச்சையை ஏற்படுத்தியது.

பிரதமர் மோடி- ஜெயலலிதா சந்திப்பு குறித்து தமிழக காங்கிரஸ் தலைவர் ஈ.வி.கே.எஸ்.இளங்கோவன் கடுமையாக விமர்சித்து பேசினார். இந்த சந்திப்பு குறித்து விமர்சித்து ஒரு வாரத்திற்கு மேல் ஆன நிலையில், அதிமுகவினர் திடீரென ஈ.வி.கே.எஸ்.இளங்கோவனுக்கு எதிராக போராட்டத்தில் குதித்துள்ளனர்.

எதிர்க்கட்சிகள் நடத்தும் மனித சங்கிலி, உண்ணாவிரதத்திற்கு அனுமதி மறுக்கும் காவல்துறை, பொதுமக்களுக்கு பாதிப்பை ஏற்படுத்தும் ஆளும் கட்சியினரின் போராட்டத்திற்கு அனுமதி அளிக்கிறது.

இன்று காலை காங்கிரஸ் தலைமை அலுவலகமான சத்தியமூர்த்தி பவனை முற்றுகையிட வந்தனர் அதிமுகவினர். அவர்களை திருவிக சாலைக்கு முன்பாக தடுத்து நிறுத்தியது காவல்துறை. அந்த சாலை வழியாகத்தான் அலுவலகத்திற்கு செல்வோர் அண்ணாசாலைக்கு செல்ல முடியும். காவல்துறையினர் சாலையை தடுப்பு வேலியை கொண்டு அடைத்துவிட்டதால் பொதுமக்கள் தவித்தனர். சிலர் காவல்துறையினரிடம் வாக்குவாதத்தில் ஈடுபட்டனர். அவர்களை காவல்துறையினர் எச்சரிக்கை செய்ததால் அவர்கள் ஒதுங்கி விட்டனர்.

இதனிடையே அதிமுகவினர், திடீரென ஈ.வி.கே.எஸ்.இளங்கோவன் கொடும்பாவியை சாலையில் போட்டு எரித்தனர். இதனை தடுக்காமல் காவல்துறையினர் வேடிக்கை பார்த்துக் கொண்டிருந்தனர். காவல்துறையினர் பொதுமக்களை விரட்டுவதிலேயே குறியாக இருந்தார்களே தவிர, ஆளும் கட்சியினரின் கொடும்பாவி எரிப்பை தடுக்காமல் அதனை வேடிக்கை பார்த்துக் கொண்டிருந்தனர். காவல்துறையினரின் இந்த செயல் அங்கிருந்த பொதுமக்களை வேதனை அடைய செய்தது.

காவல்துறையினரின் இந்த செயல் ஒருபுறம் இருக்க, ஜெயலலிதாவுக்கு எதிராக காங்கிரஸ் தொண்டர்கள் போராட்டத்தில் குதித்தனர். சத்தியமூர்த்தி பவன் முன்பு முதல்வர் ஜெயலலிதாவின் கொடும்பாவியை எரிக்க காங்கிரஸ் தொண்டர்கள் முயன்றனர். ஓடோடி வந்த காவல்துறையினர், ஜெயலலிதா கொடும்பாவியை பறித்து சென்றனர்.
 
எதிர்க்கட்சி தலைவர்களின் கொடும்பாவியை எரிக்க அனுமதி கொடுப்பதோடு, வேடிக்கை பார்க்கும் காவல்துறையினர், முதல்வரின் கொடும்பாவியை எரிப்பதற்கு முன்பாக தடுத்து நிறுத்தி விடுகின்றனர்.
ஆளும்கட்சியினருக்கும், எதிர்க்கட்சியினருக்கும் எப்படி செயல்பட வேண்டும் என்று தெரியாதென்ன தமிழக காவல்துறைக்கு?