சசிபெருமாள் காந்தியவாதியில்லை: சர்ச்சையை கிளப்பும் நாஞ்சில் சம்பத்

by **Tamil** Mon Aug 10, 2015 7:24 am

சசிபெருமாள் காந்தியவாதியில்லை: சர்ச்சையை கிளப்பும் நாஞ்சில் சம்பத்

திருச்சி: சசிபெருமாளுக்கு இரண்டு மனைவிகள் இருக்கும்போது அவர் எப்படி காந்தியவாதியாக இருக்க முடியும். காந்தி தனது வாழ்நாள் முழுக்க பிரம்மச்சாரியைப்போல் வாழ்ந்தவர் என்று அதிமுக கொள்கை பரப்பு செயலாளர் நாஞ்சில் சம்பத் பேசியிருப்பது சர்ச்சையை ஏற்படுத்தியுள்ளது.

சசிபெருமாள் காந்தியவாதியில்லை: சர்ச்சையை கிளப்பும் நாஞ்சில் சம்பத் Nanjil%20sambath%20long

அதிமுக அரசின் நாடுபோற்றும் நான்காண்டு சாதனை விளக்க பொதுக்கூட்டம் மற்றும் ஆர்.கே.நகர் வெற்றி குறித்த விளக்ககூட்டம் திருச்சி விமான நிலையம் பகுதி அதிமுக சார்பாக திருச்சி கீழப்புதூரில் நேற்றிரவு நடைபெற்றது.

இந்தகூட்டத்தில் சிறப்பு அழைப்பாளராக அதிமுக கொள்கை பரப்பு செயலாளர் நாஞ்சில் சம்பத் கலந்துகொண்டு பேசுகையில், தமிழக அரசின் சாதனையை பொறுத்துகொள்ள முடியாத எதிர்க்கட்சிகள் இப்போது மதுப்பிரச்னையை கையில் எடுத்துள்ளன. தமிழகத்தில் இல்லாமல் இருந்த மதுக்கொள்கையை அமல்படுத்தி நான்கு தலைமுறை மக்களை குடிகாரர்களாக ஆக்கியவர் திமுக தலைவர் கருணாநிதி. அவர் இப்போது மதுவிலக்கை அமல்படுத்துவோம் என்கிறார். இந்த நாடகத்தை மக்கள் நம்ப மாட்டார்கள்.

இவர் இப்படியென்றால் வைகோ, மொரார்ஜி தேசாயிலிருந்து, இந்திராகாந்தி, ராஜீவ் காந்தி, வி.பி.சிங், மன்மோகன் சிங் என ஒன்பது பிரதமர்களை கேள்விக்கணைகளால் விரட்டிய வைகோ குட்டிசுவராகி, சொந்த ஊரில் மதுக்கடை அகற்ற போராடும் நிலைக்கு தள்ளப்பட்டுள்ளார். கலிங்கப்பட்டியில் 1987ல் இருந்து அந்த மதுக்கடை இருக்கிறது. அந்த கடையின் முதல் உரிமையாளர் வைகோவின் முதன்மை பாதுகாவலராக இருக்கும் காளிராஜ்தான். அந்த கடையை இப்போது அடித்து உடைத்து நாடகமாடுகிறார் வைகோ. சொந்த ஊரில் தனது தாயை போராட வைத்து விளம்பரம் தேடும் அளவுக்கு வைகோவின் நிலை பரிதாபத்திற்குரியதாக போனதுதான் வேதனை. சரி முதல்நாள் போராட்டத்தில் இறங்கிய வைகோவின் தாய், கலவரம் நடந்த அடுத்த நாள் ஏன் போராட்டத்திற்கு வரவில்லை. நான் கலவரம் செய்யப்போகிறேன் வராதே என அம்மாவை வீட்டுக்குள் இருக்க சொல்லிவிட்டாரா வைகோ. தனது அரசியல் நாடகத்திற்காக எதையும் செய்வார் வைகோ. அப்படிப்பட்ட வைகோ தமிழகத்தில் யாராவது சாக மாட்டார்களா என காத்துகிடக்கிறார். செய்தி கிடைத்ததும் அடுத்து உடனே அங்குபோய் மலர் வளையம் வைக்க சென்றுவிடுகிறார்.

அப்படித்தான் சில நாட்களுக்கு முன் தி.மு.க.வைச் சேர்ந்த கேபி ராமலிங்கத்தின் தாயார் மரணத்திற்கு செல்கிறார். அந்த சாவுக்கு தி.மு.க.வில் இருந்து ஸ்டாலினோ, அழகிரியோ, தி.மு.க.காரன் ஒருத்தன்கூட வரல. ஆனால் வைகோ போகிறார். என்னை பொறுத்தவரை மதியாதவர் வீட்டு திருமணமாக இருந்தாலும் துக்கநிகழ்வாக இருந்தாலும் போகமாட்டேன். அதுதான் மரியாதை. ஆனால் வைகோ கிளம்பி விடுகிறார்.

சரி விசயத்திற்கு வருவோம். காந்தியவாதி சசி பெருமாள் மரணத்திற்கு தமிழக அரசு பதில் சொல்லணுமாம். அவருக்கு மணிமண்டபம் கட்ட 5 லட்சம் தருகிறாராம் வைகோ. நான் கேட்கிறேன், சசி பெருமாள் காந்தியவாதியா இருக்க முடியாது. சசிபெருமாளுக்கு 2 மனைவி. அவர் எப்படி காந்தியவாதியாக இருக்க முடியும். காந்தி தனது வாழ்நாள் முழுக்க பிரம்மச்சாரியைப்போல் வாழ்ந்தவர். வெற்று விளம்பரத்திற்காக எதையும் செய்யதவர். ஆயுதம் ஏந்தாமல் அகிம்சை வழியில் போராட்டங்களை கையில் எடுத்தவர். அவர் வழியை பின்பற்றியதாக சொல்லப்படும் சசிபெருமாள், செல்போன் டவரில் ஏறி போராட்டம் நடத்தினார். 60 வயதில் 75 அடி செல்போன் டவரில் ஏறினால் நிச்சயம் சாவுதான் மிஞ்சும். காந்தியவாதிக்கு சகிப்புதன்மை வேண்டும். சசிபெருமாளிடம் அப்படியான சகிப்புதன்மை இல்லை. அப்படிப்பட்டவர் எப்படி காந்தியவாதியாக முடியும். வைகோ சசிபெருமாளுக்கு மணிமண்டபம் கட்ட 5 லட்சம் வழங்குவதாக அறிவித்துள்ளார். வைகோவிற்காக உப்பிலியாபுரம் வீரப்பன், மேலப்பாளையம் ஜஹாங்கீர், நொச்சிப்பட்டி தண்டபாணி என பலர் தீக்குளித்து மாண்டுபோனார்கள். அவர்களுக்கு எள்ளளவாவது உதவிகள் செய்திருப்பாரா. அவர்களுக்கு மணிமண்டபம் கட்ட வைகோ நினைக்கவில்லையே ஏன்?

சசிபெருமாள் காந்தியவாதியில்லை: சர்ச்சையை கிளப்பும் நாஞ்சில் சம்பத் Nanjil%20sambath%20long%20meeting

இந்தியாவில் பெரும்பான்மையானவர்கள் புற்றுநோயால் பாதிக்கப்பட்டுள்ளதாக ஆய்வுகள் சொல்லுது. ஒருத்தன் குடிக்கிற சிகரெட் 10 பேருக்கு தீமை விளைவிக்குதுன்னு அதில் சொல்லப்படுது. ஆனால் வைகோ, சிகரெட் குடிப்பதால் சமுதாயத்திற்கு கேடு இல்லை என்கிறார். அவரது மகன் துரை வையாபுரி, மெரிட்டில் சிகரெட் ஏஜென்ஸியை வாங்கியதாக வைகோ சொல்கிறார். அந்த நிறுவனத்துக்கும், உனக்கும் எந்த தொடர்பும் இல்லை என்றால் ஏன் வைகோ 13 லட்சமும், அவரது மனைவி 43 லட்சமும் அந்த கம்பெனிக்கு கடன் கொடுத்ததாக வைகோ தேர்தலில் தாக்கல் செய்த வேட்புமனுவில் குறிப்பிட்டுள்ளார். எப்படியெல்லாம் நாடகம் ஆடனுமோ அப்படி ஆடி மக்களின் நன்மதிப்பை பெற்றுவிடலாம் என நினைக்கிறார் வைகோ. அது சாத்தியமே இல்லை.

விஜயாகாந்த், மனித சங்கிலி நடத்துவோம் என அறிவித்துவிட்டு அங்குபோய் மனிதர்கள் எல்லாம் வந்துட்டாங்க சங்கிலி எங்கே என கேட்கிறார். இப்படி தமிழகத்தில் உள்ள எல்லா தலைவர்களும் வழியில்லாமல் மதுவிலக்கை அமல்படுத்த வேண்டும் என கையிலெடுத்து போராட்டத்தை நடத்துகிறார்கள்.

நீங்கள் செல்லாக்காசு என்பதை புரிந்துகொண்ட இந்திய பிரதமர் மோடி, எங்கள் பட்டத்துராணி வீட்டுக்கே வந்து சந்தித்துவிட்டு போகிறார். அப்படி என்றால் அம்மாவின் நிர்வாக திறமையை பார்த்து இந்த நாடே வியந்து நிற்கிறது. நடுவில் சின்ன சஞ்சலத்திற்கு ஆளானோம். ஆனால் அதையெல்லாம் தவிடுபொடியாக்கி வெளியே வந்த அம்மா, ஆர்கே நகரில் போட்டியிட்டார். வரலாறு காணாத வெற்றியை அம்மா பெற்றார். உடனே கருணாநிதி, கள்ள ஓட்டு போட்டு வெற்றி பெற்றதாக அறிவிக்கிறார். கள்ள ஓட்டுபோடுவதை தமிழ்நாட்டுக்கு கற்றுதந்தவரே கருணாநிதிதான் காரணம். நான் கூட அந்த இயக்கத்தில் இருக்குபோது 12 ஓட்டு கள்ள ஓட்டு போட்டிருக்கேன். இப்போது அதற்கு சாத்தியமில்லை. காரணம் எல்லாம் கம்யூட்டர் மயமாகிடிச்சி.

அப்துல்கலாம் இறந்ததும், அம்மாவால் உடல்நிலை முடியாதநிலையில் அமைச்சர்களை அழைத்து உடனடியாக ராமேஸ்வரம் அனுப்பினார். ஆந்திராவில் படுகொலை செய்யப்பட்ட 20 அப்பாவி தமிழர்களின் குடும்பத்திற்கு உதவித்தொகையும் வேலையும் அறிவித்து பணி ஆணை வழங்கியுள்ளார். இப்படிப்பட்ட தாயின் ஆட்சிதான் இனி தொடரும் அதற்குதான் மக்கள் ஆதரவு அளிப்பார்கள்" என முடித்தார்.

-சி.ஆனந்தகுமார்

படங்கள்: என்.ஜி.மணிகண்டன்