முத்தரப்பு ஒரு நாள்: இந்தியாவை வென்றது ஜிம்பாப்வே!

பிரண்டன் டெய்லர், கிரெய்க் இர்வின் அபார ஆட்டத்தால் முத்தரப்பு ஒரு நாள் போட்டிகளின் முதல் போட்டியில் இந்தியாவை 6 விக்கெட்டுகள் வித்தியாசத்தில் வென்றது ஜிம்பாப்வே.

இந்தியா, இலங்கை, ஜிம்பாப்வே அணிகள் மோதும் முத்தரப்பு ஒரு நாள் போட்டிகளின் முதல் போட்டி புலவாயோ நகரில் இன்று நடைபெற்றது.

பூவா - தலையா வென்று இந்திய அணித் தலைவர் சுரேஷ் ரெய்னா முதலில் பேட்டிங்கை தேர்வு செய்தார்.

இந்திய அணியில் ரோஹித் சர்மா 119 பந்துகளில் 6 பெளண்டரிகள், 4 சிக்ஸர்களுடன் 114 ரன்கள் எடுத்தார். ரவீந்திர ஜடேஜா 61 ரன்கள் எடுத்தார்.

இவர்கள் தவிர, இந்திய அணி வீரர்கள் தினேஷ் கார்த்திக் (22), முரளி விஜய் (11), விராட் கோலி (0), சுரேஷ் ரெய்னா (37) என அவுட்டானார்கள்.

நிர்ணயிக்கப்பட்ட 50 ஓவர்களில் இந்திய அணி 5 விக்கெட்டுகள் இழப்பிற்கு 285 ரன்களை எடுத்தது.

கடினமான இலக்கைத் துரத்த களமிறங்கிய ஜிம்பாப்வே அணியின் துவக்க ஆட்டக்கார்கள் மசகாட்சாவும், டெய்லரும் அபாரமான ஆட்டத்தை வெளிப்படுத்தினர்.

விக்கெட் இழப்பின்றி 13 ஓவர்களில் 88 ரன்களை எட்டியிருந்த நிலையில், 46 ரன்கள் எடுத்திருந்த மசகாட்சா ஆட்டமிழந்தார்.

பின்னர் களமிறங்கிய லாம்ப் (27), கோவெண்ட்ரி (32) என தங்களது பங்களிப்பை அளித்து ஆட்டமிழந்தனர்.

இறுதியில் 48.2 ஓவர்களில் ஜிம்பாப்வே அணி 289 ரன்களை எடுத்து 6 விக்கெட்டுகள் வித்தியாசத்தில் இந்தியாவை வென்றது.

இர்வின் 67 ரன்களுடனும், சிங்கும்புரா 24 ரன்களுடனும் ஆட்டமிழக்காமல் களத்தில் இருந்தனர். துவக்க ஆட்டக்காரர் டெய்லரின் 81 ரன்கள் வெற்றிக்கு வித்திட்டது. ஆட்ட நாயகனாகவும் டெய்லரே தேர்வு செய்யப்பட்டார்.

தோனி இல்லாத ரெய்னா தலைமையிலான இந்திய அணிக்கு, முத்தரப்பு ஒரு நாள் போட்டியி‌ன் முத‌ல் போ‌ட்டி‌யி‌ல் ஜிம்பாப்வே அணி அதிர்ச்சி அளித்துள்ளது என்றால் அது மிகையாகாது.

நன்றி: வெப்துனியா.