ஜெயலலிதா விடுதலை தீர்ப்பின் சுருக்கம்.

சுருக்கமான தீர்ப்பு விபரம் :

குற்றம் சாட்டப்பட்டவர் தரப்பில் ரூ.34 கோடியே 76 லட்சத்து 65,654 பணத்துக்கு, கணக்கு காட்டப்பட்டுள்ளது. கணக்கில் வராத தொகை ரூ.2,82,36,812 ஆகும். இந்த வகையில், மொத்த வருவாயில், ஜெயலலிதா கணக்கு காட்டாத சொத்துக்களின் மதிப்பு 8.12 சதவீதம் மட்டுமே. கிருஷ்ணானந்த் அக்னிஹோரி மற்றும் மத்திய பிரதேச மாநில அரசுகளுக்கு இடையேயான வழக்கில், ஒருவருக்கு, 10 சதவீதம் வரை வருமானத்துக்கு மேல் சொத்து இருந்தால் அவரை வழக்கில் இருந்து விடுவிக்கலாம் என்று தீர்ப்பு வழங்கப்பட்டுள்ளது.

ஆந்திர அரசின் சுற்றறிக்கையிலும் கூட 20 சதவீதம் கூடுதல் சொத்துக்கள் இருப்பதில் தவறில்லை என்று கூறப்பட்டு உள்ளது. எனவே, இந்த வழக்கில் முதல் குற்றவாளியாக சேர்கப்பட்டுள்ள ஜெயலலிதா விடுதலை செய்யப்படுகிறார். அவர் விடுதலையவதால் மற்ற மூவரும் விடுவிக்கப்படுகின்றனர் என்று தீர்ப்பளித்துள்ளார் நீதிபதி குமாரசாமி.

நமது எம்.ஜி.ஆர். பத்திரிகை, திராட்சைத் தோட்டம் போன்றவற்றின் வருமானங்கள் தாமதமாகத்தான் வருமானவரித்துறையிடம் தாக்கல் செய்யப்பட்டுள்ளன. என்றாலும் அதற்காக அவற்றின் வருமானங்களை அறவே கணக்கில் கொள்ளாமல் விட்டு விடக்கூடாது என்று நீதிபதி கூறியுள்ளார்.

வங்கிகளிலும், தனி நபர்களிடமிருந்தும் வாங்கப்பட்டிருக்கும் கடன்களை கீழமை நீதிமன்றம் கடன்களாகக் கருத்தில் எடுத்துக் கொள்ளவே இல்லை.

வளர்ப்பு மகன் சுதாகரனின் திருமணச் செலவுகள் முழுவதையும் ஜெ. தான் செய்தார் என்று கூறப்பட்டிருக்கிறது. ஹிந்து முறைப்படி பெண் வீட்டார் தான் திருமணச் செலவுகளை ஏற்றுக் கொள்வார்கள். திருமணம் நடத்தி வைத்த ஐயரையெல்லாம் ஏன் சாட்சிக்குக் கூப்பிடவில்லை? சுமார் 9 கோடி ரூபாய் திருமணச் செலவுகள் என்று அரசுத் தரப்பில் கூறியிருந்திருக்கிறார்கள்.

குற்றம் சாட்டப்பட்டவர்கள் தரப்பில் சுமார் 24 கோடி ரூபாய்க்கு மேல் தேசிய மயமாக்கப்பட்ட வங்கியிலிருந்து கடன் பெற்றிருக்கிறார்கள். இந்தத் தொகையின் மூலம் தான் அசையாச் சொத்துகளை வாங்கியிருக்கிறார்கள். இந்தக் கடன் வாங்கியது குறித்து அரசுத் தரப்பு தனது கணக்கில் காட்டவே இல்லை. அதனை மறைத்திருக்கிறார்கள்.

திராட்சைத் தோட்டத்து வருமானத்திற்கான வருமான வரியை தாமதமாகச் செலுத்தியிருந்தாலும், அந்த வருமானத்தை கணக்கில் தான் சேர்க்க வேண்டும். அந்தத் தொகை ரூ. 46,71,600.
ரூ. 2.15 கோடி பரிசுப் பொருட்களாக வந்ததாக ஜெ. தரப்பில் கூறப்பட்டது. இதற்கும் தாமதமாகத் தான் வருமான வரி கட்டப்பட்டிருக்கிறது. வருமான வரித்துறை அதனை ஏற்றுக் கொண்டிருக்கிறது. வெளிநாட்டிலிருந்து 77 லட்சம் ரூபாய் வந்ததாகவும் கூறப்படுகிறது. அவற்றையெல்லாம் கணக்கில் கொண்டு, பரிசுப் பொருட்களின் மதிப்பு ரூ. 1.50 கோடி என்று கணக்கில் எடுத்துக் கொள்ளப்படுகிறது.

ஜெயா பப்ளிகேஷன்சுக்காக வருமான வரித்துறையிடம் கணக்கில் காட்டப்பட்ட ரூ. 4,18,55,901 ஏற்றுக் கொள்ளப்படுகிறது.
சூப்பர் டூப்பர் டிவியின் வருமானமாக ரூ. 1,00,00,000 ஏற்றுக் கொள்ளப்படுகிறது.
சுதாகரனின் வாடகை வருமானம் ரூ. 3,20,000 கீழமை நீதிமன்றத்தில் கணக்கில் கொள்ளவில்லை. அதனை இந்த நீதிமன்றம் கணக்கில் ஏற்றுக் கொள்கிறது.

1993-94-ம் ஆண்டுகளில் கிரானைட்டின் விலை என்று மதிப்பிடப்பட்டுள்ளது 2013-14-ம் ஆண்டின் விலையை விட மிகக் கூடுதலாக உள்ளது.

கொடநாடு எஸ்டேட் குறித்த செலவுகளை மிகைப்படுத்திக் காட்டிய அரசுத் தரப்பு, டீ எஸ்டேட் சம்பந்தப்பட்ட வருமானங்களை அறவே காட்டாமல் மறைத்தது விந்தையானது.

எந்தவிதமான குற்றபுகாராய் இருப்பினும் அதற்கான அடிப்படைஆதார ஆவணம் இருக்கவேண்டும். பழிவாங்கும் எண்ணத்தோடு பொய் ஆவணம் அளிக்கப்பட்டுள்ளதாக தீர்ப்பின்மூலம் தெரிகிறது........