இம்ரான்கான் ரகசிய திருமணம்? பி.பி.சி செய்தியாளரை மணந்ததாக தகவல்!

இஸ்லாமாபாத்: முன்னாள் கிரிக்கெட் வீரரும், பாகிஸ்தான் எதிர்க்கட்சி தலைவருமான இம்ரான்கான், பிசிசி வானிலை அறிவிப்பாளரை ரகசியமாக திருமணம் செய்துகொண்டுள்ளதாக தகவல் வெளியாகி உள்ளது.
 
62 வயதான பாகிஸ்தான் முன்னாள் கிரிக்கெட் வீரர் இம்ரான்கான், தற்போது பாகிஸ்தான் தெக்ரிக்-இ-இன்சாப் என்ற அரசியல் கட்சியை நடத்தி வருகிறார். தற்போது இவர் கடந்த சில மாதங்களுக்கு முன்பு பிபிசி வானிலை அறிவிப்பாளர் ஒருவரை ரகசிய திருமணம் செய்து கொண்டுள்ளதாக லண்டனிலிருந்து வெளியாகும் பத்திரிகைகள் செய்தி வெளியிட்டுள்ளன. 

41 வயதான பாகிஸ்தானை சேர்ந்த ரெஹாம்கான் ஏற்கனவே விவகாரத்து பெற்றவர். இவருக்கு 3 குழந்தைகள் உள்ளனர். இங்கிலாந்தில் வசித்து வரும் இவர், தற்போது பி.பி.சி.யின் சவுத் டுடே வானிலை அறிவிப்பாளராக உள்ளார்.

சில மாதங்களுக்கு முன்பு இவர்கள் இடையிலான வதந்தி பரவியது. தற்போது இவர்கள் திருமணம் செய்து கொண்டு உள்ளனர். இந்த திருமணத்திற்கு இம்ரான்கான் வீட்டில் எதிர்ப்பு தெரிவித்து உள்ளனர்.

இம்ரான்கான் 1995ஆம் ஆண்டு இங்கிலாந்தை சேர்ந்த ஜெமிமா கோல்டுஸ்மித் என்பவரைத் திருமணம் செய்து கொண்டார். இவர்கள் கடந்த 2004ஆம் ஆண்டு பிரிந்தனர். இத்தம்பதிக்கு சுலைமான், காசிம் என இரு குழந்தைகள் உள்ளனர். இரு குழந்தைகளும் தாயுடன் இங்கிலாந்தில் வசித்து வருகின்றன.

புதிய பாகிஸ்தானை உருவாக்கிய பிறகே மறுமணம் செய்து கொள்ளத் திட்டமிட்டிருப்பதாக ஏற்கனவே கூறியிருந்த இம்ரான்கான், தற்போது  ரகசியமாக திருமணம் செய்து கொண்டுள்ளார்.

62 வயதாகும் இம்ரான்கானுக்கு பெண்களுடன் உள்ள சகவாசம் குறித்து சமூக இணையதளங்களில் மோசமான கருத்துகள் பரவி வருகின்றன. இந்நிலையில் அவர் மறுமணம் செய்து இருப்பதாக தகவல் வெளியாகி உள்ளது குறிப்பிடத்தக்கது.