ஆஸ்திரேலிய போலீஸ் அதிரடி: சிட்னி ஓட்டலில் பிணைக்கைதிகள் மீட்பு

by **அருள்** Tue Dec 16, 2014 7:22 am

சிட்னி ஓட்டலுக்குள் நுழைந்து தீவிரவாதியை நோக்கி ஆஸ்திரேலிய போலீஸார் சரமாரியாக துப்பாக்கிச்சூடு நடத்தி, பிணைக்கைதிகளை மீட்கும் நடவடிக்கையில் ஈடுபட்டனர்.
இதையடுத்து, 16 மணி நேரம் நீடித்த பரபரப்பு சம்பவம் முடிவுக்கு வந்தது. தங்கள் நடவடிக்கை நிறைவடைந்துவிட்டதாக ஆஸ்திரேலிய போலீஸ் தெரிவித்தனர்.
ஆஸ்திரேலிய போலீஸ் அதிரடி: சிட்னி ஓட்டலில் பிணைக்கைதிகள் மீட்பு Ausi_2245243g

ஆஸ்திரேலிய போலீஸ் அதிரடி: சிட்னி ஓட்டலில் பிணைக்கைதிகள் மீட்பு Ausi_2245243g

பிணைக்கைதிகளை தன் பிடியில் வைத்திருந்த ஈரான் அகதி என அறியப்பட்ட நபர் சுட்டுக்கொல்லப்பட்டதாகவும், பிணைக்கைதிகளில் ஒருவர் பலியானதாகவும் ஆஸ்திரேலிய ஊடகங்கள் தெரிவிக்கின்றன.
அதேவேளையில், காயமடைந்தோர் மற்றும் உயிர்ச்சேதம் குறித்து ஆஸ்திரேலிய போலீஸ் தரப்பில், இந்திய நேரப்படி திங்கள்கிழமை இரவு 10.20 வரை அதிகாரப்பூர்வ தகவல் வெளியிடப்படவில்லை.
ஆஸ்திரேலிய போலீஸ் அதிரடி நடவடிக்கையாக துப்பாக்கிச்சூட்டில் ஈடுபட்டபோது, ஓட்டலுக்குள் இருந்து பிணைக்கைதிகள் சிலர் அலறியடித்து வெளியேறினர். அவர்கள் பத்திரமாக மீட்கப்பட்டனர்.
காயமடைந்த சிலரை உடனடியாக அருகிலுள்ள மருத்துவமனைக்கு போலீஸார் கொண்டு சென்றனர்.
ஓட்டலில் பொதுமக்கள் சிறைபிடிப்பு
முன்னதாக, ஆஸ்திரேலியாவின் சிட்னி நகரில் உள்ள லிண்ட் கபே என்ற பிரபல ஓட்டலில் இருந்த பொதுமக்கள், ஊழியர்களை துப்பாக்கி ஏந்திய மர்ம நபர் ஒருவர் பிணைக்கைதிகளாக சிறைபிடித்து வைத்ததால் அங்கு பதற்றம் ஏற்பட்டது.
இது குறித்த தகவல் வெளியானதும் போலீஸாரும், தொலைக்காட்சி செய்தியாளர்களும் அங்கு விரைந்தனர். தொலைக்காட்சி சேனலில் காட்டப்பட்ட காட்சி ஒன்றில், ஓட்டலுக்குள் பிடிபட்டிருக்கும் பொதுமக்கள் சிலர் ஜன்னலோரம் நிறுத்திவைக்கப்பட்டிருந்ததும், அவர்கள் கைகளில் கருப்புக்கொடி கொடுக்கப்பட்டிருந்ததும் பதிவானது.
அந்தக் கொடியில், வெள்ளை நிறத்தில் அரபு மொழியில் ஏதோ எழுதப்பட்டுள்ளதாக போலீஸார் தெரிவித்துள்ளனர். எனவே, இது இஸ்லாமிய போராளிகள் அமைப்பான ஐ.எஸ்.ஐ.எஸ்.-ன் செயலாக இருக்கலாமோ என சந்தேகிப்பதாக போலீஸார் தெரிவித்தனர்.
இதன் தொடர்ச்சியாக, ஆஸ்திரேலிய பிரதமர் டோனி அபாட், அமைச்சரவை கூட்டத்தை அவசரமாகக் கூட்டினார். ஓட்டலில் பிணைக்கைதிகள் பிடித்துவைக்கப்பட்டுள்ளது குறித்து ஆலோசித்தார். ஆஸ்திரேலியாவுக்கு தீவிரவாத அச்சுறுத்தல் இருப்பதாக அபாட் ஏற்கெனவே எச்சரித்திருந்தார் என்பது கவனிக்கத்தக்கது.
சிரியா, இராக்கில் போராடி வரும் ஐ.எஸ்.ஐ.எஸ். அமைப்புக்கு எதிராக அமெரிக்காவுடன் ஆஸ்திரேலியாவும் கூட்டுச் சேர்ந்துள்ளது. இதற்கு பதிலடியாக ஐ.எஸ். அமைப்பு இத்தகைய தாக்குதலை நடத்தியிருக்கலாம் என அஞ்சப்பட்டது.
பிணைக்கைதிகளில் ஒருவர் இந்தியர்
சிட்னி ஓட்டலில் எத்தனை பேர் பிணைக்கைதிகளாக பிடித்து வைக்கப்பட்டிருக்கின்றனர் என்ற தகவல் முதலில் உறுதிப்படுத்தப்படாத நிலையில், அங்கு இந்தியவைச் சேர்ந்த ஐ.டி. ஊழியர் ஒருவரும் சிக்கியிருப்பதாக தகவல் கிடைத்துள்ளதாக மக்களவையில் அமைச்சர் வெங்கய்ய நாயுடு தெரிவித்திருந்தார். இத்தகவல் இன்னும் உறுதிப்படுத்தப்படவில்லை என்றும் தூதரக அதிகாரிகளுடன் தொடர்பில் இருப்பதாகவும் தெரிவித்திருந்தார்.
சிட்னி ஓட்டலில் இன்போசிஸ் ஊழியர்
இதனிடையே, சிட்னியில் லிண்ட் கபே ஓட்டலில் பிணைக்கைதிகளாக சிக்கியிருப்பவர்களில் தங்கள் நிறுவன ஊழியர் ஒருவரும் அடங்குவார் என பெங்களூரு இன்போசிஸ் நிறுவனம் உறுதிபடுத்தியது.
இது தொடர்பாக அந்நிறுவன தலைமையகம் அறிக்கை வெளியிட்டுள்ள அறிக்கையில், "ஆஸ்திரேலியாவில் உள்ள எங்களது நிறுவனத்தின் மற்ற ஊழியர்களின் பாதுகாப்பு குறித்தும் ஆராய்ந்து வருகிறோம். இந்தியத் தூதரகத்தோடு தொடர்பில் இருக்கிறோம். சம்பந்தப்பட்ட ஊழியரின் குடும்பத்தாருக்கு தகவல் கொடுத்துள்ளோம். ஓட்டலில் இருந்து எங்கள் ஊழியர் உள்பட அனைத்து பிணைக்கைதிகளும் பத்திரமாக திரும்ப வேண்டும் என பிரார்த்திக்கிறோம்" என தெரிவிக்கப்பட்டிருந்தது. பின்னர், இன்போசிஸ் ஊழியர் பத்திரமாக இருப்பதாக தகவல் வெளியானது.
மர்ம நபருடன் போலீஸ் பேச்சுவார்த்தை
ஓட்டலில் ஊழியர்கள், பொதுமக்களை சிறைபிடித்து வைத்துள்ள மர்ம நபரை போலீஸார் தொடர்பு கொண்டுள்ளதாக கூறப்பட்டது. பிணைக்கைதிகளை பிடித்துவைக்க காரணம் என்ன? அரசிடம் இருந்து என்ன எதிர்பார்க்கிறார் என பேச்சுவார்த்தை நடத்தியதாக போலீஸ் தரப்பு தெரிவித்திருந்தது.
5 பேர் தப்பினர்:
அந்தச் சூழலில், ஓட்டலில் இருந்து 5 பிணைக்கைதிகள் தப்பிவந்தனர். அவர்களிடம் போலீஸார் விசாரணை நடத்தினர். இத்தகவலை, மெல்போர்ன் போலீஸ் துணை ஆணையர் கேத்தரின் பர்ன் உறுதிப்படுத்தினார்.
பிரதமர் மோடி கண்டனம்:
ஆஸ்திரேலியாவில் பொதுமக்கள் சிறைபிடிக்கப்பட்ட சம்பவத்திற்கு பிரதமர் நரேந்திர மோடி கடும் கண்டனம் தெரிவித்துள்ளார். இது குறித்து ட்விட்டரில், "சிட்னியில் நடைபெறும் சம்பவம் மிகவும் வேதனையளிக்கிறது. மனிதாபிமானமற்ற, துரதிர்ஷ்டவசமான சம்பவம். பிணைக்கைதிகளாக இருக்கும் அனைவருக்காகவும் பிரார்த்தனை செய்கிறேன்" என குறிப்பிட்டார்.
ஆஸி. பிரதமர் ஆறுதல்:
சிட்னி நகரின் மார்டின் பிளேஸில் பிணைக்கைதிகள் பிடித்து வைக்கப்பட்டிருக்கும் சம்பவம் வருத்தமளிக்கிறது. இருப்பினும், ஆஸ்திரேலியர்கள் பீதியடைய வேண்டாம். ஆஸ்திரேலியாவின் பாதுகாப்பு நிறுவனங்கள் நிலைமையை திறம்பட கையாண்டு வருகிறது என ஆஸ்திரேலிய பிரதமர் டோனி அபாட் ஆறுதல் தெரிவித்திருந்தார்.
இந்தியத் தூதரகம் மூடல்
இதனிடையே, ஆஸ்திரேலியாவில் உள்ள இந்திய தூதரகம் மூடப்பட்டுள்ளது. இந்திய தூதரக அதிகாரிகள் அனைவரது பாதுகாப்பும் உறுதிப்படுத்தப்பட்டுள்ளது என வெளியுறவுச் செயலர் சையது அக்பருதீன் தெரிவித்துள்ளார். காங்கிரஸ் எம்.பி. சசி தரூர், ஆஸ்திரேலிய சம்பவத்துக்கு தனது ட்விட்டர் பக்கத்தில் கண்டனம் தெரிவித்துள்ளார்.