முல்லைப் பெரியாறு: கடந்து வந்த சட்டப்போராட்டங்கள்..!

முல்லைப்பெரியாறு அணையின் நீர்மட்டம் 142 அடியை எட்டியதை தமிழக விவசாயிகள் மிகுந்த மகிழ்ச்சியுடன் உற்சாகமாக கொண்டாடி வருகின்றனர்.
முல்லைப்பெரியாறு அணை மற்றும் அதன் மீதான தமிழகத்தின் உரிமையை நிலைநாட்டிட நடந்துவந்த சட்டபோராட்டங்கள் குறித்து சுருக்கமாக இங்கே...
 
தமிழக - கேரள எல்லையில் முல்லைப் பெரியாறு அணை அமைந்துள்ளது. இந்த அணை கட்டப்பட்ட இடம் கேரளாவுக்கும், அணை தமிழகத்திற்கும் உரியது. தமிழக பொதுப்பணித்துறை இந்த அணையை பராமரித்து வருகிறது.
ஆங்கிலேயர் காலத்தில், மெட்ராஸ் மாகாணத்திற்கு தண்ணீரை திருப்பி விவசாயப்பணிகளுக்கு பயன்படுத்திக்கொள்ளும் பொருட்டு 'பெரியாறு திட்டத்தின்' கீழ் அப்போதைய சென்னை மாகாணத்திற்கும் திருவிதாங்கூர் அரசருக்கும் இடையே ஒப்பந்தம் ஏற்பட்டது. 1886 ஆம் ஆண்டு ஜனவரி 1 ஆம் தேதி கையொப்பமிடப்பட்ட இந்த பெரியாறு குத்தகை ஒப்பந்தந்தின்படி, 999 ஆண்டுகளுக்கு குத்தகைக்கு விடப்பட்டது.

பெரியாறு மேற்குத் தொடர்ச்சி மலையில் தொடங்கி மேற்குநோக்கி ஓடி அரபிக்கடலில் கலக்கிறது. இவ்வாற்றின் நீரை கிழக்கு நோக்கித் திருப்பி, மழை மறைவுப் பகுதியான மதுரை மாவட்டத்திற்குப் பயன்பட வகை செய்வதற்காகவே இவ்வணை கட்டப்பட்டது.
தேனி, திண்டுக்கல், மதுரை, சிவகங்கை மற்றும் இராமநாதபுரம் ஆகிய ஐந்து மாவட்டங்களிலுள்ள 2,08,144 ஏக்கர் நிலங்கள் பாசன வசதி பெறுகின்றன. பல்வேறு குடிநீர் திட்டங்கள் மூலம் அந்தந்தப்பகுதிகளின் குடிநீர் தேவையையும் பூர்த்தி செய்து வருகிறது.

1979 ஆம் ஆண்டு, முல்லைப் பெரியாது அணைக்கு ஆபத்து என்று செய்தி கேரளாவில் பரப்பப்பட்டது. இதையடுத்து, இருமாநிலங்களுக்கும் இடையே நடந்த பேச்சுவார்த்தைக்கு பின்னர், அணையின் மொத்த அளவான 152 அடியிலிருந்து 136 அடியாக குறைக்கப்பட்டது. கேரள மக்களின் அச்சம் போக்கும் பொருட்டு, தமிழகம் அந்த அணையை மேலும் வலுப்படுத்த எல்லா முயற்சிகளையும் செய்த பின், 152 அடி நீரைத் தேக்கலாம் என்று முடிவு செய்யப்பட்டது.

அதன் பின், நடந்த சட்டப்போராட்டங்கள்:

 * தேனி, திண்டுக்கல், மதுரை, சிவகங்கை மற்றும் ராமநாதபுரம் ஆகிய மாவட்ட மக்களின் விவசாயம் மற்றும் குடிநீரின் ஜீவாதாரமாக முல்லைப் பெரியாறு அணை விளங்குகிறது.

*அணையின் பலகீனமாகி விட்டது என்று கேரள பீதி கிளப்பியதால் 1979 ஆம் ஆண்டு குறைக்கப்பட்ட அணையின் நீர் கொள்ளளவை மீண்டும் 152 அடியாக உயர்த்த வேண்டும் என்பது தமிழகத்தின் பல்லாண்டு கோரிக்கை.

*முல்லைப் பெரியாறு குறித்து தமிழகம் மற்றும் கேரளா உயர்நீதிமன்றங்களில் இருந்த நிலுவையில் இருந்த வழக்குகள் 2002 ஆம் ஆண்டு உச்சநீதிமன்றத்துக்கு மாற்றப்பட்டன.

* தமிழக அரசு சார்பில் உச்சநீதிமன்றத்தில் வைக்கப்பட்ட வலுவான வாதங்கள் அடிப்படையில், ‘அணையின் நீர்மட்டத்தை முதல்கட்டமாக 136 அடியில் இருந்து 142 அடியாக தேக்கி வைத்துக் கொள்ளலாம்’ என்று 2006 ஆம் ஆண்டு பிப்ரவரி மாதம் உச்சநீதிமன்றம் தீர்ப்பு வழங்கியது.

*உச்சநீதிமன்ற தீர்ப்பை அவமதிக்கும் வகையி முல்லைப் பெரியாறு அணையின் நீர்மட்டத்தை 136 அடி என்று நிர்ணயம் செய்து கேரள அரசு ஒரு சட்டதிருத்தத்தை  அவசரமாக கொண்டு வந்தது.

* இந்த சட்டதிருத்தம் செல்லாது என்று 2006 ஆம் ஆண்டு மார்ச் மாதம் தமிழக அரசு உச்சநீதிமன்றத்தில் வழக்கு தொடுத்தது.

* அணையை ஆய்வு செய்ய, உச்சநீதிமன்ற முன்னாள் தலைமை நீதிபதி ஏ.எஸ்.ஆனந்த் தலைமையில் ஒரு குழுவை அமைத்து 2010 ஆம் ஆண்டு உத்தரவிட்டது. அக்குழுவினர் 2012 ஆம் ஆண்டு அணை வலுவாக உள்ளது என்று அறிக்கை சமர்பித்தனர்.

* ‘அணையின் நிர்மட்டத்தை 136 அடியாக குறைக்கும் கேரள அரசின் சட்டதிருத்தம் செல்லாது என்றும் இது அரசமைப்பு சட்டத்துக்கு முரணானது. அணையின் நீர்மட்டத்தை 142 அடியாக உயர்த்திக் கொள்ளலாம்’ என்றும் உச்சநீதிமன்றம் தீர்ப்பு அளித்தது.

* மத்திய நீர்வள ஆணையம், தமிழ்நாடு, கேரளா ஆகியவை சார்பில் நியமிக்கப்படும் மூன்று உறுப்பினர்களைக் கொண்ட மூவர் குழு அமைத்து நீர்மட்டம் 142 அடியாக உயர்த்தப்படுவதை மேற்பார்வையிட வேண்டும் என்றும் உச்சநீதிமன்றம் உத்தரவிட்டது.

* அந்த மூவர் குழுவினர் 17.7.2014 அன்று அணையின் நீர்மட்டத்தை 142 அடி அளவுக்கு தண்ணீரை தேக்கும் அளவுக்கு அணையின் ஷட்டர்களை கீழே இறக்கினர். அதன்படி, 21.11.14 அன்று அதிகாலை 2.30 மணிக்கு அணையின் நீர்மட்டம் 142 அடியை தொட்டு விட்டது.

* உச்சநீதிமன்ற தீர்ப்பின் படி அணையின் நீர்மட்டம் உயர்ந்துள்ள நிலையில் அணை உடைந்து விடும் என்று தொடர் பிரசாரங்களில் ஈடுபட்டு வருகிறது. இந்நிலையில், நவம்பர் 22 ஆம் தேதி மத்திய நீர்வளத்துறை அமைச்சர் உமாபாரதி தலைமையில் தமிழ்நாடு, கேரள பிரதிந்திகளின் கூட்டத்தை டெல்லியில் கூடுகிறது.

*அதே நேரத்தில், தமிழகத்தின் தரப்பில் இருந்து அணையின் நீர்மட்டத்தை 152 அடியாக உயர்த்த உடனடியாக சட்டப்பூர்வமான நடவடிக்கை எடுக்க வேண்டும் என்ற கோரிக்கை வலுத்துள்ளது.

-எஸ்.முத்துகிருஷ்ணன்