கரையை கடக்கிறாள் 'லைலா' ; கடலோர மக்கள் 35 ஆயிரம் பேர் வெளியேற்றம்; ரயில்கள் ரத்து

சென்னை : ஆந்திராவில் கடக்கும் புயல் காரணமாக
கடலோரவாழ் மக்கள் 35 ஆயிரம் பேர் பாதுகாப்பான இடங்களுக்கு செல்லுமாறு
அனுப்பி வைக்கப்பட்டுள்ளனர். சென்னைக்கு கிழக்கு மற்றும் வடமேற்கு
திசையில், 190 கி.மீ., தொலைவில் மையம் கொண்டுள்ள லைலா புயல்,
இன்று நெல்லூருக்கும், காக்கிநாடாவிற்கும் இடையே கரையை இன்று (
வியாழக்கிழமை) கடக்கும் என, எதிர்பார்க்கப்படுகிறது. தமிழகத்தில்,
கோடையின் உச்சகட்டமான கத்திரிவெயில் கடந்த 4ம் தேதி துவங்கி, வேலூர்,
திருச்சி, மதுரை உள்ளிட்ட பல மாவட்டங்களில் சுட்டெரித்தது. வங்கக் கடலில்
புதிதாக உருவான குறைந்த காற்றழுத்த தாழ்வு மண்டலம், புயலாக மாறி, தமிழகம்
முழுவதும் பரவலாக மழை பெய்து வருகிறது. இதனால், மக்களின் இயல்பு வாழ்க்கை
பாதிக்கப்பட்டுள்ளது,

விமான படையினர் தயார் :
ஆந்திராவில் புயல் கடந்து செல்லும்போது காற்றின் வேகம் மணிக்கு 120
கி.மீட்டர் வேகத்தில் இருக்கும் இதன்காரணமாக ஆந்திர கடலோர மக்கள், சுமார்
35 ‌ஆயிரம் பேர் பாதுகாப்பான மாற்று இடங்களுக்கு செல்லுமாறு கேட்டு
கொள்ளப்பட்டுள்ளனர். விமான படையினர் தயாராக வைக்கப்பட்டுள்ளனர். நெல்லூர்
பகுதியில் 100 க்கும் மேற்பட்ட மீனவர்கள் காணாமல் போய்விட்டதாக அவர்களை
தேடும் பணியில் கடலோர காவல்படையினர் ஈடுபடுத்தப்பட்டுள்ளனர். பேரிடர் அவசர
கால மீட்பு படையினர் தமிழகம் மற்றும் ஆந்திர கடலோர பகுதிக்கு அனுப்பி
வைக்கப்பட்டுள்ளனர். தமிழகத்தில் இருந்து ஆந்திரா செல்லும் ரயில்கள் ரத்து
செய்யப்பட்டுள்ளன. விஜயவாடா, நெல்லூர் இடையிலான ரயில் போக்குவரத்து
முழுமையாக பாதிக்கப்பட்டுள்ளன. விமான சேவையும் பாதிக்பப்ட்டுள்ளது.

ராணுவ உதவி தேவையா ? :
நாட்டில் லைலா புயல் காரணமாக எழுந்துள்ள நிலையை சமாளிக்க ராணுவ உதவி
அளிக்கப்படும் என பாதுகாப்பு துறை அமைச்சர் ஏ.கே., அண்டனி கூறியுள்ளார்.
டில்லியில் மூத்த பாதுகாப்பு படை அதிகாரிகள் பங்கேற்ற ஆலோசனை கூட்டத்தில்
நாட்டின் கடலோர பாதுகாப்பு விஷயம் தொடர்பாக அமைச்சர் அந்தோணி முக்கிய
யோசனை வழங்கினார். தொடர்ந்து நிருபர்களிடம் பேசிய அமைச்சர் கூறுகையில் :
நாட்டில் நெருக்டி நிலை ஏற்படும் போது ராணுவம் தேவையான உதவிகள் செய்வது
கடமை. லைலா புயல் பாதிப்புக்கு ராணுவ உதவி தேவைப்பட்டால் அனுப்பி
வைக்கப்படும் என்றார்.

வலுவிழக்குமா புயல் :
ஆந்திராவை கடந்து செல்லும் புயல் தற்போது வலுவிழந்து வருவதாக வானிலை ஆய்வு
மைய அதிகாரிகள் தெரிவித்துள்ளனர். வலுவிழக்கும் நேரத்தில் சேதமும்
குறைந்து விடும். இருப்பினும் ஆந்திர, கர்நாடக, தமிழக கடலோரம்
கண்காணிப்பில் வைக்கப்பட்டுள்ளது.


இதுகுறித்து, சென்னை வானிலை ஆய்வுமைய அதிகாரி
குழந்தைவேலு கூறியதாவது: தென்மேற்கு வங்கக்கடலில் நிலைகொண்டிருந்த, 'லைலா'
புயல் நேற்று காலை 8.30 மணியளவில், சென்னைக்கு கிழக்கு மற்றும் வடமேற்கு
திசையில் 190 கி.மீ., தொலைவில் நிலை கொண்டிருந்தது. இதன் காரணமாக தமிழகம்
மற்றும் புதுச்சேரியின் வடக்கு கடலோர மாவட்டங்களின் பெரும்பாலான
பகுதிகளில் நல்ல மழை பெய்துள்ளது. இப்புயல் மேலும் வலுவடைந்து வடமேற்கு,
வடக்கு திசையை நோக்கி நகர்ந்து, நெல்லூர் மற்றும் காக்கிநாடாவிற்கு இடையே
ஆந்திர கடற்கரை பகுதியில், இன்று அதிகாலை கரையை கடக்கும் என
எதிர்பார்க்கப்படுகிறது. இதன் காரணமாக அடுத்த 24 மணி நேரத்தில், தமிழகம்
மற்றும் புதுச்சேரியின் வடக்கு கடலோர மாவட்டங்கள் மற்றும் ஆந்திர கடலோர
மாவட்டங்களின் பெரும்பாலான இடங்களில் பலத்த மழை பெய்ய வாய்ப்புள்ளது.
ஒருசில இடங்களில் கனமழையும் பெய்யக்கூடும்.

தமிழக கடற்கரை பகுதிகளில் மணிக்கு 65 முதல் 75
கி.மீ., வேகத்தில் காற்று வீசக்கூடும். புயல் கரையை கடக்கும் போது,
மணிக்கு 115 முதல் 125 கி.மீ., வேகத்தில் சூறைக்காற்று வீசும். அடுத்த 24
மணி நேரத்தில், வடக்கு கடலோர பகுதிகளில் காற்றின் வேகம் 50 முதல் 60
கி.மீ., வரை இருக்கும். கடல் சீற்றம் அதிகமாக இருக்கும் என்பதால்,
மீனவர்கள் கடலுக்கு செல்லவேண்டாம். சென்னை மற்றும் புறநகர் பகுதிகளில் மழை
விட்டுவிட்டு பெய்யும். சில இடங்களில் கனமழை பெய்யக்கூடும். தரைக்காற்று
பலமாக வீசும் என்றார்.

லைலா பெயர்க்காரணம் :
புயல் என்று வந்து விட்டால் நிஷா, கத்ரீனா, லைலா என பெண்கள் பெயர் தான்
வைக்கப்படுகிறது. புயலுக்கு எப்படி பெயர் வைக்கிறார்கள் என்பது குறித்து
ஸ்வாரஸ்‌ய தகவல் இதோ. சென்னை வானிலை ஆராய்ச்சி மையம் துணை இயக்குநர் ராஜ்
கூறுகையில் : வங்கக் கடல் மற்றும் அரபிக்கடலில் உருவாகும் புயலுக்கு பெயர்
வைக்கும் வழக்கம் கடந்த 2004 ஆம் ஆண்டு தொடங்கியது. சர்வதேச வானிலை
ஆராய்ச்சி மைய குழுமத்தில் உறுப்பினர்களாக இருக்கும் வங்கதேசம, இந்தியா,
மாலத்தீவு, மியன்மார், ஓமன், பாகிஸ்தான், தாய்லாந்து, இலங்கை ஆகிய நாடுகள்
புயலுக்கு என்ன பெயர் வைக்கலாம் என்ற பெயர் பட்டியலை வெளியிட்டது.

இந்த நாடுகள் பரிந்துரைத்த 64 பெயர்கள் தான்
தற்போது ஒவ்வொரு புயலுக்கும் பெயராக வைக்கப்படுகிறது. பெயரை
தேர்ந்தெடுக்கும் போது, சிறியதாக, எளிதில் உச்சரிக்கக் கூடியதாக, சர்ச்சை
இல்லாத பெயராக இருக்க வேண்டும் என்ற ஒரு சில விதிமுறைகள் பின்பற்றப்பட்டன.
அப்படி பரிந்துரைக்கப்பட்ட 64 பெயர்களில் இது வரை 22
உபயோகப்படுத்தப்பட்டுள்ளது. தற்போது வைக்கப்பட்டுள்ள லைலா என்ற பெயரை
பாகிஸ்தான் அளித்ததாகும். அடுத்து வரும் புயலுக்கு பாண்டு என பெயர்
வைக்கப்படும். இந்தப் பெயரை பரிந்துரைத்துள்ளது இலங்கை. இவ்வாறு அவர்
கூறினார்.

புயலுக்கு பின் அமைதி வர வேண்டும் ஆதலால் பெண்கள் பெயரா ?

லைலா ம்ஜுனை காண போனவரை சரியே.....
லைலா போனமைக்கு நன்றி சொல்லுவோம்..