தூர்தர்ஷனில் மோடிக்கு பதிலாக மன்மோகன்சிங் நிகழ்ச்சிகள் ஒளிபரப்பு

தூர்தர்ஷனில் மோடிக்கு பதிலாக மன்மோகன்சிங் நிகழ்ச்சிகள் ஒளிபரப்பு

பிரதமர் நரேந்திரமோடி அமெரிக்காவில் சுற்றுப் பயணம் மேற்கொண்டுள்ளார். விமானத்தில் நியூயார்க் போய்ச் சேர்ந்த அவருக்கு உற்சாக வரவேற்பு அளிக்கப்பட்டது.

மோடியின் அமெரிக்க சுற்றுப்பயணத்தையொட்டி டெல்லி தூர்தர்ஷன் செய்தி சேனலில் சிறப்பு நிகழ்ச்சி தொகுப்பு ஒளிபரப்பப்பட்டது. அப்போது மோடியை பற்றி நிகழ்ச்சியின் பின்னணியில் செய்தி வாசிப்பாளர் பேசிக் கொண்டு இருக்க திடீர் என்று மன்மோன்சிங் சம்பந்தப்பட்ட காட்சிகள் ஒளிபரப்பானது.

இதை தூர்தர்ஷன் உயர் அதிகாரிகள் கவனித்து சம்பந்தப்பட்ட நிகழ்ச்சி தயாரிப்பாளருக்கு தகவல் தெரிவித்து தவறை சரி செய்ய உத்தரவிட்டனர். ஆனால் ஒருசில காட்சிகள் தவிர மற்ற நிகழ்ச்சிகளில் மோடியே இடம் பெற்றதால் தடையின்றி தொடர்ந்து செய்தி தொகுப்பு ஒளிபரப்பானது.

இதுபற்றி தூர்தர்ஷன் அதிகாரிகளிடம் கேட்ட போது, எதிர்பாராதவிதமாக இந்த தவறு நேர்ந்து விட்டது என்று தெரிவித்தனர். டெல்லி தூர்தர்ஷன் ஒளிபரப்பிய அதே நிகழ்ச்சியை மற்ற தூர்தர்ஷன் நிலையங்களும் ஒளிபரப்பியதால் அதிலும் தவறு இடம் பெற்று இருந்தது.

ஏற்கனவே சீன அதிபர் ஜி ஜின்பிங் பெயரை தூர்தர்ஷன் பெண் செய்தி வாசிப்பாளர் ‘லெவன் ஜின்பிங்’ என்று தவறாக உச்சரித்தார். இதற்காக அவர் பணிநீக்கம் செய்யப்பட்டார். இவர் தற்காலிக பணியாளராக பணிபுரிந்து வந்தார்.

இதேபோல் காஷ்மீர் வெள்ளம் பற்றிய நிகழ்ச்சி தூர்தர்ஷனில் ஒளிபரப்பானபோது வர்ணனையாளர் அனந்தநாக், சுலைமான், சங்கராச்சாரியார் மலைகளை குறிப்பிட்டு சொல்லும்போது இஸ்லாமாபாத் பெயரையும் தவறாக உச்சரித்தார்.

இப்போது 3–வது முறையாக மீண்டும் தூர்தர்ஷனில் தவறு ஏற்பட்டு இருப்பது குறிப்பிடத்தக்கது