மங்கள்யான் விண்கலம் செவ்வாய் சுற்றுவட்டப்பாதையில் வெற்றிகரமாக நிலைநிறுத்தப்பட்டது!!!

பெங்களூர்,

மங்கள்யான் விண்கலம் செவ்வாய் சுற்றுவட்டப்பாதையில் வெற்றிகரமாக நிலைநிறுத்தப்பட்டது. இஸ்ரோ மையத்தில் விஞ்ஞானிகளுக்கு பிரதமர் மோடி வாழ்த்து தெரிவித்தார்.

இந்திய விண்வெளி ஆராய்ச்சி நிறுவனம் சார்பில் செவ்வாய் கிரகத்தை ஆராய ‘மங்கள்யான்’ விண்கலம் உருவாக்கப்பட்டு கடந்த ஆண்டு நவம்பர் 5–ந் தேதி ஸ்ரீஹரிகோட்டாவில் இருந்து ராக்கெட் மூலம் விண்ணில் ஏவப்பட்டது. ரூ.460 கோடி செலவில் உருவாக்கப்பட்ட இந்த விண்கலம் 300 நாட்களுக்கும் அதிகமாக விண்ணில் பயணம் செய்து திட்டமிட்டப்படி இன்று காலை செவ்வாய் கிரக சுற்றுவட்டப் பாதையை அடைந்தது. மங்கள்யான் விண்கலம் செவ்வாய் சுற்றுவட்டப்பாதையில் வெற்றிகரமாக நிலைநிறுத்தப்பட்டது. விண்கலத்தில் இருந்த லாம் என்ஜின் மற்றும் அதனுடன் பொருத்தப்பட்டுள்ள 8 சிறிய என்ஜின்கள் 24 நிமிடங்கள் எரியூட்டப்பட்டு அதன் வேகத்தை குறைத்து செவ்வாய் கிரக சுற்று வட்டப்பாதையில் நிலை நிறுத்தப்பட்டது. மங்கள்யான் விண்கலத்தின் அனைத்து என்ஜின்களும் வெற்றிகரமாக இயக்கப்பட்டது.

மிக முக்கியமான அரிய நிகழ்வை பெங்களூர் பீனியாவில் உள்ள இஸ்ரோ தரைக்கட்டுப்பாட்டு மையத்தில் இருந்து பிரதமர் நரேந்திரமோடி நேரில் பார்வையிட்டார். 300 நாட்களுக்கு மேல் பயணம் செய்து மங்கள்யான் விண்கலம் இலக்கை எட்டியது. இந்தியாவின் திட்டம் வெற்றி பெற்றது. செவ்வாய் கிரகத்திற்கு விண்கலம் அனுப்பிய முதல் முயற்சியிலேயே வெற்றி பெற்ற முதல் நாடு என்ற பெருமையை இந்தியா பெற்றுள்ளது. விண்கலம் வெற்றிகரமாக நிலைநிறுத்தப்பட்டதை அடுத்து பெங்களூரில் உள்ள இஸ்ரோ மையத்தில் விஞ்ஞானிகளுக்கு பிரதமர் மோடி வாழ்த்து தெரிவித்தார். தொடர்ந்து அவர் பேசி வருகிறார்.

ஜப்பான், சீனா சாதிக்க முடியாததை,, 
அமெரிக்கா முதல் முயற்சியில் சாதிக்கமுடியாததை..
முதன் முயற்சியிலேயே செவ்வாய் கிரக விஷயத்தில் இந்தியா சாதித்துள்ளது.. இஸ்ரோ, இந்தியாவின் பெருமைமிகு அடையாளம்
இந்திய விஞ்ஞானிகளை தலையில் தூக்கிவைத்து கொண்டாடவேணடிய பொன்னான நேரம் இது..