ஆர்க்டிக் கடலில் காணாமல் போன கப்பல் 169 வருடம் கழித்து கண்டுபிடிப்பு

by **மாலதி** Thu Sep 11, 2014 7:24 am

ஆர்க்டிக் கடலில் காணாமல் போன கப்பல் 169 வருடம் கழித்து கண்டுபிடிப்பு

அட்லாண்டிக் தீவுப் பகுதியிலிருந்து ஆர்க்டிக் சமுத்திரம் வழியாக பசிபிக் பெருங்கடலுக்கு நீர்வழிப்பாதை ஒன்று முந்தைய காலத்தில் இருந்து வந்துள்ளது. ஆசியாவிற்கான குறுகிய கடல் வழியாகக் கருதப்பட்ட அந்த வடமேற்கு பாதையைக் கண்டுபிடிக்க கடந்த 1845-ம் ஆண்டு இங்கிலாந்தைச் சேர்ந்த ஆய்வாளரான சர் ஜான் பிராங்க்ளின் 128 அதிகாரிகளுடன் தனது பயணத்தைத் தொடங்கியுள்ளார்.

இந்த பயணத்தில் ஈடுபட்ட எச்எம்எஸ் எரெபஸ், எச்எம்எஸ் டெர்ரர் என்ற இரண்டு கப்பல்களும் காணாமல் போனதாக அறிவிக்கப்பட்டன. 1848-லிருந்து 1859 வரை வரலாற்றிலேயே நீண்டகாலத் தேடுதல் பணி நடத்தப்பட்டபோதும் நீர்வழிப் பாதையைக் கண்டறிய முடிந்ததே தவிர காணாமல்போன கப்பல்களைக் கண்டுபிடிக்க முடியவில்லை. அந்தப் பாதையும் வானிலையாலும், பனி மூடியிருந்ததாலும் பயன்பாட்டுக்கு ஏற்றதாக இல்லை.

கடந்த 2008-ம் ஆண்டில் மீண்டும் இந்தப் பணியைத் தொடருவதாக கனடா அரசு அறிவித்திருந்தது. இதனைத் தொடர்ந்த தேடுதல் பணிகளில் கடந்த ஞாயிற்றுக்கிழமை அன்று ஒரு கப்பல் கண்டுபிடிக்கப்பட்டுள்ளதாக அந்நாட்டுப் பிரதமர் ஸ்டீபன் ஹார்ப்பர் தெரிவித்துள்ளார்.

நேற்று தலைநகர் ஒட்டாவாவில் நடைபெற்ற செய்தியாளர் கூட்டத்தில் இதனை அறிவித்த அவர் இது ஒரு வரலாற்றுத் தருணம் என்று பெருமையுடன் குறிப்பிட்டுள்ளார். இந்த நீர்வழிப்பாதையில் கனடாவின் இறையாண்மையை வெளிப்படுத்தும் விதமாகவே கப்பல்களைத் தேடும் முயற்சி தொடங்கியதாக அரசுத் தரப்பு தகவல்கள் குறிப்பிடுகின்றன.