கபினி–கிருஷ்ணராஜசாகர் அணைகளில் இருந்து கூடுதல் தண்ணீர் திறப்பு

பென்னாகரம், ஆக. 13–

கர்நாடகாவில் தென்மேற்கு பருவமழையின் காரணமாக கபினி, கிருஷ்ண ராஜசாகர் அணைகள் நிரம்பியது. தொடர்ந்து அதிகளவில் நீர்வரத்து இருந்ததால் காவிரி ஆற்றில் சுமார் 1 லட்சம் கனஅடி வரை தண்ணீர் திறக்கப்பட்டது.

இதனால் ஒகேனக்கல் வெள்ளக்காடானது. நீர்வரத்தின் காரணமாக மேட்டூர் அணையின் நீர்மட்டமும் மளமளவென உயர்ந்து வந்தது. அதிகளவில் தண்ணீர் ஆர்ப்பரித்து கொட்டியதால் ஒகேனக்கல் காவிரி ஆற்றில் சுற்றுலா பயணிகள் குளிக்கவும், பரிசல் இயக்கவும் தடை விதிக்கப்பட்டது.

இதனால் காவிரியில் வெள்ளம் கரைபுரண்டு ஓடியதால் இந்த ஆண்டு ஆடிப்பெருக்கன்று சுற்றுலா பயணிகள் புனித நீராட முடியாத நிலை உருவானது. ஒகேனக்கல் வந்த சுற்றுலா பயணிகள் அனைவரும் ஏமாற்றத்துடன் திரும்பி சென்றனர்.

இதற்கிடையே கர்நாடகாவில் மழை நின்றதால் அங்குள்ள அணைகளுக்கு உபரிநீர் வரத்தும் குறைந்து விட்டது. இதனால் காவிரியில் நீர்வரத்தும் படிப்படியாக குறைந்து வருகிறது. இன்று காலை நிலவரப்படி ஒகேனக்கல் காவிரியில் வினாடிக்கு 20 ஆயிரம் கனஅடிக்கு கீழ் தண்ணீர் வந்து கொண்டு இருந்தது.

நீர்வரத்து குறைய தொடங்கியதையடுத்து நேற்றே தண்ணீரில் அடித்து வரப்பட்டு அருவி பகுதிகளில் சிக்கி இருந்த மரக்கிளைகள், பழைய துணிகள், மரக்கட்டைகளை ஊழியர்கள் அகற்றி சுத்தப்படுத்தினர். தொடர்ந்து நீர்வரத்து குறைந்து கொண்டே இருப்பதால் நீண்ட நாட்களாக விதிக்கப்பட்டு இருந்த தடை நீக்கப்படுமா? என்று பொதுமக்கள் ஆர்வத்தில் உள்ளனர்.

குறைந்த அளவே தண்ணீர் வருவதால் பாதுகாப்பு விலக்கப்பட்டது. இதனால் ஆடி 28–ம் நாளான இன்று சுற்றுலா பயணிகள் தடையை மீறி ஒகேனக்கல் அருவிகளில் ஆனந்தமாக குளித்து மகிழ்ந்தனர். தற்போது கர்நாடகாவில் மழை இல்லை என்பதால் இனி நீர்வரத்து அதிகரிக்க வாய்ப்பு இல்லை. எனவே தற்போது வருகின்ற தண்ணீரில் சுற்றுலா பயணிகள் ஆனந்தமாக குளித்தனர்.

முறைப்படி மாவட்ட நிர்வாகம் இன்னும் தடையை விலக்கவில்லை என்றாலும், தடையை மீறி பொதுமக்கள் குளித்து வருவதால் மீண்டும் ஒகேனக்கல்லுக்கு சுற்றுலா பயணிகள் வருகை அதிகரிக்க தொடங்கி இருக்கிறது. இதனால் ஒகேனக்கல் காவிரி களைகட்டியுள்ளது.

இதே போல் நீர்வரத்தின் காரணமாக பரந்து விரிந்து காணப்படும் மேட்டூர் அணையை பார்வையிடுவதற்காகவும் தினமும் ஏராளமான பேர் வந்து செல்கிறார்கள். இன்று காலை நிலவரப்படி மேட்டூர் அணையின் நீர்மட்டம் 111.52 அடியாக இருந்தது. அணைக்கு வினாடிக்கு 12 ஆயிரத்து 124 கனஅடி தண்ணீர் வந்து கொண்டு இருக்கிறது. அணையில் இருந்து வினாடிக்கு 9 ஆயிரம் கனஅடி தண்ணீர் வெளியேற்றப்பட்டு வருகிறது.

இந்த நிலையில் கர்நாடகா காவிரி நீர்பிடிப்பு பகுதியில் மீண்டும் மழை பெய்ய தொடங்கி உள்ளதால், கபினி–கிருஷ்ணராஜசாகர் அணைக்கு நீர்வரத்து அதிகரித்துள்ளது. இதனால் இந்த 2 அணைகளில் இருந்தும் தற்போது கூடுதலாக தண்ணீர் திறந்துவிடப்பட்டுள்ளது. கபினி அணையில் இருந்து தற்போது 20 ஆயிரம் கனஅடி தண்ணீரும் கிருஷ்ணராஜ சாகர் அணையில் இருந்து 9,750 கனஅடி தண்ணீர் திறந்து விடப்படுகிறது. மொத்தம் 29 ஆயிரத்து 979 கனஅடி தண்ணீர் காவிரியிர் திறந்து விடப்பட்டுள்ளது. இந்த தண்ணீர் நாளை இரவு மேட்டூர் வந்தடையும் என எதிர்பாக்கப்படுகிறது. இதனால் மேட்டூர் அணை நீர்மட்டம் உயர வாய்ப்பு உள்ளது.