விடுதலை புலிகளை இலங்கை மண்ணில் வைத்து அமெரிக்கா எப்படி அழித்தது தெரியுமா?

விடுதலை புலிகளை இலங்கை மண்ணில் வைத்து அமெரிக்கா எப்படி அழித்தது தெரியுமா?

அமெரிக்காவின் ராணுவ நகர்வுகள் ஆசியாவில் எங்கெல்லாம் நடைபெறுகின்றன. இந்தக் கேள்விக்கு எங்களில் பலருக்கு தெரிந்த பதில்- ஆஃப்கானிஸ்தான், ஈராக், பிலிப்பீன்ஸ், ஜப்பான், தென்கொரியா, தாய்வான்.
இந்தப் பதிலை அநேகர் தெரிந்து வைத்திருப்பதன் காரணம் – இந்த நாடுகளிலெல்லாம் அமெரிக்க ராணுவத்தின் தற்காலிக அல்லது நிரந்தர தளங்கள் இருக்கின்றன – அங்கு நடைபெறுபவை பற்றி அவ்வப்போது ஊடகங்களில் வெளிவருகின்றன.
இந்த எல்லோருக்கும் தெரிந்த ஆசியநாடுகளைக் தவிர வேறு ஆசிய நாடுகள் எவற்றிலும் அமெரிக்க ராணுவத்தில் செயற்பாடுகள் எதுவுமே இல்லையா – நேரடியாகவோ மறைமுகமாகவோ?
நிச்சயமாக இருக்கின்றன.
ஒரு விஷயத்தை முதலில் புரிந்துகொள்ளுங்கள். அமெரிக்கா போன்ற பலசாலியான நாடு ஒன்று தனது பலத்தை அல்லது வல்லரசு அந்தஸ்தை தக்கவைத்துக் கொள்ள வேண்டுமென்றால், உலகிலுள்ள எல்லா நாடுகளிலும் ஏதோ ஒரு விதத்தில் தனது காலை வைத்திருக்க வேண்டும். அது பொருளாதார ரீதியாகவும் இருக்கலாம். அல்லது ராணுவ ரீதியாகவும் இருக்கலாம்.
இரண்டும் சேர்ந்திருந்தால் ரொம்ப விசேஷம்!
அமெரிக்க உளவுத்துறை சி.ஐ.ஏ.-வில் உலகிலுள்ள ஒவ்வொரு பகுதியிலும் நடக்கும் விஷயங்களை விலாவாரியாக ஆக தெரிந்து கொள்ள Regional Buereu Chief என்ற இலாகா தலைவர் உள்ளார்.
அவரின் கீழ் பல Country Specialists என்ற பதவிகள் உண்டு. இவர்கள் ஒவ்வொருவரும் ஒவ்வொரு குறிப்பிட்ட நாடு பற்றிய விஷங்களை விரல் நுனியில் வைத்திருப்பார்கள்.
அவர்களுக்கு கீழே Specific Activity Teams என்ற குழுக்கள் உண்டு. இந்த குழுக்களில் இருப்பவர்களின் எண்ணிக்கை, நாட்டுக்கு நாடு, அந்த நாட்டின் முக்கியத்துவத்தைப் பொறுத்து கூடிக்குறையும். ஒவ்வொரு குழுவிலும் ஒவ்வொரு துறையில் நிபுணத்துவம் வாய்ந்தவர்கள் இருப்பார்கள்.
இந்த செட்டப்பை வைத்துக் கொண்டு சி.ஐ.ஏ. உலகம் முழுவதுமான ஒரு அட்டகாசமான உளவு வலைப் பின்னலை வைத்திருக்கிறது.
சி.ஐ.ஏ.வின் இப்படியான தகவல் சேகரிப்பு பிரிவுகள் சேகரித்து வைத்திருக்கும் தரவுகள் சி.ஐ.ஏ.வின் வேறு ஒரு பிரிவுக்கு அருமையாக உதவுகிறது – அந்தப் பிரிவின் பெயர், OPS Planning and Regional Implementation Division.
இவர்கள் தான் அமெரிக்காவின் வெளிநாட்டு ராணுவ திட்டங்கள் அல்லது செயல்பாடுகளுக்கான பாதையை போட்டுக் கொடுக்கிறார்கள்.
நாம் குறிப்பிட்ட இந்த இரண்டு இலாகாக்களின் செயல்பாடுகளும் சரியாக இருந்துவிட்டால், குறிப்பிட்ட நாட்டில் புகுந்து விளையாடி விடலாம்.
நாங்கள் ஏற்கனவே கூறியதுபோல அமெரிக்காவின் வெளிநாட்டு ராணுவ செயல்பாடுகளில் சில வெளியே தெரியும் விதத்தில் பெரிதாகவும் வெளிப்படையாகவும் இருக்கும். வேறு சில காதும் காதும் வைத்தமாதிரி ரகசியமாக நடக்கும்.
இந்த இரண்டாவது ரகத்துக்கு ஆசியாவிலேயே ஒரு உதாரணம் வேண்டுமா?
ரொம்ப தொலைவு போக வேண்டியதில்லை… இலங்கை!
அமெரிக்கா, இலங்கையில் ‘புகுந்து விளையாடியது’ என்பது பலருக்கு தெரியாது. மிக சாதுர்யமாகவும், ரகசியமாகவும் விளையாடினார்கள். விடுதலைப் புலிகளை வெற்றிகொண்ட போரின் திட்டமிடலே அவர்கள்தான்.
மிக முக்கியமான நேரங்களில், இலங்கை ராணுவத்துக்கு கைகொடுத்தார்கள். யுத்தத்தை ஜெயிக்க வைத்தார்கள்.
விடுதலைப்புலிகளின் தலைவராக இருந்த பிரபாகரனை திட்டமிட்டு கார்னர் பண்ணியதும் அமெரிக்காதான். விடுதலைப் புலிகள் இயக்கம் சுவடே இல்லாமல் அழிக்கப்பட வேண்டும் என்ற மாஸ்டர் பிளானும் அவர்களுடையதே.
ஆனால், எல்லாம் ரகசியம்!
அமெரிக்கா என்றாலே, பெரிய ஐரோப்பிய நாடுகள்கூட ஒருவித பயத்துடன் அணுகும் நிலையில், குட்டி நாடான இலங்கையின் அரசால் அமெரிக்காவை எப்படி தில்’லாக எதிர்க்க முடிகிறது என்று யோசித்தீர்களா?
அதற்கு காரணம், இப்போது சர்வதேச விசாரணை, அது-இதென்று ஐ.நா.வில் குரல் எழுப்பும் அமெரிக்கா, யுத்தம் நடந்தபோது, இலங்கையில் என்ன செய்தது என்று இலங்கை அரசுக்கு நன்றாக தெரியும்!
அவர்கள் ஒரு அளவுவரை போவார்கள். அதற்குமேல் போனால், இவர்கள் வாய் திறப்பார்கள். இந்த ‘பிரேக்கிங்-பாயின்ட்’ எங்கே உள்ளது என்று இரு பார்ட்டிக்கும் தெரியும். ஜாலியாக விளையாடுகிறார்கள், ஐ.நா.வில்!
தமிழ்ப்பட ஹீரோ நெசமாகவே அடித்து விளாசுகிறார் என தியேட்டருக்கு வெளியே பாலாபிஷேகம் செய்யும் அப்பாவி ரசிகர்கள் இல்லையா? அதுபோல ஐ.நா. அமெரிக்க தீர்மானத்துக்கு தெருமுனையில் ஆர்ப்பாட்டம்! அதற்கு விடுதலைப் புலிகளின் ஆதரவாளர்களில் அமோக ஆதரவு!
அண்ணே.. விடுதலைப் புலிகளை வேரோடும், வேரடி மண்ணோடும் அழித்தவர்களே, அமெரிக்கர்கள்தான்!
ஆப்கானிஸ்தானில் அமெரிக்கா என்ன செய்தது? ஈராக்கில் என்ன செய்தது? சூடானில், ஏமனில், சிரியாவில்.. என பல இடங்களில் என்ன செய்கிறது என்பது பெரிய ராஜதந்திர-ராணுவ-உளவுத்துறை விளையாட்டு.
அதே போன்றதொரு விளையாட்டை இலங்கையிலும் செய்தது, அமெரிக்கா!
ஆங்கிலத்தில் இப்படியான திரைமறைவு டீலிங் சமாச்சாரங்களை வெளியே கொண்டுவர சில சோர்ஸூகள் உள்ளன. அவர்களது நடவடிக்கைகளுக்கு பின்னணியில் இருந்து ரகசியமாக உதவ சில ‘பெரிய கை’களும் உள்ளன.
அப்படித்தான் பல ரகசியங்கள் வெளியாகின்றன.
ஆனால், இந்த சோர்ஸூகளுக்கு பைனான்ஸ் செய்யும் பெரிய கைகளுக்கு, ‘சம்பவம்’ நடக்கும் நாட்டில் ஏதாவது ஆதாயம் இருக்க வேண்டும். எண்ணை வளம் அல்லது கனிம வளம் இருக்க வேண்டும். இல்லாவிட்டால், சோர்ஸூகளை களத்தில் இறக்கிவிட மாட்டார்கள்.
இதனால்தான், ஆப்கான், ஈராக்கில் அமெரிக்கா தும்மினால்கூட வெளியே தெரிந்துவிடுகிறது… இலங்கையில் நின்று அலறினாலும் வெளியே கேட்காது!

என்ன நடந்தது என்பது, கடைசிவரை ரகசியமாகவே இருந்து, ரகசியமாகவே மறைந்துவிடும்!