காமன்வெல்த் போட்டி கோலாகல நிறைவு:

காமன்வெல்த் போட்டி கோலாகல நிறைவு: 

பதக்கப்பட்டியலில் 28 ஆண்டுக்கு பிறகு இங்கிலாந்து முதலிடம் இந்தியாவுக்கு 5–வது இடம்....
காமன்வெல்த் விளையாட்டு போட்டி நேற்று கலைநிகழ்ச்சிகளுடன் நிறைவடைந்தது. 28 ஆண்டுகளுக்கு பிறகு பதக்கப்பட்டியலில் இங்கிலாந்து முதலிடத்தை தட்டிச்சென்றுள்ளது.
20–வது காமன்வெல்த் விளையாட்டி போட்டி கடந்த மாதம் 23–ந்தேதி ஸ்காட்லாந்தின் கிளாஸ்கோ நகரில் தொடங்கியது. இங்கிலாந்தின் காலனி நாடுகளை ஒருங்கிணைக்கும் வகையில் 4 ஆண்டுகளுக்கு ஒரு முறை நடத்தப்படும் இந்த விளையாட்டு திருவிழாவில் 71 நாடுகளை சேர்ந்த ஏறக்குறைய 4,900 வீரர், வீராங்கனைகள் பங்கேற்றனர். 17 வகையான விளையாட்டுகளில் 261 தங்கப்பதக்கத்திற்கு பந்தயங்கள் நடந்தன.

12 நாட்கள் ரசிகர்களை குதூகலப்படுத்திய இந்த விளையாட்டு கொண்டாட்டம் நேற்றிரவு கோலாகலமான கலை நிகழ்ச்சிகள் மற்றும் வண்ணமயமான வாணவேடிக்கையுடன் ஹம்ப்டன் ஸ்டேடியத்தில் முடிவடைந்தது. பதக்கப் பட்டியலில் மொத்தம் 37 நாடுகள் இடம் பிடித்துள்ளன. இதில் சுவாரஸ்யமான அம்சங்கள் வருமாறு:–
*215 பேர் கொண்ட குழுவினருடன் இந்த போட்டிக்கு அனுப்பப்பட்ட இந்திய அணி பதக்கப்பட்டியலில் 15 தங்கம் உள்பட 65 பதக்கங்களுடன் 5–வது இடத்தை பிடித்துள்ளது. அதிகபட்சமாக மல்யுத்தத்தில் 5 தங்கம், 6 வெள்ளி, 2 வெண்கலம் என்று 13 பதக்கங்களும், துப்பாக்கி சுடுதலில் 4 தங்கம், 9 வெள்ளி, 4 வெண்கலம் என்று 17 பதக்கங்களும், பளுதூக்குதலில் 3 தங்கம் உள்பட 14 பதக்கங்களும் கிடைத்தன.

*டெல்லியில் 2010–ம் ஆண்டு நடந்த காமன்வெல்த் போட்டியில் இந்தியா 38 தங்கம், 27 வெள்ளி, 36 வெண்கலம் என மொத்தம் 101 பதக்கங்களை வாரி குவித்து முதல் முறையாக 2–வது இடத்தை பெற்றது. அப்போது போட்டியை நடத்திய நாடு என்ற வகையில் நமக்கு சாதகமான வில்வித்தை, டென்னிஸ் போன்ற போட்டிகளை சேர்த்திருந்தோம். ஆனால் இந்த முறை அவ்விரு விளையாட்டுகளும் கழற்றி விடப்பட்டன. இது தவிர மல்யுத்தத்தில் கிரகோ–ரோமன், துப்பாக்கி சுடுதலில் பல பிரிவுகள் நீக்கப்பட்டன. இந்தியாவின் பதக்க எண்ணிக்கை வெகுவாக குறைந்ததற்கு இதுவும் ஒரு காரணமாகும்.
*2014–ம் ஆண்டு காமன்வெல்த்தில் இந்தியாவுக்கு முதல் தங்கப்பதக்கத்தை பளுதூக்குதல் வீராங்கனை சஞ்சிதா சானு வாங்கித் தந்தார்.
*1934–ம் ஆண்டில் இருந்து காமன்வெல்த் போட்டியில் பங்கேற்று வரும் இந்தியா இதுவரை ஒட்டுமொத்தமாக 141 தங்கப்பதக்கம் உள்பட 373 பதக்கங்களை கைப்பற்றி இருக்கிறது.

இங்கிலாந்து இந்த முறை பதக்கங்களை வேட்டையாடுவதில் தன்னிகரற்று விளங்கிய இங்கிலாந்து அணி 58 தங்கம் உள்பட 170 பதக்கங்களை அறுவடை செய்து 28 ஆண்டுகளுக்கு பிறகு பதக்கப்பட்டியலில் முதலிட அரியணையில் ஏறியிருக்கிறது. காமன்வெல்த் போட்டியில் அந்த அணி முதலிடம் பிடிப்பது இது 7–வது முறையாகும். அது மட்டுமின்றி 84 ஆண்டு கால காமன்வெல்த் போட்டி வரலாற்றில் ஒரு காமன்வெல்த் தொடரில் இங்கிலாந்து வென்ற அதிகபட்ச பதக்க எண்ணிக்கையும் இவை தான். இதற்கு முன்பு 2002–ம் ஆண்டு மான்செஸ்டரில் நடந்த காமன்வெல்த்தில் 53 தங்கம் உள்பட 164 பதக்கங்களை பெற்றதே சிறப்பான நிலையாக இருந்தது. ஒட்டுமொத்தத்தில் இங்கிலாந்து இதுவரை வென்ற பதக்கங்களின் எண்ணிக்கை 2004 பதக்கம்.
*46 தங்கம் உள்பட 132 பதக்கங்களுடன் ஆஸ்திரேலியா 2–வது இடத்திற்கு தள்ளப்பட்டது. ஆஸ்திரேலியா பதக்கப்பட்டியலில் நம்பர் ஒன் இடத்தை இழப்பது 1986–ம் ஆண்டுக்கு பிறகு இதுவே முதல் முறையாகும்.
*இந்த காமன்வெல்த் தொடரில் அதிக பதக்கங்களை ருசித்தவர் கனடா நாட்டு ஜிம்னாஸ்டிக்ஸ் வீராங்கனை பாட்ரிசியா பெஸ்சோவ் பென்கோ. 17 வயதே நிரம்பிய இவர், தான் பங்கேற்ற முதன் காமன்வெல்த் போட்டியிலேயே 5 தங்கம், ஒரு வெண்கலம் என்று 6 பதக்கங்களை சேகரித்து அனைவரது கவனத்தையும் ஈர்த்து விட்டார். ஆஸ்திரேலிய நீச்சல் வீராங்கனை எம்மா மெக்கியானின் கழுத்தை 4 தங்கமும், 2 வெண்கலமும் அலங்கரித்தன.

*‘உலகின் அதிவேக மனிதர்’ என்று அழைக்கப்படுபவர் ஜமைக்கா நாட்டின் ஓட்டப்பந்தய சூறாவளி உசேன் போல்ட். 27 வயதான இவர் ஒலிம்பிக்கில் 6 தங்கமும், உலக தடகளத்தில் 8 தங்கமும் வென்ற வரலாற்று நாயகன். ஆனாலும் ஏதாவது ஒரு காரணத்தை காட்டி காமன்வெல்த் போட்டிகளில் களம் இறங்குவதை தள்ளிபோட்டு வந்த உசேன் போல்ட் முதல் முறையாக இந்த காமன்வெல்த் தொடரில் அறிமுகம் ஆனார். காயத்தால் 100 மீட்டர் மற்றும் 200 மீட்டர் பந்தய களத்தில் குதிப்பதை தவிர்த்த இவர் நேற்று முன்தினம் இரவு நடந்த 4x100 மீட்டர் தொடர் ஓட்டத்தில் அடியெடுத்து வைத்தார். ஜாசன் லிவர்மோர், கெமார் பெய்லி கோலே, நிக்கெல் ஆஷ்மீட், உசேன் போல்ட் ஆகிய கொண்ட ஜமைக்கா அணியினர் 37.58 வினாடிகளில் பந்தய தூரத்தை கடந்து புதிய போட்டி சாதனையுடன் தங்கப்பதக்கத்தை சொந்தமாக்கினார்கள். இதில் 4–வது வீரராக மின்னல் வேகத்தில் ஓடி இலக்கை அடைந்த உசேன் போல்ட், ரசிகர்களை பிரமிப்பில் அசர வைத்தார். ‘காமன்வெல்த் பதக்கம் மட்டுமே எனது சாதனைப் பட்டியலில் இல்லாமல் இருந்தது. அதனையும் சேர்த்து விட்டது மிக்க மகிழ்ச்சி. ஆனால் தனிநபர் பிரிவில் ஓட முடியாமல் போனதற்காக ரசிகர்களிடம் வருத்தம் தெரிவித்துக்கொள்கிறேன்’ என்று உசேன் போல்ட் குறிப்பிட்டார்.

அடுத்த காமன்வெல்த் விளையாட்டு போட்டி 2018–ம் ஆண்டு ஆஸ்திரேலியாவின் கோல்டுகோஸ்டில் நடைபெறுகிறது.
காமன்வெல்த் விளையாட்டில் ஸ்குவாஷ் பெண்கள் இரட்டையர் பிரிவில் சென்னையைச் சேர்ந்த தீபிகா பலிக்கலும், ஜோஷ்னா சின்னப்பாவும் இணைந்து தங்கப்பதக்கத்தை வென்று புதிய வரலாறு படைத்தனர். காமன்வெல்த் ஸ்குவாஷில் இந்தியா பதக்கம் ஜெயித்தது இது தான் முதல் முறையாகும்.

தீபிகா பலிக்கலின் ஆட்டத்தை நேரில் கண்டுகளித்த அவரது வருங்கால கணவரான இந்திய கிரிக்கெட் வீரர் தினேஷ் கார்த்திக் ஆரம்பத்தில் இருந்தே உற்சாகப்படுத்தினார். வெற்றியை எட்டியதும் இருவரும் கட்டித்தழுவி ஆனந்தத்தை பரிமாறிக் கொண்டனர். தீபிகா பலிக்கல் தனது ‘டுவிட்டர்’ வலைதளத்தில் ஜோடி படத்தை வெளியிட்டு, ‘இது போன்ற மாயாஜால தினத்தில் ‘என்னவரும்’ என்னுடன் இருந்தது மகிழ்ச்சி அளிக்கிறது’ என்று பூரிப்படைந்துள்ளார். பதிலுக்கு தினேஷ் கார்த்திக், தீபிகா பலிக்கல் மூலம் தான் மிகுந்த பெருமிதம் அடைவதாக குறிப்பிட்டுள்ளார். தீபிகா–தினேஷ் கார்த்திக் இடையே கடந்த ஆண்டு நவம்பர் மாதம் திருமணம் நிச்சயதார்த்தம் நடந்தது குறிப்பிடத்தக்கது.
டாப் 10 பதக்கப்பட்டியல்

தங்கம் வெள்ளி வெண்கலம் மொத்தம்
1.இங்கிலாந்து 58 57 56 171
2.ஆஸ்திரேலியா 47 42 46 135
3.கனடா 32 16 34 82
4.ஸ்காட்லாந்து 19 15 19 53
5.இந்தியா 15 30 19 64
6.நியூசிலாந்து 14 13 17 44
7.தென்ஆப்பிரிக்கா 13 10 17 40
8. நைஜீரியா 11 11 14 36
9. கென்யா 10 10 5 25
10. ஜமைக்கா 10 4 8 22
https://www.youtube.com/watch?v=8சிக்க்வ்னி9பஸ்