தமிழகத்தில் ஓடும் எக்ஸ்பிரஸ் ரெயில்களில் உணவு வழங்க புதிய திட்டம்

by **மாலதி** Thu Jul 31, 2014 7:17 am

சென்னை, ஜூலை.30-
தமிழகத்தில் ஓடும் எக்ஸ்பிரஸ் ரெயில்களில் உணவு வழங்க புதிய திட்டம் 8b63f605-f760-4437-920b-063dc1f762b3_S_secvpf

நீண்ட தூர ரெயில்களில் பயணம் செய்யும் பயணிகளுக்கு உணவு விற்பனை செய்வதற்காக ஒரு சில ரெயில்களில் ‘உணவு தயாரிக்கும் ரெயில் பெட்டி’ இணைக்கப்பட்டிருக்கிறது. இந்த பெட்டிகளில் ரெயில் ஓடிக்கொண்டிருக்கும் போதே உணவுகள் தயாரித்து, பயணிகளுக்கு விற்பனை செய்யப்படுகிறது. இவற்றை விரும்பாத பயணிகள் ரெயில் நிற்கும் ரெயில் நிலையங்களில் விற்கப்படும் உணவு பொருட்களை வாங்கி பயன்படுத்துகின்றனர்.

ஆனால் சமீப காலமாக இவற்றில் தரம் குறைவு, விலை அதிகம் என்பதால் பயணிகள் இவற்றை விரும்புவதில்லை. இதனால் பயணிகள் பயணிக்கும் முன்பே தங்கள் வீடுகளில் இருந்து உணவு பொருட்களை எடுத்து வந்து சாப்பிடுகின்றனர். பயணத்தின் போது ஒரு வேளை சாப்பாடு என்றால் வீட்டில் இருந்து கொண்டுவரமுடியும். ஆனால் நீண்ட தூர ரெயில்களில் நாள் கணக்கில் பயணம் செய்யும் பயணிகள் வீடுகளில் இருந்து சாப்பாடு கொண்டு வரமுடியாது என்பதால் அவர்களின் நிலை தான் பரிதாபமாக உள்ளது.

இதுகுறித்து ரெயில்வே நிர்வாகத்துக்கும் பயணிகள் தரப்பில் மாற்று ஏற்பாடு செய்யுமாறு கோரிக்கை விடுத்தனர். இதனை ஏற்று ரெயில்வே நிர்வாகம் புதிய முறையை அறிமுகப்படுத்தி உள்ளது. இதுகுறித்து ரெயில்வே அதிகாரிகள் கூறியதாவது:-

வடமாநிலங்களில் பெரும்பாலான ரெயில்கள் செல்லும் பாதையில் உள்ள பெரிய நகரங்களில் உள்ள ஓட்டல்களின் பட்டியல் பயணிகளுக்கு வழங்கப்படுகிறது. இந்த ஓட்டல்களில் இருந்து தேவையான உணவுகளை குறிப்பிட்ட ரெயில் நிலையத்திற்கு கொண்டு தருவதற்கு இணையதள முகவரிகளை அளித்துள்ளன. அந்த முகவரிக்கு லேப்-டாப் அல்லது செல்போனில் எஸ்.எம்.எஸ். மற்றும் தொலைபேசி மூலம் தங்களுடைய டிக்கெட்டின் பி.என்.ஆர். எண்ணுடன் தேவைப்படும் உணவு வகைகள் குறித்து ஒரு மணிநேரத்தில் இருந்து ஒரு மாதத்திற்கு முன்பு வரை தகவல் தரும் முறை அறிமுகப்படுத்தப்பட்டுள்ளது.

இந்த முறை வடமாநிலங்களில் குறிப்பாக டெல்லி, மும்பை, கொல்கத்தா, ராஜஸ்தான், குஜராத் ஆகிய பகுதிகளில் இயக்கப்படும் ரெயில் பயணிகளிடையே நல்ல வரவேற்பை பெற்றுள்ளது. இதற்கு சற்று கூடுதலான கட்டணம் வசூலிக்கப்படுகிறது. பயணிகளின் தேவைக்கு ஏற்ப வடமாநிலம், தென்மாநிலம், குஜராத், சைனீஸ் மற்றும் ஜெயின் உணவுகள் தரமான வகையில், சூடான உணவுகளை வினியோகிக்கின்றனர்.

சிலநேரங்களில் ரெயில் காலதாமதமாக வருவதாக இருந்தால் பயணிகள் முன்கூட்டியே சம்பந்தப்பட்ட ஓட்டல்களுக்கு தகவல் தெரிவித்தால், ரெயில் வரும் நேரத்தில் சூடான உணவுகளை வழங்குகின்றனர். இதற்காக நாடு முழுவதும் 170 ரெயில் நிலையங்களில் பயணிகளுக்கு உணவு வழங்குவதற்காக 300 ஓட்டல்களில் ரெயில்வே நிர்வாகம் ஒப்பந்தம் செய்துள்ளது. இதன் மூலம் தினசரி 8 ஆயிரம் உணவுகள் வழங்கப்பட்டு வருகிறது.

பெரும்பாலான உணவுக்கு ரூ.100 முதல் ரூ.200 வரை கட்டணம் வசூலிக்கப்படுகிறது. சராசரியாக மொத்த கட்டணத்தில் 20 சதவீதம் கமிஷன் பெறப்படுகிறது. தெற்கு ரெயில்வேயை பொருத்தவரையில் கன்னியாகுமரி எக்ஸ்பிரஸ், குருவாயூர், அனந்தபுரி, நெல்லை, முத்துநகர், ராமேஸ்வரம், வைகை, பல்லவன் போன்ற ரெயில்களில் இந்த திட்டம் மூலம் பயணிகளுக்கு தரமான உணவு வழங்கும் முறை அறிமுகப்படுத்துவது குறித்து பரிசீலனை நடந்து வருகிறது.

மலைக்கோட்டை ரெயில் சென்னையிலும், திருச்சியிலும் இரவு நேரத்தில் புறப்படுவதால் இந்த ரெயிலில் இந்த திட்டம் அறிமுகப்படுத்துவதற்கான சாத்திய கூறுகள் குறைவாகவே இருக்கிறது. அறிமுகப்படுத்த வாய்ப்புள்ள அனைத்து ரெயில்களிலும் இந்த திட்டம் விரைவில் அமல்படுத்தப்பட உள்ளது. இதுகுறித்து முறையான உத்தரவுகள் ரெயில்வே துறையிலிருந்து பெறப்படவில்லை. உத்தரவு பெற்ற உடன் திட்டம் உடனடியாக தொடங் கப்படும், அதற்கு தயார் நிலையில் இருக்கிறோம்.

இவ்வாறு அதிகாரிகள் கூறினர்.